ޣައްޒާ އަކީ މަރުގެ މައިދާނެއް: ޑަބްލިޔުއެޗްއޯ

އިޒްރޭލުން ހަމަލާދެމުން ގެންދާ ފަލަސްތީނުގެ ޣައްޒާގެ ހާލަތުގައި އިންސާނިއްޔަތުކަމުގެ ކަންފުޅެއް ވެސް ނެތް ކަމަށާއި މިހާރު އެއީ "މަރުގެ މައިދާނެއް" ކަމަށް ދުނިޔޭގެ ސިއްހަތު ޖަމިއްޔާ، ޑަބްލިޔުއެޗްއޯ އިން އިއްޔެ ބުނެފި އެވެ.

އިޒްރޭލާއި ހަމާސްގެ ހަމަލާތައް ވަގުތުން ހުއްޓާލައި، އެއްވެސް ހުރަހަކާނުލައި އެހީގެ މަސައްކަތް ޣައްޒާގައި ކުރެވޭނެ މަގު ފަހިކޮށްދިނުމަށް ޑަބްލިޔުއެޗްއޯގެ ޑިރެކްޓަ ޖެނެރަލް ޓެޑްރޮސް އަދަނަމް ގެބްރެޔެސަސް ގޮވާލައްވަމުން ވިދާޅުވީ ޣައްޒާގައި އިންސާނިއްޔަތު ކަމުގެ ނިޝާނެއް ނެތް ކަމަށާއި ހާލަތު އަދިވެސް ދަނީ އިތުރަށް ގޯސްވަމުން ކަމަށެވެ.

"ޣައްޒާ އަކީ މަރުގެ މައިދާނަކަށް ވެއްޖެ. އެ ސިޓީގެ ބޮޑު ބައި ވަނީ ސުންނާފަތި ވެފައި،" ޕްރެސް ކޮންފަރެންސެއްގައި ޓެޑްރޮސް ވިދާޅުވި އެވެ.

"ކާާނާ އާއި ސާފު ފެން ނުލިބި، ހިނގާބިނގާވެ ނޫޅެވޭއިރު ވެސް ސިއްހީ އެހީ ނުލިބޭއިރު އަހަރެމެން މި އުޅެނީ ކޮންކަހަލަ ދުނިޔެއެއްގައި؟"

"ސިއްހީ ހިދުމަތްތެރިން މީހުންގެ ފުރާނަ ސަލާމަތްކުރަން އެ މީހުންގެ ޒިންމާ އަދާކުރަން އުޅުމުން ބޮލަށް ބޮން އަޅާއިރު، މި އުޅެވެނީ ކޮންކަހަލަ ދުނިޔެއެއްގައި؟"

"ކަރަންޓާއި ބޭސް ނުލިބިގެން ހޮސްޕިޓަލްތައް ބަންދުކުރަން ޖެހި ބަލި މީހުންގެ ފުރާނަ ސަލާމަތް ނުކުރެވޭއިރު އަދި ހޮސްޕިޓަލްތަކަށް އަސްކަރިއްޔާއިން ހަމަލާދޭއިރު މި އުޅެވެނީ ކޮންކަހަލަ ދުނިޔެއެއްގައި؟"

ޣައްޒާގެ ހާލަތު އޮތް ހިސާބު ސިފަކޮށްދެއްވުމަށް ޓެޑްރޮސް ސުވާލުތައް ކުރެއްވި އެވެ.

"ހަމަ މިހާރު ހަމަލާތައް ހުއްޓާލަން ޖެހޭ. ރަހީނުކޮށްފައިވާ މީހުން ދޫކޮށްލަންޖެހޭ. ބޮން އެޅުން ހުއްޓާލައި އިންސާނީ އެހީ ފޯރުކޮށްދެވޭނެ ގޮތް ހަދައިދޭންޖެހޭ. އިންސާނިއްޔަތުކަން އިސްކުރަންޖެހޭ،" ޓެޑްރޮސް ވިދާޅުވި އެވެ.

ހަމާސް އިން އޮކްޓޫބަރު 7 ގައި އިޒްރޭލަށް ހަމަލާދީ 1،160 މީހަކު މަރާލައި 250 މީހަކު ރަހީނުކުރުމާ އެކު ހަމާސް ނައްތާލުމުގެ ނަމުގައި އިޒްރޭލުން ދޭން ފެށި ހަމަލާތަކުގައި ފަލަސްތީނުން މިހާތަނަށް 29،000 އަށް ވުރެ ގިނަ މީހުން ވަނީ ޝަހީދުވެފަ އެވެ. އަދި ހަމަލާތަކުގައި މުޅި ޣައްޒާ ވަނީ ބިމާ ހަމަކޮށްފަ އެވެ. -- އޭއެފްޕީ