މަޖިލިސް އިންތިހާބަށް ފޯމު ބަލައިގަންނަ ދުވަހުން ފެށިގެން ސިވިލް ސާވެންޓުން މަގާމުން ވަކިވާނެ

ރައްޔިތުންގެ މަޖިލިސް އިންތިހާބުގައި ވާދަކުރާ ސިވިލް ސާވެންޓުން، އިލެކްޝަންސް ކޮމިޝަން (އީސީ) އަށް ފޯމު ހުށަހަޅައި އެ ފޯމު ބަލައިގަތުމާ އެކު އެ މީހަކު މަގާމުން ވަކިވާނެ ކަމަށް، ސިވިލް ސާވިސް ކޮމިޝަން (ސީއެސްސީ) އިން މިއަދު ބުނެފި އެވެ.

ރައްޔިތުންގެ މަޖިލީހާއި ރިޔާސީ އިންތިހާބު ބަލަނީ އާއްމު އިންތިހާބުގެ ގޮތުގަ އެވެ. އެހެންވެ، އެ ގާނޫނާއި ލޯކަލް ކައުންސިލް އިންތިހާބުގައި ވާދަކުރާ ކެންޑިޑޭޓުންނާ މެދު އަމަލުކުރާ ގޮތް ތަފާތެވެ.

ސީއެސްސީގެ ނައިބު ރައީސް އިބްރާހިމް ރަޝީދު "މިހާރު" އަށް ވިދާޅުވީ ސިވިލް ސާވިސް މުވައްޒަފަކު، މަޖިލީހުގެ އިންތިހާބުގައި ވާދަކުރަން އިލެކްޝަންސް އަށް ފޯމު ހުށަހަޅާ ދުވަހުން ފެށިގެން، އެ މުވައްޒަފަކު ވަޒީފާއިން އިސްތިއުފާ ދޭންޖެހޭނެ ކަމަށެވެ. އަދި އެ މަގާމުން ވަކިނުވެއްޖެ ނަމަ، ސީއެސްސީން އެ މީހަކު ވަކިކުރާނެ ކަމަށް އިބްރާހިމް ވިދާޅުވި އެވެ.

ނަމަވެސް، ސިވިލް ސާވިސްގެ ގާނޫނުގައި ބުނަނީ، އާއްމު އިންތިހާބެއްގައި ވާދަކުރާ ސިވިލް ސާވިސް މުވައްޒަފަކު، އެ އިންތިހާބެއް ބާއްވާ ތާރީހުގެ ހަ މަސް ދުވަސް ކުރިން އެ ވަޒީފާއިން އިސްތިއުފާ ދޭންޖެހޭނެ ކަމަށެވެ.

އެކަމަކު، 2009 ވަނަ އަހަރު ބޭއްވި މަޖިލިސް އިންތިހާބުގައި ވާދަކުރި ކެންޑިޑޭޓަކު އެ މައްސަލަ ހައި ކޯޓަށް ހުށަހެޅުމުން، އެ ކޯޓުން ވަނީ، އެއީ އިންތިހާބުތަކުގެ އެކި މަގާމުތަކަށް ކުރިމަތިލުމުގެ ހައްގާ ތައާރަޟްވާ ކަމެއް ކަމަށް ވާތީ އެ މާއްދާ ގާނޫނުއަސާސީއާ ހިލާފް ކަމަށް ކަނޑައަޅައިފަ އެވެ.

އެހެންވެ، ސިވިލް ސާވިސް ކޮމިޝަނުން ވަނީ ސިވިލް ސާވިސްގެ ގަވައިދު ވެސް މިދިޔަ އަހަރު އިސްލާހުކޮށްފަ އެވެ. އޭގައިވާ ގޮތުން، ސިވިލް ސާވެންޓު މަގާމުން ވަކިވާން ޖެހޭނީ ފޯމު ހުށަހަޅައި، އެ ފޯމު ބަލައިގަންނަ ދުވަހުން ފެށިގެންނެވެ.

އިބްރާހިމް ވިދާޅުވީ، ސިވިލް ސާވެންޓަކު މަޖިލިސް އިންތިހާބުގައި ވާދަކޮށް، ނާކާމިޔާބު ވިޔަސް އެ ވަޒީފާ އަލުން އިއާދަނުވާނެ ކަމަށެވެ. އެކަމަކު، އެހެން މަގާމުތަކަށް ކުރިމަތިލުމުގެ ހައްގު އޮންނާނެ ކަމަށް ވިދާޅުވި އެވެ.

އެކަމަކު، ކައުންސިލް އިންތިހާބުގައި ވާދަކުރާ ނަމަ އުސޫލު ތަފާތުވެ އެވެ. ކައުންސިލް އިންތިހާބުގައި ވާދަކުރުމަށް އިލެކްޝަންސް އަށް ފޯމު ހުށަހަޅައި، އެ ފޯމު ބަލައިގަންނަ ދުވަހުން ފެށިގެން އެ މީހަކު ހުންނާނީ ސަސްޕެންޝަނުގަ އެވެ. އަދި އިންތިހާބުން ބަލިވެއްޖެ ނަމަ، ދާއިމީ ނަތީޖާ އިއުލާންކުރުމުން ވަޒީފާއަށް ވަނުމުގެ ހުއްދަ ދޭނެ އެވެ.

އަންނަ އަހަރުގެ މަޖިލިސް އިންތިހާބު ބާއްވާނެ ސީދާ ތާރީހެއް އީސީން އަދި އިއުލާނެއް ނުކުރެ އެވެ. އެހެންވެ، އެ އިންތިހާބަށް ކުރިމަތިލާން އަދި އިއުލާން ނުކުރިޔަސް، ޕާޓީތަކުން އަންނަނީ އެތެރޭގެ އިންތިހާބުތަކަށް ތައްޔާރުވަމުންނެވެ.

އެ ކޮމިޝަނުން ބުނީ، އަންނަ ހަފުތާގައި އެޑްވައިޒަރީ ކޮމިޓީއަންނަ އަހަރުގެ ފުރަތަމަ ހަތަރު މަސް ދުވަހުގެ ތެރޭގައި މަޖިލިސް އިންތިހާބު ބާއްވާނެ އެވެ.