ޓްރަމްޕުގެ އަމުރާ ދެކޮޅަށް އިތުރު ކޯޓަކުން ހުކުމެއް ނެރެފި

ވޮޝިންޓަން (ފެބްރުއަރީ 15) - މުސްލިމް ހަތް ގައުމެއްގެ މީހުން އެމެރިކާ އަށް ވަނުން މަނާކުރުމަކީ އެ ގައުމުގެ ގާނޫނު އަސާސީއާ ޚިލާފު ކަމެއް ކަމަށް ވާޖީނިއާގެ ޑިސްޓްރިކްޓް ކޯޓުން ހުކުމްކޮށްފި އެވެ.

ފަނޑިޔާރު ލިއޯނީ ބްރިންކެމާ ނެރުއްވި އަމުރުގައި ވަނީ "މުސްލިމުން މަނާ" ކުރުމަކީ ފަސްޓް އެމެންޑްމެންޓާ ޚިލާފު ނިންމުމެއް ކަމަށެވެ. ވާޖީނިއާގެ ފަނޑިޔާރުގެ 22 ސަފުހާގެ ހުކުމުގައި ވަނީ ކެމްޕޭން ތެރޭގައި ވެސް މުސްލިމް މަނާކުރާނެ ކަމަށް ޓްރަމްޕް ވިދާޅުވެފައިވާކަން ފާހަގަކޮށްފަ އެވެ. އަދި މުސްލިމް މަނާކުރުން ހުއްދަ ގޮތުގައި ކުރެވޭނެ ގޮތެއް ހޯދުމަށް ނިއު ޔޯކުގެ ކުރީގެ މޭޔަރު އަދި ޓްރަމްޕުގެ އިސް މުޝީރެއް ކަމަށްވާ ރޫޑީ ޖިއުލިއާނީ އަށް ދަންނަވާފައިވާކަން ވެސް ކޯޓުން ވަނީ ފާހަގަކޮށްފަ އެވެ. ޓްރަމްޕުގެ އަމުރުގެ މަގްސަދަކީ ދީނީ ގޮތުން ތަފާތު ކުރުން ކަމަށް ވެސް ހުކުމުގައިވެ އެވެ. ފަސްޓް އެމެންޑްމެންޓުގައިވާ ގޮތުން އެއްވެސް ދީނެއް ތަފާތު ކުރުމަކީ މަނާ ކަމެކެވެ.

ވޮޝިންޓަނުގެ ޑިސްޓްރިކްޓް ކޯޓުން ވެސް ވަނީ ޓްރަމްޕް ނެރުއްވި އަމުރު ގާނޫނާ ޚިލާފު ކަމެއް ކަމަށް ބުނެ އެ އަމުރު ހުއްޓުވުމަށް ހުކުމް ކޮށްފަ އެވެ. ޖަސްޓިސް ޑިޕާޓްމަންޓުން އެ މައްސަލަ އިސްތިއުނާފް ކުރުމުން ވަނީ ދަށު ކޯޓުގެ ހުކުމަށް ތާއީދުކޮށްފަ އެވެ.

ވާޖީނިއާގެ ކޯޓުގެ ނިންމުމަށް އެ ސްޓޭޓުގެ އެޓާނީ ޖެނެރަލް މާކް ހެރިން ވަނީ ތައުރީފް ކުރައްވައިފަ އެވެ.

ވާޖީނިއާގެ ކޯޓަށް މި މައްސަލަ ވައްދާފައި ވަނީ ޔަމަނުގެ ދެބެންނެވެ. އެ މީހުން ވަނީ އެމެރިކާ އަށް އެތެރެވި ތަނުން ވޮޝިންޓަނުގެ އެއާޕޯޓަކުން ހުއްޓުވާ އަނބުރާ ފޮނުވާލައިފަ އެވެ. އެކަމަކު ކޯޓު ހުކުމުން ޓްރަމްޕުގެ އަމުރު ހުއްޓުވުމާ އެކު އެ މީހުން އަލުން ވަނީ އެމެރިކާ އަށް އެތެރެވެފަ އެވެ. އެމެރިކާ އަށް ވަނުން މަނާކުރި ގައުމުތަކުގެ ތެރޭގައި ޔަމަން ހިމެނެ އެވެ.

ޓްރަމްޕް ވިދާޅުވެފައި ވަނީ އިސްތިއުނާފް ކޯޓުން އޭނާ އަށް ނާކާމިޔާބުވި މައްސަލަ ސުޕްރީމް ކޯޓަށް ގެންދިއުމުގެ ބަދަލުގައި ވިސްނަވަނީ މުސްލިމުން މަނާކުރުމުގެ އާ އަމުރެއް ނެރުމަށް ކަމަށެވެ.