މެލޭޝިއާގެ މިނީ-މާޓް ޗެއިންއަކުން އިސްޓާކީނުތަކެއްގައި "ﷲ" ލިޔުމުން ދައުވާކޮށްފި

އިސްޓާކީނުތަކެއްގައި "ﷲ" ލިޔެ އެ ވިއްކި މައްސަލައިގައި މެލޭޝިއާގެ މިނީ މާޓް ޗެއިންއަކާއި އެ ޗެއިންގެ ސަޕްލަޔަރުންގެ މައްޗަށް ދައުވާކޮށްފި އެވެ.

މި އިސްޓާކީނުތަކުގެ މައްސަލައިގައި މެލޭޝިއާގެ ރަސްގެފާނުގެ ފަރާތުން ވަނީ މަދުން ނޫނީ ނުފެންނަ ފާޑުކިޔުންތަކެއް އަމާޒުވެފަ އެވެ. ރަސްގެފާނު ވަނީ މައްސަލަ ތަހުގީގުކޮށް ކުށް ސާބިތުވާ މީހުންނާ މެދު ހަރުކަށި ފިޔަވަޅު އެޅުމަށް ގޮވާލައްވައިފަ އެވެ.

ސޯޝަލް މީޑިއާގައި މި އިސްޓާކީނުތަކުގެ ފޮޓޯތައް ދައުރުކޮށް މީހުން ފާޑުކިޔަމުން ދާއިރު މި ރޯދަ މަހު ވެސް އޭގެ ވިޔަފާރިކުރާތީ ވަކިން ބޮޑަށް ފާޑުކިޔުން އަމާޒުވެފައިވެ އެވެ.

މި މައްސަލައިގައި ކޭކޭ ސުޕަ މާޓްގެ ޗީފް އެގްޒެކެޓިވް ޗައި ކީ ކާން، 57، އާއި ކުންފުނީގެ ޑިރެކްޓަރެއްގެ މަގާމު އަދާކުރާ އޭނާގެ އަންހެނުންގެ މައްޗަށް ވަނީ ދައުވާކޮށްފަ އެވެ. ދައުވާކުރީ މުސްލިމުންގެ އިހްސާސްތަކާ ގަސްތުގައި ކުޅެ ރުޅިވެރިކަން އުފައްދަން މަސައްކަތްކުރި ކަމަށް ބުނެ އެވެ.

ސަޕްލައި ކުރާ ކުންފުނި ޝިން ޖިއާން ޗަންގްގެ ތިން އޮފިޝަލެއްގެ މައްޗަށް އުފުލާފައި ވަނީ ތުހުމަތު ކުރެވޭ ކުށަށް އެއްބާރުލުން ދިނުމުގެ ދައުވާ އެވެ.

އެ އެންމެން ވެސް ދައުވާއަށް އިންކާރުކޮށްފައިވާއިރު، ކުށް ސާބިތުވެއްޖެ ނަމަ ގިނަވެގެން އެއް އަހަރު ދުވަހުގެ ޖަލު ހުކުމެއް ނުވަތަ ޖޫރިމަނާއެއް ނުވަތަ އެ ދެ ހުކުމެއް ވެސް އަތުވެދާނެ އެވެ.

ކޭކޭ ސުޕަ މާޓުން ވަނީ މި މައްސަލައިގައި މާފަށް އެދިފަ އެވެ. އަދި މި މައްސަލަ ބަލާނެ ކަމަށާއި އޭގެ ވިޔަފާރި ވަގުތުން ހުއްޓާލާފައި ވާނެ ކަމަށް ބުންޏެވެ.

ސަޕްލައިކުރާ ޗައިނާގެ ކުންފުނިން ވެސް މާފަށް އެދި ބުނެފައި ވަނީ މައްސަލަ ޖެހުނީ 18،800 އިސްޓާކީނު ޖޯޑުގެ ބޮޑު ޝިޕްމަންޓެއްގެ ތެރެއިން އެންމެ ފަސް ޖޯޑު އިސްޓާކީނުގައި ކަމަށެވެ. -- އޭއެފްޕީ