"އަންރްވާ" މަނާކުރިޔަސް އިޒްރޭލަށް ރައްކާތެރިކަން ބޮޑެއް ނުވާނެ: ޑަބްލިޔުއެޗްއޯ

ފަލަސްތީނުގެ ރެފިއުޖީންނަށް އެހީތެރިކަން ފޯރުކޮށްދޭ އދ.ގެ އެޖެންސީ، ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ (އަންރްވާ) އިޒްރޭލުން ގުޅުން ކަނޑާލިޔަސް އެކަމުން އިޒްރޭލަށް އިތުރުވާނެ ރައްކާތެރިކަމެއް ނެތް ކަމަށް ޑަބްލިޔުއެޗްއޯގެ ވެރިޔާ ވިދާޅުވެއްޖެ އެވެ.

"ވަރަށް ސާފުކޮށް ދަންނަވާނަން. އަންރްވާގެ މަސައްކަތް ކުރެވޭނެ އެހެން ބަޔަކު ނެތް،" ޓެޑްރޮސް އަދަނަމް ގެބްރޭސަސް އެކްސްގައި ކުރެއްވި ޕޯސްޓެއްގައި ލިޔުއްވާފައިވެ އެވެ.

"އެ ޖަމިއްޔާ މަނާކުރުމަކުން އިޒްރޭލަށް އިތުރުވާނެ ރައްކާތެރިކަމެއް ނެތް. މިކަމުން ވާނެ ކަމަކީ ޣައްޒާގެ އާންމުންގެ ކެކުޅުންތައް ބޮޑުވުން އަދި ބަލިތައް ފެތުރުން އިތުރުވުން."

ޓެޑްރޮސް މިހެން ވިދާޅުވީ އަންރްވާއާއާ އެކު އިޒްރޭލުން ވެފައިވާ އެއްބަސްވުން އުވާލައި ގުޅުން ކަނޑާލައިފިކަން އދ. އަށް އިޒްރޭލުން ރަސްމީކޮށް އެންގުމާ އެކުގަ އެވެ.

މީގެ އަހަރެއް ކުރިން ފެށިގެން އިޒްރޭލުން ކެނޑިނޭޅި ހަމަލާ ދެމުން ގެންދާ ޣައްޒާގައި ބަނޑަށް މަރުވަމުންދާ އާންމުންނަށް ކާނާ އާއި ބޭސްފަރުވާގެ ހިދުމަތް ފޯރުކޮށްދިނުމުގައި އެންމެ މުހިންމު ދައުރެއް އަދާކުރަނީ އަންރްވާއިންނެވެ. އެކަމަކު އިޒްރޭލުން ބުނަނީ އަންރްވާގައި ގިނައީ ހަމާސްގެ މެންބަރުން ކަމަށާއި މިދިޔަ އަހަރުގެ އޮކްޓޫބަރު ހަތް ވަނަ ދުވަހު އިޒްރޭލަށް ދިން ހަމަލާގައި ވެސް އަންރްވާގެ މެންބަރުންތަކެއް ބައިވެރިވި ކަމަށެވެ.

ޣައްޒާގައި އަންރްވާގެ 13،000 މީހުން ވަޒީފާ އަދާކުރާއިރު އިޒްރޭލަށް ހަމަލާ ދިނުމުގައި އޭގެ ތެރެއިން ބައިވެރިވި ކަމަށް ބެލެވޭ ނުވަ މީހަކު ވަނީ ކުރިން ވަޒީފާއިން ވަކިކޮށްފަ އެވެ.

އަންރްވާ އުފެއްދީ އަރަބި ގައުމުތަކާއި އިޒްރޭލާ ދެމެދު ކުރި ހަނގުރާމައަށް އަހަރެއް ފަހުން 1949 ގަ އެވެ. އެއީ ގައްޒާ، ހުޅަނގު އައްސޭރި، ލުބްނާން، ޖޯޑަން އަދި ސީރިއާގައި ތިބި ހަ މިލިއަނެއްހާ ރެފިއުޖީންނަށް އެހީވުމާ މަތިކޮށް އުފެއްދި ޖަމިއްޔާއެކެވެ.