އިޓާލިއަން ސުޕަ ކަޕް މިއަހަރު ވެސް ސައުދީގެ ވެރިރަށް ރިޔާދްގައި

ރިޔާދް (ޖެނުއަރީ 2) - އިޓާލިއަން ސުޕަ ކަޕް މިއަހަރު ވެސް ސައުދީ އަރަބިއްޔާގެ ވެރިރަށް ރިޔާދުގައި ބާއްވަން ތައްޔާރު ވެއްޖެ އެވެ.

ދެ ޓީމު ވާދަކުރާ މުބާރާތް މި އަހަރުން ފެށިގެން ބާއްވަން ނަންމާފައި ވަނީ ހަތަރު ޓީމާ އެކު އެވެ. މިއަހަރުގެ މުބާރާތުގައި މިދިޔަ ސީޒަންގައި އިޓަލީ ލީގު ޗެމްޕިއަން ނަޕޯލީ އާއި ރަނަރަޕް ލާޒިއޯގެ އިތުރުން އިޓާލިއަން ކަޕްގެ ޗެމްޕިއިން އިންޓަ މިލާނާއި ރަނަރަޕް ފިއޮރެންޓީނާ ވާދަ ކުރާނެ އެވެ.

ޖެނުއަރީ 18 ވަނަ ދުވަހުގެ ރޭ ނަޕޯލީ އާއި ފިއޮރެންޓީނާ ބައްދަލުކުރާ ފުރަތަމަ ސެމީ ފައިނަލް މެޗަށް ފަހު، ޖެހިގެން އަންނަ ރޭ ދެވަނަ ސެމީގައި ވާދަކުރާނީ އިންޓަ މިލާނާއި ލާޒިއޯ އެވެ. އަދި ފައިނަލް މެޗު ކުޅޭނީ މިމަހުގެ 22 ވަނަ ދުވަހުގެ ރެއެވެ.

މިއީ މި މުބާރާތް ސައުދީ އަރަބިއްޔާގައި ބާއްވާ ހަތަރުވަނަ ފަހަރެވެ. އެންމެ ފުރަތަމަ 2018 ވަނަ އަހަރު ޖިއްދާގައި ބޭއްވި މުބާރާތުގެ ފައިނަލްގައި ޔުވެންޓަސް އިން ވަނީ އޭސީ މިލާން ބަލިކޮށްފަ އެވެ.

އެއަށް ފަހު 2019 ވަނަ އަހަރު ފުރަތަމަ ފަހަރަށް ރިޔާދުގައި ބޭއްވި މުބާރާތުގައި ލާޒިއޯ އިން ޔުވެންޓަސް ބަލިކުރި އިރު، މިދިޔަ އަހަރު ޖިއްދާގައި ކުޅުނު ފައިނަލްގައި އިންޓަ މިލާނުން ވަނީ އޭސީ މިލާން ބަލިކޮށްފަ އެވެ.

މި މުބާރާތް ސައުދީގައި ބާއްވަނީ، އެގައުމުގެ "ވިޝަން 2030" ގެ ލަނޑުދަނޑިތައް ހާސިލްކުރުމަށް އެގައުމުގެ ސްޕޯޓްސް މިނިސްޓްރީން އިންތިޒާމް ކުރާ ބައިނަލްއަގްވާމީ ޗެމްޕިއަންޝިޕްތަކާއި އިވެންޓްތަކުގެ ތެރޭގައި ހިމަނައިގެންނެވެ.