އަންނަ މަހުން ފެށިގެން ފުލުހުންނާއި ސިފައިންގެ މުސާރަ ބޮޑުވާނެ: ރައީސް

އަންނަ މަހުން ފެށިގެން ސިފައިންނާއި ފުލުހުންގެ މުސާރަ ބޮޑު ކުރަން ނިންމައިފައިވާ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އިގުތިސާދީ ހާލަތު ތަންދޭ ނަމަ ސިފައިންނާއި ފުލުހުންގެ މުސާރަ ދެ ގުނަ އަށް ބޮޑު ކުރުމަކީ ރައީސްގެ ވައުދެކެވެ.

ރައީސް މުއިއްޒުގެ ފުރަތަމަ ޕަބްލިކް ފޯރަމް "އަހާ" ފޯރަމްގައި އެކަމާ ގުޅޭ ގޮތުން މީހަކު ކުރި ސުވާލަކަށް ޖަވާބު ދެއްވަމުން އެ މަނިކުފާނު ވިދާޅުވީ އަންނަ މާޗު މަހުން ފެށިގެން ފުލުހުންނާއި ސިފައިންގެ މުސާރަ ބޮޑު ކުރަން ވަނީ ހަމަޖެހިފައި ކަމަށެވެ. ނަމަވެސް، އެކަމާ ގުޅޭ އެއްވެސް ތަފުސީލެއް ރައީސް މިރޭ ވިދާޅެއް ނުވެ އެވެ.

ސިފައިންނާއި ފުލުހުންގެ މުސާރަ ދެ ގުނަ ބޮޑުކޮށްދޭނެ ކަމަށް ރައީސް ވިދާޅުވެފައިވަނީ ރިޔާސީ އިންތިހާބުގެ ކެމްޕެއިނަށް ސެޕްޓެމްބަރު 15 ގައި އާޓިފިޝަލް ބީޗުގައި ބޭއްވި ޖަލްސާއެއްގަ އެވެ. އެކަމުގެ ތަފުސީލް ދެއްވަމުން ރައީސް އޭރު ވިދާޅުވެފައިވަނީ 2024 ވަނަ އަހަރު 35 ޕަސެންޓް ބޮޑުކޮށް، 2025 ވަނަ އަހަރު 25 ޕަސެންޓް އަދި 2028 ވަނަ އަހަރު 30 ޕަސެންޓް ބޮޑުކޮށް، މުސާރަ ދެ ގުނަ ކުރައްވާނެ ކަމަށެވެ.

އެކަމަކު، މި ސަރުކާރުން ވެރިކަމަށް އައިސް އެކަން ފަސްކޮށްފައިވާ ކަމަށް ބުނެ ރައްޔިތުންގެ މަޖިލީހަށް ފުވައްމުލަކު މެދު ދާއިރާގެ އެމްޑީޕީގެ މެންބަރު ހުސައިން މުހައްމަދު ދީދީ ވަނީ މައްސަލައެއް ވެސް ހުށަހަޅުއްވާފަ އެވެ.

މާޗު 1 އިން ފެށިގެން ފުލުހުންގެ މުސާރަ ބޮޑު ވާނެ ކަން ފިނޭންސް މިނިސްޓްރީން އަންގާފައިވާ ކަމަށް، އޮފީސް އޮފް ދަ ކޮމިޝަނާގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް އަހުމަދު ޝިފާން ވެސް ވަނީ ވިދާޅުވެފަ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ދައުރު ނިމެން އެއް ދުވަހަށް ވެފައި ވަނިކޮށް ޕޭ ކޮމިޝަނުން ވަނީ ފުލުހުންނާއި ސިފައިންގެ މުސާރައިގެ އޮނިގަނޑު ފޮނުވައިފަ އެވެ. ރައީސް އޮފީހުން އޭރު ބުނި ގޮތުގައި ޖެނުއަރީ މަހުން ފެށިގެން އެ ދެ މުއައްސަސާގެ މުސާރަ ބޮޑު ވާނެ އެވެ.

ކުރީގެ ސަރުކާރުން ނިންމާފައި ވަނީ މުސާރައިގެ އޮނިގަނޑަށް ގެންނަ ބަދަލާއެކު ކޮންސްޓަބަލް ރޭންކުގެ ފުލުހެއްގެ މުސާރަ 11،000ރ. އިން 15،400ރ. އަށް އަދި ސިފައިންގެ ޕްރައިވެޓް ރޭންކުގެ މީހަކަށް 11،500ރ. އިން 16،300ރ. އަށް މުސާރަ ބޮޑު ކުރުމަށެވެ.