އައްޑޫ ބްރިޖުގެ ސަބަބުން ނޭޗާ ޕާކަށް ގެއްލުންވާނެތީ އިކޯކެއާގެ ކަންބޮޑުވުން

އައްޑޫގެ ހިތަދޫ-ހުޅުމީދޫ ގުޅުވާލާ ބްރިޖުގެ ސަބަބުން، ހިމާޔަތްކޮށްފައިވާ އައްޑޫގެ ނޭޗަ ޕާކަށް ގެއްލުން ލިބޭނެ ކަމަށް ލަފާކޮށް އިކޯކެއާ މޯލްޑިވްސް އިން މިއަދު ކަންބޮޑުވުން ފާޅުކޮށްފި އެވެ.

އެ ޖަމިއްޔާއިން ނެރުނު ބަޔާނުގައި ބުނީ އެންމެ ބޮޑަށް ސަމާލުކަން ދެނީ އެ ސަރަޙައްދުގެ ނާޒުކުކަން ބެލެންސްކުރުމަށް ކަމަށެވެ. އެހެންވެ، ދެ ރަށް ގުޅުވާލާ ބްރިޖުން ބޮޑު ގެއްލުމެއް ލިބޭނެތީ ދެ ވަނަ ވިސްނުމަކަށް ދިއުމަށް ވަނީ ގޮވާލައިފަ އެވެ.

އިކޯކެއާ އިން ވަނީ ބްރިޖުގެ ބަދަލުގައި ރަނގަޅު ފެރީ ނިޒާމެއް ތައާރަފްކުރަން ގޮވާލައިފަ އެވެ. އޭގެ ސަބަބުން ބްރިޖުގެ ސަބަބުން ތިމާވެއްޓަށް ލިބޭ ގެއްލުމުން ސަލާމަތްވާނެކަން ފާހަގަކުރި އެވެ.

"ކަނެކްޓިވިޓީގެ ބޭނުންތެރިކަން ދެނެގަނެ ބްރިޖެއް ކޮންމެހެން ބޭނުންވާކަމަށް ދެކޭ ނަމަ ގަމު މަގުން ހުޅުމީދޫއާ ގުޅާލުމަށް އަޅުގަނޑުމެން ހުށަހަޅަން. ހިތަދޫ ހިމާޔަތްކޮށްފައިވާ ސަރަހައްދަށް ތިމާވެއްޓަށް ކުރާ ނޭދެވޭ އަސަރުތައް ކުޑަކުރެވޭނީ، ތިމާވެށި ހިމާޔަތްކުރުމުގެ ހަރުދަނާ ފިޔަވަޅުތަކާއި ތިމާވެށީގެ ރައްކާތެރިކަމުގެ ފިޔަވަޅުތައް އަޅައިގެން." ބަޔާނުގައި ބުންޏެވެ.

ޖަމިއްޔާއިން އެދުނީ ތިމާވެށީގެ ރައްކާތެރިކަމަށް އަހައްމިއްޔަތުކަން ދީ، ކަންކަން ނިންމާއިރު އާއްމުންނާއި ތިމާވެށީގެ ތަޖުރިބާކާރުން އަދި ކަމާގުޅޭ ފަރާތްތަކާ ގޮތް ނިންމާ މަރުހަލާގައި ބައިވެރިކުރުމަށެވެ. އޭރުން، ތަރައްގީއާ ގުޅޭ ކަންކަން ކުރަމުން އަންނަނީ ޒިންމާދާރު ގޮތެއްގައިކަން ކަށަވަރުކުރެވި ތިމާވެއްޓަށް ގެއްލުން ލިބުމުން މަދުކުރެވިގެންދާނެ ކަމަށް ބުންޏެވެ.

ބްރިޖް މަޝްރޫއުގެ ސަބަބުން ލިބިދާނެ ގެއްލުންތަކަށް ފަރުވާތެރިކަމާ އެކު ވިސްނައި، ހިތަދޫ ހިމާޔަތްކޮށްފައިވާ ސަރަހައްދަށް ލިބޭ ގެއްލުން ކުޑަކުރެވޭނެ އެހެން ހައްލުތަކެއް ހޯދުމަށް ކަމާ ބެހޭ އެންމެހާ އިދާރާތަކަށް އިކޯކެއާ އިން ވަނީ ގޮވާލައިފަ އެވެ.

ރައީސް ޑރ. މުހައްމަދު މުއިއްޒުގެ ވައުދުތަކުގެ ތެރޭގައި ހިމެނޭ އައްޑޫ ބްރިޖުގެ ސާވޭ ހެދުމަށް މި އަހަރުގެ ބަޖެޓުން 30 މިލިއަން ރުފިޔާ ހިމަނާފައިވެ އެވެ.

އައްޑޫ ބްރިޖުގެ މަސައްކަތް ކޮށްދިނުމަށް މިސްރުގެ "ދަ އަރަބް ކޮންޓްރެކްޓާސް" ކުންފުނިން ޝައުގުވެރިކަން ފާޅުކޮށްފައިވާ ކަމަށް ރައީސް އޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް މި ފަހުން ވަނީ ވިދާޅުވެފަ އެވެ. އޭގެ އިތުރުން، ރައީސް ޗައިނާއަށް ކުރެއްވި ދަތުރުފުޅުގައި އެ ގައުމުގެ އިންވެސްޓަރުންނަށް ޕްރޮޕޯސަލް ހުށަހަޅަން ހުޅުވާލި މަޝްރޫއުތަކުގެ ތެރޭގައި ވެސް އައްޑޫ ބްރިޖު ހިމެނެ އެވެ. އެކަމަށް ޗައިނާގެ ކުންފުންޏަކުން ޝައުގުވެރިކަން ފާޅުކުރި ކަމަށް ވެސް ސަރުކާރުން ބުންޏެވެ.