އިޒްރޭލުން އދ.ގެ އެންމެ މަތީ ކޯޓުގެ ބާރު ކަނޑުވާލައިފި: ދެކުނު އެފްރިކާ

އިޒްރޭލުން ފަލަސްތީނުގެ ޣައްޒާގައި ކުރިއަށް ގެންދަނީ އެތަނުގެ ރައްޔިތުން ބަނޑަށްޖެއްސުމުގެ ކެމްޕޭނެއް ކަމަށާއި ހަމަލާތައް މެދުކަނޑާލައި އިންސާނީ އެހީ ފޯރުކޮށްދެވޭނެ މަގު ތަނަވަސްކޮށްދޭން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ނެރުނު އަމުރަށް ތަބާނުވެ ކޯޓުގެ ބާރު ވެސް ކަނޑައިފި ނަމަ ދެކުނު އެފްރިކާ އިން ބުނެފި އެވެ.

ޣައްޒާގައި އިޒްރޭލުން ހިންގަނީ ނަސްލު ނައްތާލުމުގެ ހަނގުރާމައެއް ކަމަށް ބުނެ އެކަން ހުއްޓުވައިދޭން އެދި އައިސީޖޭ އަށް މައްސަލަ ހުށަހަޅައި އިޒްރޭލާ ދެކޮޅަށް އަޑު އުފުލަމުން ގެންދާ ދެކުނު އެފްރިކާގެ ފަރާތުން އެ ގައުމުގެ ފޮރިން މިނިސްޓަރު ނަލެޑީ ޕަންޑޯރް އިއްޔެ ވިދާޅުވީ ޖެނުއަރީ އައިސީޖޭން ނެރުނު އަމުރަށް އިޒްރޭލު ތަބާވާން ޖެހޭނެ ކަމަށެވެ. އަދި މިކަމުގައި އައިސީޖޭ އިން އިޒްރޭލާ ދެކޮޅަށް ފިޔަވަޅު ވެސް އަޅަން ޖެހޭނެ ކަމަށް ވިދާޅުވި އެވެ.

"ނެރުނު ވަގުތީ އަމުރު އިޒްރޭލުން ވަނީ ބޮލާލައި ޖަހާފައި،" އެމެރިކާގެ ވެރިރަށް ވޮޝިންޓަންގެ ކާނެޖީ އެންޑޯމަންޓް ފޯ އިންޓަނޭޝަނަލް ޕީސްގައި ޕަންޑޯރް ވިދާޅުވި އެވެ.

"އަހަރެމެންގެ ލޯ ކުރިމަތީ ފެންނަމުން މި ދަނީ އާންމުވެފައިވާ ހައިހޫނުކަން އަދި ބަނޑަށްޖެހެމުންދާ ތަން،" އޭނާ ވިދާޅުވި އެވެ. "އަޅުގަނޑަށް ހީވަނީ އިންސާނިއްޔަތުގެ ކަމުގެ ނަޒަރަކުން އަޅުގަނޑުމެން އަމިއްލައަށް ވިސްނާއިރު މިއީ ދެއްކޭ ނުބައި މިސާލެއް ކަމަށް ވާތީ އެކަމާ ކަންބޮޑުވެ ހިތާމަކުރަންޖެހޭހެން."

އޭނާ ވިދާޅުވީ އިޒްރޭލުގެ އަމަލުތަކުން އެހެން ގައުމުތަކަށް ވެސް އެ ދެވެނީ އެ ބަޔަކު ބޭނުން ކަމެއް ބޭނުން ގޮތަކަށް ކުރެވޭނެ ކަމުގެ ލައިސަންސެއް އޮތް ކަމުގެ މެސެޖު ކަމަށެވެ. ހުޅަނގުގެ ގައުމުތަކުން އަމަލުކުރަނީ އެ މީހުންގެ އަމަލުތަކާ އެއްގޮތަށް ނޫން ކަމަށާއި މިއަދު ދެކުނު އެފްރިކާ އިން އައިސީޖޭގެ އަމުރަަކަށް ތަބާ ނުވެގެން އުޅޭ ނަމަ އެހެން ގައުމުތަކުން ދެކުނު އެފްރިކާ ހުއްޓުވަން އުޅޭނެ ކަމަށް ވިދާޅުވެ އޭނާ ބަހުގެ ހަމަލާ ދެއްވި އެވެ.

އައިސީޖޭ އިން އިޒްރޭލާ ދެކޮޅަށް ޖެނުުއަރީ މަހު ނެރުނު އަމުރަށް ތަބާނުވެ ހަނގުރާމަ އިތުރަށް ވަރުގަދަކޮށް ޣައްޒާ ބަނޑަށް ޖައްސާފައި ވާތީ ދެކުނު އެފްރިކާއިން ވަނީ އަނެއްކާ ވެސް އިތުރު ފިޔަވަޅު އަޅައިދޭން އެދި އައިސީޖޭ އަށް ހުށަހަޅައިފަ އެވެ. އިޒްރޭލާ ދެކޮޅަށް ދެކުނު އެފްރިކާއިން ކޯޓަށް ދާތީ އިޒްރޭލުން ގެންދަނީ ދެކުނު އެފްރިކާ އަށް މަލާމާތްކޮށް ޖެއްސުން ކުރުމުގެ ރާގުގައި ވާހަކަ ދައްކަމުންނެވެ. -- އޭއެފްޕީ