ރައީސް ޝީ، ރައީސް މުއިއްޒަށް ހޫނު މަރުހަބާއެއް ދަންނަވައިފި

ރައީސް ޑރ. މުހައްމަދު މުއިއްޒު ޗައިނާ އަށް ކުރައްވަމުން ގެންދަވާ ފުރަމާނަ ދަތުރުފުޅުގައި އެ ގައުމުގެ ރައީސް ޝީ ޖިންޕިން ރައީސް ޑރ. މުއިއްޒަށް މިއަދު ރަސްމީކޮށް މަރުހަބާ ދަންނަވައިފި އެވެ.

ޕީޕަލްސް ގްރޭޓް ހޯލަށް ރައީސް ޑރ. މުއިއްޒު ވަޑައިގަތުމުން އިސްވެ އެ މަނިކުފާނަށް ރަތްދޫލައިގެ ހޫނު މަރުހަބާއެއް ދެންނެވީ ރައީސް ޝީ އެވެ.

ރައީސް ޑރ. މުއިއްޒުގެ ޝަރަފުގައި އޮނަގާޑެއް އިންސްޕެކްޓް ކުރުން އޮތެވެ. އަދި ދެ ގައުމުގެ ގައުމީ ދިދަ ހިފައިގެން ތިބި ކުދިންތަކެއް ރައީސް ޑރ. މުއިއްޒަށް މަރުހަބާ ކިޔެވެ.

އޭގެ ފަހުން ދެ ގައުމުގެ ރަސްމީ ވާހަކަތައް ވަނީ ބާއްވައިފަ އެވެ.

މިއީ މިދިޔަ އަހަރުގެ ނޮވެމްބަރު 17 މަގާމާ ހަވާލުވެވަޑައިގެންނެވި ފަހުން ރައީސް މުއިއްޒު ޗައިނާ އަށް ކުރައްވާ ފުރަތަމަ ފުރަމާނަ ދަތުރުފުޅެވެ. އަދި މިއީ ޗައިނާ އަށް ވެސް ގައުމެއްގެ އެންމެ އިސްވެރިއަކު މި އަހަރު ކުރައްވާ ފުރަތަމަ ފުރަމާނަ ދަތުރުފުޅެވެ.

ރައީސް ޝީގެ ދައުވަތަކަށް ރައީސް މުއިއްޒު ޗައިނާ އަށް ވަޑައިގަތީ މިދިޔަ ހޯމަ ދުވަހު އެވެ. ފުރަތަމަ ދެ ދުވަހު ފުޖިއާން ޕްރޮވިންސްގައި ހޭދަކުރެއްވައި ބައެއް ރަސްމީ ބައްދަލުވުންތައް ބޭއްވެވި އެވެ. ބެއިޖިން އަށް ވަޑައިގަތީ ރޭގަ އެވެ.