ސިފައިންނާއި ފުލުހުންގެ އެލަވަންސް ބޮޑުކޮށްފި

ދިވެހި ސިފައިންނާއި ފުލުހުންގެ އަސާސީ އެލަވަންސް ބޮޑުކޮށްފި އެވެ.

އެނގިފައިވާ ގޮތުގައި ސިފައިންނާއި ފުލުހުންގެ އަސާސީ އެލަވަންސް ބޮޑުކުރީ މި މަހުގެ ފުރަތަމަ ދުވަހުން ފެށިގެންނެވެ. އެހެންކަމުން މި ފެބްރުއަރީ މަހުން ފެށިގެން ސިފައިންނާއި ފުލުހުންނަށް ލިބޭނީ ބޮޑުކުރި އެލަވަންސެވެ.

ސިފައިންނާއި ފުލުހުންގެ އަސާސީ އެލަވަންސް ބޮޑުކުރި އިރު، އެންމެ ބޮޑަށް އެލަވަންސް ލިބޭ ރޭންކުތަކުގެ މީހުންނަށް ވެސް ބޮޑުވާނީ 1،500ރ.އާ ހަމައަށެވެ. އަދި ކެޕްޓަން ރޭންކުން ފެށިގެން މަތީގެ ސިފައިންނާއި ޗީފް އިންސްޕެކްޓާ ރޭންކުން ފެށިގެން މަތީގެ ފުލުހުންނަށް އަސާސީ އެލަވަންސްގެ ގޮތުގައި ލިބޭނީ އެއްވަރެކެވެ.

"މިހާރު" އަށް އެނގިފައިވާ ގޮތުގައި މި މަހުން ފެށިގެން ސިފައިންނާއި ފުލުހުންގެ އަސާސީ އެލަވަންސް ބޮޑުކުރި ކަމުގައި ވިޔަސް، ބޮޑުކުރި އެލަވަންސް ސިފައިންނާއި ފުލުހުންގެ އެކައުންޓަށް ޖަމާކުރާނީ މާޗް މަހުގެ މުސާރަ ދޭއިރު އެވެ.

ސިފައިންނާއި ފުލުހުންގެ އަސާސީ އެލަވަންސް ސަރުކާރުން މި ބޮޑުކުރީ، ސިޔާސީ ނުވަ ބޭފުޅަކު ވަގުތުން މިނިވަން ކުރުމަށް މި މަހުގެ ފުރަތަމަ ދުވަހު ސުޕްރީމް ކޯޓުން ނެރުނު އަމުރަކީ، ޝަރުއީ ދާއިރާ އިން ގެންނަން އުޅުނު ބަޣާވާތެއް ކަމަށާއި އެ ބަޣާވާތުން ދިވެހި އުންމަތް ސަލާމަތް ކޮށްދިނީ ދިވެހި ސިފައިންނާއި ފުލުހުން ކަމަށް ރައީސް ޔާމީން ވިދާޅުވެ ސިފައިންނާއި ފުލުހުންނަށް ވަރަށް ބޮޑަށް ތައުރީފު ކުރައްވާފައި ވަނިކޮށެވެ.

އަދި އެ ބަޣާވާތުގެ ބައިވެރިން ހިފައި ހައްޔަރުކުރުމުގެ ބޭނުމުގައި، މި މަހުގެ ފަސް ވަނަ ދުވަހުގެ ރެއިން ފެށިގެން 15 ދުވަހުގެ މުއްދަތަށް ކުއްލި ނުރައްކަލުގެ ހާލަތު އިއުލާން ކޮށް، ސިފައިންނާއި ފުލުހުން ސުޕްރީމް ކޯޓަށް ވަދެ އުއްތަމަ ފަނޑިޔާރާއި އެ ކޯޓުގެ ފަނޑިޔާރު އަލީ ހަމީދު ވަނީ ހައްޔަރު ކޮށްފަ އެވެ. އޭގެ އިތުރުން ކުރީގެ ރައީސް މައުމޫން އަބްދުލްގައްޔޫމާއި އެމަނިކުފާނުގެ ދަނބިދަރިކަލުން މުހައްމަދު ނަދީމާއި މައުމޫނުގެ އާއިލާއާ ގުޅުން ހުރި އިތުރު ތިން މީހަކު ވެސް ހައްޔަރު ކުރި އެވެ.