"އަނގަ ބަންދުކުރާ" ބިލް ލަންކާގައި ފާސްކޮށްފި

ސްރީ ލަންކާގައި ސޯޝަލް މީޑިއާގައި ސަރުކާރަށް ފާޑުކިޔާ މީހުންގެ އަނގަ ބަންދުކުރުމަށް ހުށަހެޅި ބިލެއްގެ ގޮތުގައި އިދިކޮޅު ފަރާތްތަކުން ތުހުމަތުކުރާ "އޮންލައިން ސޭފްޓީ ބިލް" އިއްޔެ ފާސްކޮށްފި އެވެ.

ރައީސް ރަނިލް ވިކްރެމަސިންހާގެ އަޣުލަބިއްޔަތު އޮތް މަޖިލީހުން މި ބިލް ފާސްކުރީ މީގައި ހުރި އެތައް ކަމެއް ގާނޫނުއަސާސީއާ ހިލާފް ކަމަށް އިދިކޮޅު ފަރާތްތަކުން ބުނަމުން ދަނިކޮށެވެ. އެކަމަކު ސަރުކާރުގެ މެންބަރުން ވަނީ ބިލްގައި ގާނޫނުއަސާސީއާ ހިލާފް އެއްވެސް ކަމެއް ނެތް ކަމަށާއި މިއީ ބަންޑާރަ ނައިބުގެ ރުހުން ލިިބިފައިވާ ބިލެއް ކަމަށް ބުނެފަ އެވެ.

މި ބިލްގައި ބުނާ ގޮތުން ފޭސްބުކް، ގޫގުލް އަދި އެކްސް ފަދަ ޕްލެޓްފޯމްތަކުން އޭގައި ހުންނަ، މި ބިލާ ހިލާފް ކޮންޓެންޓަށް ޒިންމާވާން ޖެހޭނެ އެވެ. އެނޮނިމަސް އަދި ޕެރޮޑީ އެކައުންޓުތައް ވެސް މި ގާނޫނުގެ ދަށުން މަނާވާނެ އެވެ.

ގައުމީ ސަލާމަތަށް ގެއްލުން ހުރި އަދި ނުރައްކާވެދާނެ ކަމަށް ސަރުކާރަށް ގަބޫލުކުރެވޭ ކޮންމެ ކޮންޓެންޓަކަށް ސޯޝަލް މީޑިއާ ކުންފުނިތަކުން ޒިންމާވާން ޖެހޭ އިރު އެޕަލް، ގޫގުލް، ޔަހޫ، މެޓަ އަދި އެކްސް ވެސް ހިމެނޭ އޭޝިއާ އިންޓަނެޓް ކޯލިޝަނުން ވަނީ މިހާރު އޮތް ގޮތުން މިއީ އަމަލުކުރެވޭނެ އެއްޗަކަށް ނުވާނެ ކަމަށެވެ.

"މި ބިލް ވަރަށް ބޮޑަށް ބަދަލުކޮށްގެން ނޫނީ މިއީ އަމަލުކުރެވޭ ވަރުގެ ބިލަކަށް ނުވާނެ،" ކޯލިޝަނުން ސަރުކާރަށް ފޮނުވި ސިޓީއެއްގައި ބުނެފައިވެ އެވެ.

އިދިކޮޅު މެންބަރުން ބުނެފައިވަނީ އިންޓަނެޓް އަދި ސޯޝަލް މީޑިއާ ކުންފުނިތަކުން ދެއްކި އެއްވެސް ވާހަކައަކަށް ވެސް ސަރުކާރުން އަޅާނުލި ކަމަށެވެ.