ކަނޑުގެ މައްސަލަ ދިރާސާކުރަން މުނައްވަރާއި ބޭރުގެ ވަކީލުންގެ ޓީމެއް އައްޔަންކޮށްފި

ރާއްޖެ އާއި މޮރިޝަސްއާ ދެމެދު އޮތް ކަނޑުގެ ސަރަހައްދުގެ މައްސަލާގައި ކަނޑުތަކާ ބެހޭ ބައިނަލްއަގްވާމީ ޓްރައިބިއުނަލުން ނިންމި ނިންމުން ދިރާސާ ކުރުމަށް ކުރީގެ ބަންޑާރަ ނައިބު ޑރ. މުހައްމަދު މުނައްވަރާއި ރާއްޖެއިން ބޭރުގެ ވަކީލުންގެ ޓީމެއް ސަރުކާރުން އައްޔަންކޮށްފި އެވެ.

ކަނޑުތަކާބެހޭ ޓްރައިބިއުނަލަށް މޮރިޝަސްއިން ރާއްޖެއާ ދެކޮޅަށް ހުށަހެޅި މައްސަލާގައި އެ ޓްރައިބިއުނަލުން މިދިޔަ އަހަރު ވަނީ ރާއްޖެ އަށް ބޮޑު ސަރަހައްދެއް ލިބޭ ގޮތަށް މައްސަލަ ނިންމައިފަ އެވެ. ނަމަވެސް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އެ މައްސަލާގައި އަމަލުކުރި ގޮތުގެ ސަބަބުން ރާއްޖޭގެ ކަނޑުގެ ސަރަހައްދުން ބައެއް ގެއްލިފައިވާ ކަމަށް ބުނެ އެ ބައި އަނބުރާ ހޯދުމަކީ މި ސަރުކާރުގެ ވައުދެކެވެ. އެހެންވެ، އެ މަސައްކަތް ސަރުކާރުން ދަނީ ކުރަމުންނެވެ.

އެޓާނީ ޖެނެރަލްގެ އޮފީހުން މިއަދު ނެރުނު ބަޔާނެއްގައި ވަނީ ކަނޑުތަކާ ބެހޭ ގާނޫނީ މާހިރެއްގެ ހައިސިއްޔަތުން ޑރ. މުނައްވަރުގެ ގާނޫނީ ލަފާ ހޯއްދެވުމަށް އެޓާނީ ޖެނެރަލް އަހުމަދު އުޝާމް ނިންމަވާފައިވާ ކަމަށާއި އެ މަސައްކަތް މުނައްވަރު މިހާރު ފަށްޓަވާފައިވާ ކަމަށެވެ.

އެ ބަޔާނުގައިވާ ގޮތުން، މުނައްވަރުގެ އިތުރުން އިނގިރޭސި ވިލާތުގެ ގާނޫނީ މާހިރަަކާއި މޯލްޓާގެ ގާނޫނީ ބޭފުޅަކު ވެސް އެ މައްސަލަ ދިރާސާ ކުރުމަށް ސަރުކާރުން މިހާރު ވަނީ އައްޔަންކޮށްފަ އެވެ. ކަނޑުތަކާބެހޭ ޓްރައިބިއުނަލްގައި ކުރީގެ ސަރުކާރުން އަމަލުކުރި ގޮތާއި އެ މައްސަލާގައި ރާއްޖެ އަށް ނެގެން ހުރި ދިފާއުތަކާއި މޮރިޝަސްގެ ބޮޑުވަޒީރަށް ކުރީގެ ރައީސް އިބްރާހިމް މުހައްމަދު ސޯލިހު ފޮނުއްވި ސިޓީފުޅާއި ދެން އެ މައްސަލާގައި އަމަލު ކުރެވެން ހުރި ގޮތްތައް ވަކީލުން ޓީމުން ބަލާނެ ކަމަށް އޭޖީ އޮފީހުގެ ބަޔާނުގައި ވެ އެވެ.

އޭޖީ އޮފީހުން ވަނީ އެ މަސައްކަތް ނިންމުމަށް ފަހު، އަންނަ މަހުގެ ކުރީކޮޅު އެ ފަރާތްތަކުގެ ގާނޫނީ ލަފާ ސަރުކާރަށް ލިބޭނެ ކަމަށެވެ. ލަފާ ލިބުމުން އެކަމުގައި ދެން އަމަލު ކުރަންވީ ގޮތެއް ނިންމުމަށް ކެބިނެޓަށް ހުށަހަޅާނެ ކަމަށް ވެސް އެ ބަޔާނުގައި ވެ އެވެ.

އެ ބަޔާނުގައިވާ ގޮތުން، ގާނޫނީ މާހިރުން ރިޕޯޓް ލިބުމުން އެ ރިޕޯޓް ރައީސް ޑރ. މުއިއްޒާއި ރައްޔިތުންގެ މަޖިލީހަށް ފޮނުވުމުގެ އިތުރުން އާންމުންނަށް ފެންނާނެ ގޮތަށް އާންމު ކުރާނެ އެވެ. އެ ރިޕޯޓް އާންމު ކުރާއިރު އެކަމަށް ހިނގި ހަރަދުތައް ވެސް އާންމު ކުރާނެ ކަމަށް އެ ބަޔާނުގައިވެ އެވެ.