ތިލަފުށި 2 ގެ 120 ހެކްޓަރުގެ ބިން ހިއްކައިފި

ތިލަފުށީގެ ދެވަނަ ފިޔަވަހީގެ 120 ހެކްޓަރުގެ ބިން ހިއްކައި ނިމިފައިވާ ކަމަށް އެޗްޑީސީ އިން މިއަދު ބުނެފި އެވެ.

އެ ކުންފުނީގެ ނޫސްބަޔާނެއްގައި ބުނީ ތިލަފުށީގެ ދެވަނަ ފިޔަވަހީގެ "އޭރިއާ ބީ"، "އޭރިއާ އޭ"، "އޭރިއާ އީ" އަދި "އޭރިއާ އެފް" ހިއްކުމުގެ މަސައްކަތް މިހާރު ނިމިފައިވާ ކަމަށެވެ. އެއީ 120 ހެކްޓަރުގެ ބިމެވެ.

މިހާރު ކުރިއަށް ދަނީ "އޭރިއާ އީ" އިން ހިއްކި ސަރަހައްދު ލެވެލް ކުރުމުގެ މަސައްކަތް ކަމަށް ވެސް އެޗްޑީސީން ބުންޏެވެ.

ތިލަފުށީގެ ދެވަނަ ފިޔަވަހީގެ ގޮތުގައި ހިއްކަނީ 151 ހެކްޓަރުގެ ސަރަހައްދެކެވެ.

މާލެ ސަރަހައްދުގެ އިންޑަސްޓްރިއަލް ހަބްގެ ގޮތުގައި ތަރައްގީކުރަން ނިންމާފައިވާ ތިލަފުށީގެ ދެވަނަ ފިޔަވަހި ހިއްކުމުގެ އަމަލީ މަސައްކަތް ފެށީ މިދިޔަ އަހަރުގެ މާޗު މަހުގަ އެވެ.

ތިލަފުށި ހިއްކުމުގެ މަސައްކަތް ހަވާލުކޮށްފައި ވަނީ ސިނަމާލެ ބްރިޖުގެ މެއިންޓަނަންސްގެ މަސައްކަތްކުރާ ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ)އާ އެވެ.

ސީއެޗްއީސީއާ އެކު އެކަމުގެ އެއްބަސްވުމުގައި ސޮއިކުރީ 2022 ވަަނަ އަހަރުގެ ޑިސެމްބަރު 15 ގަ އެވެ. އެ މަސައްކަތް ހަވާލުކުރީ ދެ އަހަރު ދުވަހުގެ ތެރޭގައި ނިންމާލަން ޖެހޭ ގޮތަށެވެ.

އެ ކުންފުންޏަކީ ސިނަމާލެ ބްރިޖު ހެދި ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ (ސީސީސީސީ)ގެ ސަބްސިޑަރީ ކުންފުންޏެކެވެ. މާލެ އާއި ހުޅުމާލޭގެ ފެނުގެ ނިޒާމު ބްރިޖު މެދުވެރިކޮށް ގުޅާލުމުގެ މަސައްކަތް ވެސް ހަވާލުކުރީ އެ ކުންފުންޏާ އެވެ.

ސަރުކާރުން ކުރިން ބުނެފައިވާ ގޮތުގައި، ތިލަފުށީ ތަރައްގީގެ ޕްލޭނަކީ މާލޭ ސަރަހައްދުގެ ތަރައްގީގެ ޕްލޭނާއި ތިލަމާލެ ބްރިޖު ޕްރޮޖެކްޓާ ވެސް އެކީ ކުރިއަށް ގެންދާ ބޮޑު މަޝްރޫއެކެވެ.