މޭޔަރުކަމަށް ޓެސްޓު ކޮށްލައްވާ، ރައްޔިތުން މާޔޫސްވިޔަ ނުދޭނަން: އާޒިމާ

މާލޭގެ މޭޔަރުގެ މަގާމު އޭނާ އަދާކުރައްވާ ގޮތް ބަލަން އިންތިހާބު ކޮށްދިނުމަށާއި އެ ހާލަތުގައި ރައްޔިތުން މާޔޫސްކޮށް ނުލައްވާނެ ކަމަށް ޕީއެންސީގެ ޓިކެޓުގައި އެ މަގާމަށް ވާދަކުރައްވާ ކުރީގެ ބަންޑާރަ ނައިބު އާއިޝަތު އާޒިމާ ޝަކޫރު މިއަދު ވިދާޅުވެއްޖެ އެވެ.

ރައީސް އަދި ޕީއެންސީގެ ރައީސް ޑރ. މުހައްމަދު މުއިއްޒާ އެކު، ހުޅުމާލެ 2 ގައި ބޭއްވި ކެމްޕެއިން ބައްދަލުވުމެއްގައި އާޒިމާ ވިދާޅުވީ، އަންނަ ހޮނިހިރު ދުވަހު ބާއްވާ މާލޭގެ މޭޔަރުގެ ގޮނޑި އަދި ކުރިއަށް އޮތް ރައްޔިތުން މަޖިލީހުގެ އިންތިހާބު އެ ޕާޓީ އަށް ލިބިގެން ނޫނީ ރައްޔިތުން ބޭނުންވާ ކަންކަން ކާމިޔާބު ނުވާނެ ކަމަށެވެ.

މޭޔަރުގެ މަގާމަށް އޭނާ އިންތިހާބު ކޮށްފި ނަމަ ރައްޔިތުން ބޭނުންވާ ކަންކަމުން ތަފާތު ފެންނާނެ ކަމަށް އާޒިމާ ވިދާޅުވި އެވެ. ދިރިއުޅުމުގެ ފެންވަރު އަދި އެންމެންގެ ރައްކާތެރިކަން ކަށަވަރު ކޮށްދެއްވާނެ ކަމުގެ ޔަގީންކަން ވެސް އާޒިމާ ދެއްވި އެވެ.

"މި މަސައްކަތުގައި އަޅުގަނޑުމެން ޓެސްޓު ކޮށްލަވާ. އަޅުގަނޑުމެންނެއް ޑރ. މުހައްމަދު މުއިއްޒާ އެކު މި ތިއްބެވި ޓީމެއް، ތި ބޭފުޅުން މާޔޫސްއެއް ނުކުރާނަން. އެއީ އަޅުގަނޑުމެން ކުރާނެ ކަމެއް ނޫން،" އާޒިމާ ވިދާޅުވި އެވެ.

ހުޅުމާލެ 2 އަކީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ވަރަށް ބޮޑަށް އިހުމާލުވެފައިވާ ތަނެއް ކަމަށާއި އެކަށީގެންވާ އަބާދީއަކަށް ދިރިއުޅުމަށް ދޭން ޖެހޭ ވަސީލަތްތައް ގާއިމް ވެފައި ނެތް ކަމަށް އާޒިމާ ވިދާޅުވި އެވެ.

"ފޭސް ދެއަކީ ކުރީގެ ސަރުކާރުން ވަރަށް ބޮޑަށް އިހުމާލުވެފައި އޮތް ތަނެއް. އަޅުގަނޑު މިއީ ވަރަށް ކްރިޓިސައިޒް ނުކުރާ މީހެއް، ތަންތަނަށް މިހެން އަރައި. އެހެން ނަމަވެސް އަޅުގަނޑަށް ފެންނަން އޮތް ވާހަކައެއް ވީމާ މި ދަންނަވާލީ،" އޭނާ ވިދާޅުވި އެވެ.

"އަޅުގަނޑު ވަރަށް ގިނަ ސަރުކާރުތަކުގައި މަސައްކަތް ކޮށްފައިވާ މީހަކަށް ވާތީ ވަރަށް ޔަގީން ކަމާ އެކު ދަންވަނަން ކެރިދާނެ، ކުރިއަށް މި އޮތް މޭޔަރު އިންތިހާބާއި މަޖިލިސް އިންތިހާބު ނެގިގެން ނޫނީ އެ މަސައްކަތް [ރައްޔިތުން ބޭނުންވާ ކަންކަން] ފުރިހަމަ ވެގެން ނުދާނެ."

އާޒިމާ ވިދާޅުވި ގޮތުގައި، ޕީއެންސީން ނުކުމެ ތިބީ ރައީސް ޑރ. މުއިއްޒުގެ "ވިޝަން" ކާމިޔާބު ކުުރުމަށެވެ. އެހެންވެ، މޭޔަރުގެ މަގާމަށް ދެން ވާދަ ކުރައްވާ ތިން ކެންޑިޑޭޓުންނަށް ވުރެ އޭނާގެ އަޒުމް ވެސް ވަރުގަދަ ކަމަށާއި ހިދުމަތްތެރި ބަޔަކު ގައުމާއި ހަވާލުވުމުން އަންނަ ބަދަލު ރައްޔިތުންނަށް ދައްކައިދޭނެ ކަމަށް ވިދާޅުވި އެވެ.