ރައީސް ޑރ. މުއިއްޒު، ޑިމޮކްރެޓްސްގެ ރައީސް ހަސަންއާ ބައްދަލުކުރައްވައިފި

ރައީސް ޑރ. މުހައްމަދު މުއިއްޒު، ޑިމޮކްރެޓްސްގެ ޕާޓީގެ ހަސަން ލަތީފާ ވެސް މިއަދު ބައްދަލުކުރައްވައިފި އެވެ.

ރައީސް އޮފީހުގައި މިއަދު ބޭއްވި ބައްދަލުވުމާ ގުޅޭ ގޮތުން ހަސަން "މިހާރު" އަށް ވިދާޅުވީ މިވަގުތު ސިޔާސީ މަސްރަހުގައި ހުރި އެކިއެކި ކަންކަމާ ގުޅޭ ގޮތުން ރައީސް ޑރ. މުއިއްޒާ މަޝްވަރާ ކުރެއްވި ކަމަށެވެ. އިތުރު ތަފްސީލެއް ނުދެއްވަ އެވެ.

ހަސަން މީގެ ކުރިން ވަނީ މި ސަރުކާރުގައި ޑިމޮކްރެޓްސްގެ ބައިވެރިވުން އޮންނާނެ ކަމަށް ވިދާޅުވެ ވާހަކަ ދައްކަވައިފަ އެވެ. މިދިޔަ ރިޔާސީ އިންތިހާބުގެ ދެ ވަނަ ބުރުގައި ޑިމޮކްރެޓްސް އިން ރަސްމީކޮށް ރައީސް ޑރ. މުއިއްޒަށް ރަސްމީކޮށް ތާއީދު ނުކުރިޔަސް އެ ޕާޓީގެ އާންމު ބައެއް މެމްބަރުންގެ ތާއީދު އޮތީ އެ މަނިކުފާނަށެވެ. ހާއްސަކޮށް ބައެއް ރަށްރަށުގައި ޑިމޮކްރެޓްސް ޕާޓީގެ މެމްބަރުން ރައީސް ޑރ. މުއިއްޒަށް ކެމްޕެއިން ވެސް ކުރި އެވެ.

ޕީއެންސީގެ ރައީސްގެ މަގާމު ވެސް ފުރުއްވާ ރައީސް ޑރ. މުއިއްޒު މިއަދު ވަނީ ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެމްއެންޕީގެ ރައީސް މުހައްމަދު ނާޒިމްގެ އިތުރުން އެމްޑީއޭގެ ލީޑަރު އަހުމަދު ސިޔާމް މުހައްމަދާ ވެސް ބައްދަލުކުރައްވައިފަ އެވެ. މި ބައްދަލުވުންތަކާ ގުޅޭ އެއްވެސް ތަފުސީލެއް ރައީސް އޮފީހުން މީޑިއާ އަށް ނުދެ އެވެ. އަދި އެ ބޭބޭފުޅުން ވެސް މާ ބޮޑު ތަފުސީލެއް ނުދެއްވަ އެވެ.