120،000 ޓަނުގެ މުދާ ހޭންޑަލްކުރެވޭ ވީއައިއޭ އާ ކާގޯ ޓާމިނަލް ހުޅުވައިފި

އަހަރަކު 120،000 ޓަނުގެ މުދާ ހޭންޑަލް ކުރެވޭ ގޮތަށް ވެލާނާ އިންޓަނޭޝަނަލް އެއާޕޯޓުގައި ތަރައްގީކުރި އާ ކާގޯ ޓާމިނަލް މިއަދު ހުޅުވައިފި އެވެ.

ވެލާނާ އިންޓަނޭޝަނަލް އެއާޕޯޓުގައި މިއަދު ހަވީރު ބޭއްވި ރަސްމިއްޔާތެއްގައި މި ޓާމިނަލް ހުޅުވައިދެއްވީ ރައީސް ޑރ. މުހައްމަދު މުއިއްޒެވެ.

މި ޓާމިނަލަކީ އެއާޕޯޓު ބޮޑުކުރުމަށް 2018 ވަނަ އަހަރު ފެށި މަޝްރޫއުގެ ދަށުން އިމާރާތްކުރެވުނު ތަނެކެވެ. މި ޓާމިނަލް ތަރައްގީކުރަން ފެށީ ކާގޯގެ އަދަދު އެތައް ގުނައެއް އިތުރުވެ، ޓާމިނަލް ކުޑަވެގެން ދިމާވާ ދަތިތައް ހައްލު ކުރުމަށެވެ.

އާ ކާގޯ ޓާމިނަލް ހުޅުވުމުގެ ރަސްމިއްޔާތުގައި ކާގޯ ހިދުމަތް ދެމުން އަންނަ އެމްއޭސީއެލްގެ އެމްޑީ އިބްރާހިމް ޝަރީފް މުހައްމަދު ވިދާޅުވީ، ވީއައޭގެ ކުރީގެ ކާގޯ ޓާމިނަލްގެ ކެޕޭސިޓީއަކީ 50،000 ޓަނު ނަމަވެސް އޯވާ ކެޕޭސިޓީގައި 75،000 ޓަނާ ހަމައަށް މަސައްކަތް ކޮށްފައިވާ ކަމަށެވެ.

މީގެ ކުރިން ބޭނުން ކުރި އިމާރާތަކީ 40 އަހަރަށް ވުރެ ގިނަ ދުވަސްވެފައިވާ ތަނެއް ކަމަށާއި އޭގެ ސަބަބުން ކަސްޓަމަރުންގެ މުދާ އެންމެ އެކަށީގެންވާ ގޮތެއްގައި ނުބެލެއްޓޭ ކަމަށް ވެސް އޭނާ ވިދާޅުވި އެވެ.

މި އިމާރާތް 2022 ވަނަ އަހަރު ނިމުނު ނަމަވެސް، އޭނާ ވިދާޅުވި ގޮތުގައި، އެ ތަނުން ހިދުމަތް ފެށުމަށް މާ ބޮޑު އިސްކަމެއް މީގެ ކުރިން ދީފައި ނުވެ އެވެ. އޭނާ ވަނީ މި ތަން ބޭނުން ކުރަން ފެށުމަށް ރައީސް މުއިއްޒު ދެއްވި އެއްބާރުލުމަށް ޝުކުރު އަދާކުރައްވައިފަ އެވެ.

އަލަށް ހުޅުވި ކާގޯ ޓާމިނަލްގައި މުވައްޒަފުންނާއި ކާގޯގެ ހިދުމަތް ހޯދާ ފަރާތްތަކަށް ހާއްސަކޮށް ތިން ބުރީގެ އޮފީސް އިމާރާތެއް ހަދާފައިވާއިރު، މި ތަނުގައި އެއާލައިން ކާގޯ އަދި ކާގޯ ބްރޯކަރުނަށް ހާއްސަ 55 އޮފީސް ވަނީ ގާއިމް ކޮށްފަ އެވެ.