ސިޔާސީ ޕާޓީ އުފެއްދުމުގެ ހުއްދަ އެކަކަށް ވުރެ ގިނަ މީހުންނަށް ދޭ ގޮތަށް ހަދައިފި

ސިޔާސީ ޕާޓީ އުފެއްދުމުގެ ހޯދުމަށްޓަކައި އެކަކަށް ވުރެ ގިނަ މީހުންނަށް ވެސް ހުށަހެޅޭ ގޮތަށް ސިޔާސީ ޕާޓީގެ ގަވާއިދު އިސްލާހުކޮށްފި އެވެ.

އެ ގަވައިދުގައި މިހާތަނަށް އޮންނަ ގޮތުން ޕާޓީއެއް އުފެއްދުމުގެ ހުއްދަ ދޭނީ އެންމެ މީހަކަށެވެ.

އިލެކްޝަންސް ކޮމިޝަން (އީސީ) އިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ ނައިބު ރައީސް އިސްމާއީލް ހަބީބު ވިދާޅުވީ، އެއީ ގިނަ ބައެއްގެ ކަންބޮޑުވުމާ އެކު، އެ ކޮމިޝަނުން މަޝްވަރާކޮށްގެން ގެނެސްފައިވާ އިސްލާހެއް ކަމަށެވެ.

ސިޔާސީ ޕާޓީގެ ގަވާއިދަށް ގެނައި އާ އިސްލާހުގައި ވަނީ ޕާޓީ އުފެއްދުމުގެ ހުއްދަ އަށް އެދި އެކަކަށް ވުރެ ގިނަ މީހުންނަށް ހުށަހެޅިދާނެ ކަމަށެވެ. އެ ކަމަށް އެދި ހުށަހަޅާ ފޯމާ އެކު، ޕާޓީ އުފައްދަން ބޭނުންވާ މީހުންގެ އައިޑީ ކާޑުގެ ދެފުށުގެ ސާފު ކޮޕީއަކާއި ކުށުގެ ރިކޯޑު ފޯމު ހުށަހަޅަންޖެހޭނެ ކަމަށް ގަވައިދުގައި ވެ އެވެ.

ޕާޓީއެއް އުފެއްދުމުގެ ހުއްދަ އަށް އެދޭތާ ހަތް ދުވަހުގެ ތެރޭގައި އެ ހުއްދަ ލިޔުމުން ދޭން ޖެހޭނެ ކަމަށް ވެސް ގަވާއިދުގައި ބަޔާންކޮށްފައިވެ އެވެ.

ސިޔާސީ ޕާޓީއެއް އުފެއްދުމުގެ ހުއްދަ އީސީ އިން ދިނުމުން، ޕާޓީ ރަޖިސްޓަރީ ކޮށްދޭނީ މަދުވެގެން 3،000 މީހުންގެ ސޮޔާ އެކު ހުށަހެޅުމުންނެވެ. ދައުލަތުން ސިޔާސީ ޕާޓީތަކަށް ދޭ ފައިސާ ލިބޭނީ 10،000 މީހުން ހަމަވާ ޕާޓީތަކަށް އެކަންޏެވެ.