ރޮނާލްޑޯގެ ރެކޯޑް މުގުރާލަން ކީޕަރު ރެއިނާ ތައްޔާރު

މާސޭ (މާޗް 6) - ޔޫރަޕްގެ ކްލަބް މުބާރާތްތަކުގައި، އެންމެ ގިނަ މެޗު ކުޅެގެން ކްރިސްޓިއާނޯ ރޮނާލްޑޯ ހެދި ރެކޯޑް، މުގުރާލުމުގެ އުންމީދު ކީޕަރު ޕެޕޭ ރެއިނާ އާ ކޮށްފި އެވެ.

މިހާރު ވިޔަރެއާލަށް ކުޅެމުންދާ ކީޕަރު، އެ ޓީމާ އެކު ޔޫރޮޕާ ލީގުގައި، މާދަމާ ރޭ ނުކުންނާނީ ފްރާންސްގެ މާސޭއާ ދެކޮޅަށެވެ.

މާސޭގައި ކުޅޭ އެ މެޗު ވާނީ ޔޫރަޕްގެ ކްލަބް ފުޓްބޯޅައިގައި ރެއިނާ ކުޅޭ 192 ވަނަ މެޗަށެވެ. އެއާ އެކު ރޮނާލްޑޯއާ ފަސް މެޗަށް ކައިރި ކުރެވޭނެ އެވެ. ރޮނާލްޑޯ ވަނީ 197 މެޗު ކުޅެފަ އެވެ.

ރެއިނާ ބުނީ އެ އުންމީދުގައި ކުރިއަށް ދިއުމުގެ އުންމީދު އޭނާ ހުރި ކަމަށެވެ.

"އަހަރެމެން މި ތިބީ މި ކްލަބަށް ސަޕޯޓަރުންނަށް ހިތްހަމަޖެހުން ހޯދައިދޭން،" ރެއިނާ ބުންޏެވެ.

ކުރިން ލިވަޕޫލް އަދި ނަޕޯލީ އަށް ވެސް ކުޅުނު އުމުރުން 42 އަހަރުގެ ކީޕަރު ބުނީ ޔޫރޮޕާ ލީގުގައި ވިޔަރެއާލް ދަނީ ރަނގަޅަށް ކަމަށެވެ. ދެވަނަ ބުރަށް އެ ޓީމު ކޮލިިފައި ވީ ގުރޫޕްގެ އެއްވަނަ ހޯދައިގެންނެވެ.

"މި މުބާރާތަކީ އަހަރެމެންނަށް ވަރަށް މުހިންމު މުބާރާތެއް. ވަރަށް ރަނގަޅަށް ފަށައިގެން ކުރިއަށް މިދަނީ އުންމީދަކީ މި ފޯރީގައި ގޮސް މުބާރާތް ކާމިޔާބު ކުރުން،" ރެއިނާ ބުންޏެވެ.