އިޒްރޭލުން އަލް ޖަޒީރާގެ ދެ ނޫސްވެރިއަކަށް ހަމަލާދީ ވަރަށް ބޮޑަށް ޒަހަމްކޮށްލައިފި

އިޒްރޭލުން އަލް ޖަޒީރާގެ ދެ ނޫސްވެރިޔަކަށް ގަސްތުގައި ހަމަލާދީ ވަރަށް ބޮޑަށް ޒަހަމްކޮށްލައިފި އެވެ.

އަލް ޖަޒީރާއިން ބުނީ އެ ތަނުގެ ރިޕޯޓަރެއް ކަމަށްވާ އިސްމާއިލް އަބޫ އުމަރުގެ ފުރާނައަށް ނުރައްކާ ވަރަށް ޒަހަމްވެފައި ވާއިރު ކެމެރާމަން އަހްމަދު މަތާރް ވެސް ވަރަށް ބޮޑަށް ޒަހަމްވެފައިވާ ކަމަށެވެ.

ޣައްޒާގެ ދެކުނުގައި އޮންނަ ރަފަހްގައި މި ދެ ނޫސްވެރިންނަށް ހަމަލާދިނުން ކުށްވެރިކޮށް އަލް ޖަޒީރާއިން ބުނީ މިއީ އިޒްރޭލުން ނޫސްވެރިންނާ ދެކޮޅަށް ހިންގަމުން އަންނަ ކުށުގެ އަމަލުތަކުގެ ސިލްސިލާގެ ބައެއް ކަމަށާއި މިއީ ހަނގުރާމައިގެ ޚަބަރާއި މައުލޫމާތު ފެތުރުމަށް ހުރަސްއެޅުމަށް ހިންގާ ޖަރީމާއެއް ކަމަށެވެ.

"ރިޕޯޓަރު އިސްމާއިލް އާއި ކެމެރާމަން އަހްމަދަށް އަމާޒުކޮށް ދިން މި ހަމަލާ އަކީ [އިޒްރޭލުގެ] އިސްތިއުމާރުން އަލް ޖަޒީރާގެ މުވައްޒަފުންނަށް ގަސްތުގައި ދޭ ހަމަލާތަކުގެ އިތުރު އެޕިސޯޑެއް،" އަލް ޖަޒީރާއިން ނެރުނު ބަޔާނެއްގައި ބުންޏެވެ.

ޑްރޯންއަކުން ދިން މިސައިލް ހަމަލާއެއްގައި އިސްމާއިލްގެ ކަނާތު ފައި ބުރިވެފައި ވާއިރު ޑޮކްޓަރުން ގެންދަނީ އަނެއް ފައި ސަލާމަތްކުރެވޭތޯ މަސައްކަތްކުރަމުން ކަމަށް އަލް ޖަޒީރާއިން ބުންޏެވެ.

ޣައްޒާގައި ހުންނަ، ފަލަސްތީނުގެ ހެލްތު މިނިސްޓްރީން ބުނީ މި ދެ ނޫސްވެރިންނަށް ހަމަލާ ދިނީ މޮރާޖް ސަރަހައްދުގައި ކަމަށާއި ދެ މީހުންނަށް ފަރުވާ ދެމުން އަންނަނީ މިހާރު ވެސް ތޮއްޖެހި ބޭހާއި އަސާސީ އެހެނިހެން ސާމާނު ހުސްވާން ގާތްވެފައިވާ ޔޫރަޕިއަން ހޮސްޕިޓަލްގައި ކަމަށެވެ.

ދުނިޔޭގެ ސިއްހަތު ޖަމިއްޔާ، ޑަބްލިޔުއެޗްއޯ އިން ބުނެފައިވާ ގޮތުގައި ޚާން ޔޫނިސް ސިޓީގައި ހިންގާ މި ހޮސްޕިޓަލުން 20،000 މީހަކު ހިމާޔަތް ހޯދަމުން ވެސް ދެ އެވެ.

އިޒްރޭލުން މިފަހަރު ޣައްޒާއަށް ހަމަލާތައް ދޭން ފެށި ފަހުން އަލް ޖަޒީރާގެ ދެ ނޫސްވެރިޔަކު މަރާލައި އެހެން ނޫސްވެރިޔަކު ޒަހަމްކޮށްލާފައިވެ އެވެ.

ހަމާސް އިން އޮކްޓޫބަރު 7 ގައި އިޒްރޭލަށް ދިން ހަމަލާތަކާ އެކު އިޒްރޭލުން ދޭން ފެށި ހަމަލާތަކުގެ ތެރޭގައި މިހާތަނަށް 85 ނޫސްވެރިޔަކު މަރުވެފައިވާ ކަމަށާއި އޭގެ ތެރެއިން 78 އަކީ ފަލަސްތީނު މީހުން ކަމަށް "ކޮމިޓީ ޓު ޕްރޮޓެކްޓް ޖާނަލިސްޓްސް" އިން ވަނީ ބުނެފަ އެވެ. -- އޭއެފްޕީ