ވިކްޓަރީ އެއްވަނަ ޑިވިޝަނަށް، ހިދުމަތެއް ކޮށްދެވުނުކަމުގެ އިހްސާސް ކުރެވޭ: އުމޭރު

ވިކްޓަރީ އަލުން ފުރަތަމަ ޑިވިޝަނަށް ޕްރޮމޯޓްކޮށްދެވުން، އެއީ އެ ކްލަބަށް ކޮށްދެވުނު ބޮޑު ހިދުމަތެއްކަމުގެ އިހްސާސް ކުރެވޭކަމަށް ފޯވާޑް މުހައްމަދު އުމޭރު ބުނެފި އެވެ.

ވާދަވެރި ނިއު ރޭޑިއަންޓްގެ މައްޗަށް އިއްޔެ ކާމިޔާބު ހޯދައި، ވިކްޓަރީން ވަނީ އަންނަ ސީޒަނުގެ ފުރަތަމަ ޑިވިޝަނުން ޖާގަ ކަށަވަރުކޮށްފަ އެވެ.

ވިކްޓަރީގެ އެ ކާމިޔާބުގައި އެންމެ މުހިންމު ހިއްސާއެއްވި ކުޅުންތެރިޔަކީ އެ ކްލަބުން ސީނިއާ ކެރިއާ ފެށި އުމޭރު އެވެ.

"އުމޭރު އުމޭރަށް ހަދައި ދިނީ ވިކްޓަރީ. ސްކޫލް ނިމުނުތަނުން އުމުރުން 17 އަހަރުގައި ވިކްޓަރީއަށް ކުޅެން އަޅުގަނޑަށް ފުރުސަތު ދީފި،" އިއްޔެގެ ކާމިޔާބަށް ފަހު "މިހާރު" އަށް އުމޭރު ބުންޏެވެ.

"މިހާރު އަޅުގަނޑު ވެސް ކެރިއާގެ ފަހުކޮޅަށް މިހުރީ އައިސްފަ. މި ކްލަބް އަލުން ފަސްޓް ޑިވިޝަނަށް ޕްރޮމޯޓްކޮށްދޭން އެހީތެރި ވެވުނީމަ ކްލަބަށް ބޮޑު ހިދުމަތެއް ކޮށްދެވުނު ކަމުގެ އިހްސާސް ކުރެވޭ."

އޭނާ ބުނީ ކްލަބްގެ މިހާރުގެ މެނޭޖުމެންޓުން އޭނާ އަށް ސޮއި ކުރަން ހުށަހެޅި ހިސާބުން ވެސް ވިކްޓަރީ އަށް އެކަން ކޮށްދޭން އަޒުމު ކަނޑައެޅި ކަމަށެވެ.

"އަޅުގަނޑުގެ ކެރިއާގައި އެހާ މުހިންމު ސަޕޯޓެއް ދިން ކްލަބަކަށް ވާތީ އަނެއްކާވެސް ވިކްޓަރީއަށް ކުޅެން މެނޭޖްމެންޓުން ހުށަހެޅީމަ އަޅުގަނޑު ހިތައް އެރި މިފަހަރު އެއްވަނަ ޑިވިޝަނަށް ޓީމު ޕްރޮމޯޓްކޮށްދޭނަމޭ. އެކަން ކޮށްދެވިއްޖެ މިއީ ކްލަބް ފުޓްބޯޅައިގައި ވަރަށް ބޮޑު ހިތްހަމަޖެހުމެއް ލިބުނު ދުވަހެއް،" މައުރޫފް އަހްމަދު (މާއްޓޭ) ގެ ކޯޗުކަމުގެ ދަށުން 2006 ގައި ވިކްޓަރީން ސީނިއާ ކެރިއާ ފެށި އުމޭރު ބުންޏެވެ.

އޭނާ ބުނީ އަންނަ ސީޒަނުގައި ވެސް ވިކްޓަރީން ފެނުމުގެ ފުރުސަތު ބޮޑު ކަމަށެވެ.

"ކްލަބުން ބޭނުންވާ ކަމަށްވާނަމަ އެ ކޮމިޓްމެންޓް ދީފަ އިންނާނީ،" އުމޭރު ބުންޏެވެ.

މިދިޔަ ސީޒަނުގެ ދެވަނަ ޑިވިޝަން މުބާރާތުން ވެސް ވިކްޓަރީން ވަނީ އެއްވަނަ ޑިވިޝަނަށް އެރުމަށް މަސައްކަތްކޮށްފަ އެވެ. އެކަމަކު އެފަހަރު ވެސް ބޮޑު ހަރަދު ކުރި ނަމަވެސް އެ ޓީމަށް ގުރޫޕް ސްޓޭޖަށް ވުރެ ދުރަކަށް ނުދެވުނެވެ.

އެފްއޭއެމުން މި އަހަރު ނިންމާފައި އޮތީ ދެވަނަ ޑިވިޝަނުގެ ފައިނަލަށް ދާ ދެ ޓީމު އެއްވަނަ ޑިވިޝަނަށް ޕްރޮމޯޓްވާ ގޮތަށެވެ. ފައިނަލުގައި ވިކްޓަރީއާ ދެކޮޅަށް ނުކުންނާނީ ފުރަތަމަ ސެމީ ފައިނަލުގައި ޓެންޓް ބަލިކޮށް ފައިނަލުން ޖާގަ ހޯދި މަސްއޮޑި އެވެ. އެ މެޗު އޮންނާނީ އަންނަ ހުކުރު ދުވަހު އެވެ.