ދެކުނަށް ފެން އީދެއް، އުތުރަށް މޫސުން ރަނގަޅުވާނެ

ކުރިއަށް އޮތް ފިތުރު އީދު ދުވަސް ކަމަށްވާ ބުދަ ދުވަހު ރާއްޖޭގެ ބައެއް ސަރަހައްދުތަކަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން ލަފާކޮށްފި އެވެ.

މި ރޯދަ މަހު، މުޅި ރާއްޖެ އަށް އާދަޔާ ހިލާފަށް ހޫނު ގަދަކޮށް އޮތުމަށް ފަހު، ރެ އިން ފެށިގެން މާލެ ސަރަހައްދަށް ވަރަށް ބޮޑަށް ވާރޭވެހި، މުޅި މާލޭގެ މަގުތަކުގައި ވަނީ ފެން ހެދިފަ އެވެ.

އެކަމާ ގުޅިގެން މެޓް އޮފީހުގެ އޮފިޝަލަކު "މިހާރު" އަށް ވިދާޅުވީ، މިހާރު ކުރަމުން ދަނީ ދެ މޫސުން ބެދެމުން ދާތީ ކުރާ ވިއްސާރައެއް ކަމަށެވެ. މިއަދާއި މިރޭ ވެސް މެދު ރާއްޖެތެރޭގެ ތެރޭގެ ރަށްތަކަށް ވިއްސާ ކުރާނެ ކަމަށް އޭނާ ވިދާޅުވި އެވެ. މާދަމާ ވެސް ރާއްޖޭގެ އެކި ސަރަހައްދުތަކަށް ވިއްސާ ރަކުރާނެ ކަމަށް ވިދާޅުވި އެވެ.

އަންނަ ބުދަ ދުވަހު، އީދު ފާހަގަކުރުމަށް މުޅި ރާއްޖެ އިން ތައްޔާރުވަމުން އަންނައިރު އެ ދުވަހުގެ މޫސުން ލަފާކުރާ ގޮތުގައި މެދު ރާއްޖެތެރެ އާއި ދެކުނަށް ވެސް ވިއްސާރަ ކުރާނެ ކަމަށް އޮފިޝަލް ވިދާޅުވި އެވެ.

މެޓުން ލަފާކުރާ ގޮތުގައި އީދު ދުވަހު، ރާއްޖޭގެ އުތުރަށް މޫސުން ރަނގަޅުވާނެ އެވެ.

ބޯކޮށް ވާރޭވެހުމާ އެކު ގުގުރާނެ ކަމަށް ލަފާކޮށް ރ. އަތޮޅުން ފެށިގެން ލ. އަތޮޅަށް މި ވަގުތު ވެސް އޮތީ ވައިޓް އެލާޓް ނެރެފަ އެވެ.

މެޓުން އާންމުކޮށްފައިވާ ތަފާސްހިސާބުތައް ދައްކާ ގޮތުން މިދިޔަ 24 ގަޑިއިރުގެ ތެރޭގައި އެންމެ ބޯކޮށް ވާރޭ ވެހުނީ ކ. ގާފަރަށެވެ. އެ ރަށަށް 52.9 މިލިމީޓަރުގެ ވާރޭވެހުނެވެ. ގދ. ކާޑެއްދު އަށް 49 މިލިމީޓަރުގެ ވާރޭވެހުނެވެ.