ޑޮލަރުގެ މައްސަލަ ދެތިން މަސް ތެރޭ ހައްލުވާނެ: އިކޮނޮމިކް މިނިސްޓަރު

ރާއްޖެ އަށް ދިމާވެފައިވާ ޑޮލަރުގެ މައްސަލަ ކުރިއަށް އޮތް ދެތިން މަސް ތެރޭގައި ހައްލުވާނެ ކަމުގެ ފުރިހަމަ ޔަގީންކަން އެބައޮތް ކަމަށް އިކޮނޮމިކް މިނިސްޓަރު މުހަންމަދު ސައީދު ވިދާޅުވެއްޖެ އެވެ.

ދުބާއީގައި މިއަދު ފަށާ ރާއްޖޭގެ އިންވެސްޓްމަންޓް ފޯރަމްގެ ކުރިން ނޫސްވެރިންނާ ވާހަކަ ދައްކަވަމުން އޭނާ ވިދާޅުވީ ޑޮލަރުގެ ތާށިކަން ކުރިމަތިވުމުގައި ދެކަމެއް ދިމާވެގެން އުޅޭ ކަމަށެވެ.

"ޑޮލަރުގެ މި ހާލަތު މި އައީ، އަޅުގަނޑުމެން [ވެރިކަމަށް] އައިއިރު ސޮވެރިން ޑިވެލޮޕްމަންޓް ފަންޑަށް ޖަމާކުރަމުން އައި ފައިސާތަކެއް ވެސް ނިމިދިޔަ ސަރުކާރުން ވަނީ އެއްކޮށް ހުސްކޮށްފައި. އޭގައި ހުރި ފައިސާތަކެއް ވެސް ހުރީ ނަގާފައި. އެއީ އަޅުގަނޑުމެން ޑެޓް ރީޕޭމަންޓަށް ކަލެކްޓް ކުރަމުން އައި ފައިސާތަކެއް. ޑެޓެއް މި ކްރިއޭޓް ކުރީ އެއާޕޯޓް ވެސް ނުނިމި ވެސް ހުރީ،" ސައީދު ވިދާޅުވި އެވެ.

"އަނެއްކޮޅުން ތެލުގެ އަގަށް އައި ބަދަލުތަކާ ވެސް އެކު ޑޮލަރަށް އޮންނަ ނީޑް އިތުރުވުމާއި އޭގެ ސެކިއުރިޓީ ވެސް މުހިންމުވެގެން މިއުޅެނީ. އެހެންވެ، މިހާރު މި އުޅޭ އިޝޫއަކީ ބްލެކް މާކެޓެއް އޮވެފައި އެ މާކެޓަށް ވިޔަފާރިތަކެއް ބަރޯސާވެގެން އުޅޭ މައްސަލަ."

ބޭނުންވާ ވަރަށް ޑޮލަރު ނުލިބުމާއި ޑޮލަރުގެ އަގު ބޮޑުވުމުގެ މައްސަލަ ހައްލު ނުވެ އޮންނަތާ މިހާރު އެތައް އަހަރެއް ވެއްޖެ އެވެ. ރާއްޖޭގައި މިހާރު ވެސް ޑޮލަރު ލިބެނީ ބްލެކް މާކެޓުން، ރަސްމީ ރޭޓަށް ވުރެ ދެ ރުފިޔާ ވަރު ބޮޑުކޮށެވެ.

"އެ މައްސަލަ އަޅުގަނޑުމެން ހައްލުކޮށް ކުރިއަށް އޮތް ދެތިން މަސްް ތެރޭގައި ހައްލަކަށް އެޅިގެންދާނެ. އެއީ އަޅުގަނޑުމެންގެ އަމާޒަކީ،" ސައީދު ވިދާޅުވި އެވެ.

ވޭތުވެދިޔަ ދޮޅު މަހެއްހާ ދުވަހުގެ ތެރޭގައި ރާއްޖެ އަށް އައި ޓޫރިސްޓުންގެ އަދަދު ވަރަށް ބޮޑަށް އިތުރުވަމުން އަންނަ ކަމަށް ވިދާޅުވެ، ސައީދު ވިދާޅުވީ އިގްތިސާދީ ހަރަކާތްތައް ފަށައިގަންނަން މިހާރު ބިންގާ އެޅިއްޖެ ކަމަށެވެ.

"ދެން އޮތީ މަސައްކަތް ފަށައިގަތުން،" ސައީދު ވިދާޅުވި އެވެ.

"ރާއްޖޭގެ އިގްތިސާދީ ހާލަތު އައިއެމްއެފް އިން ވެސް ލަފާ ކުރާ ގޮތުގައި 5.5 ޕަސެންޓުގައި ކުރިއެރުން ލިބޭނެ. މިވީ ދޮޅު މަހުގެ ތެރޭގައި ވެސް އެރައިވަލްސް ވަރަށް ރަނގަޅު ބަރަށް ބޮޑަށް އިތުރުވަމުން މި ދަނީ. އެއާ ގުޅިގެން އަނެއްކޮޅުން ވަށައިގެން ހުރި އިގްތިސާދީ ހަރަކާތްތައް ވެސް ފުލް ސްޕީޑްގައި ކުރިއަށް ދާނެ."

ސައީދު ވިދާޅުވީ ސަރުކާރާ ހަވާލުވި އިރު ހަތް ބިލިއަން ރުފިޔާގެ ދަރަނި އެކި ވިޔަފާރިތަކަށް ނުދެއްކި އޮތް ކަމަށާއި އޭގެ ތެރެއިން 50 ޕަސެންޓަށް ވުރެ ބޮޑު އަދަދެއް މިހާރު ކުޑަކުރެވިފައިވާ ކަމަށެވެ.

"އޭގެ އިތުރުން މިސް މެނޭޖްވެފައި ހުރި ވަރަށް ގިނަ ކަންތައްތައް ޓްރެކަށް އަޅުވަމުން މިދަނީ. ކުރަން ބޭނުންވާ ހުރިހާ ކަމެއްގެ ގްރައުންޑް ވޯކް މި ހުރީ ނިމި ބިންގާ އަޅައި ނިމިފައި. ދެން އަޅުގަނޑުމެންނަށް އޮތީ މަސައްކަތް ކުރުން."