ސްޕެޝަލް އޮލިމްޕިކްސް ފުޓްބޯޅަ؛ ރާއްޖޭގެ ތާރީހީ މޮޅު އިންޑިއާއާ ދެކޮޅަށް

ސްޕެޝަލް އޮލިމްޕިކްސް ފުޓްބޯޅައިން، ރާއްޖޭން ހޯދި ތާރީހީ ފުރަތަމަ މޮޅު އިންޑިއާ އާ ދެކޮޅަށް ކާމިޔާބުކޮށްފި އެވެ.

ބަންގްލަދޭޝްގައި މިހާރު ކުރިއަށްދާ ދެކުނު އޭޝިއާގެ ސެވަން ސައިޑް ސްޕެޝަލް އޮލިމްޕިކްސް ފުޓްބޯޅަ މުބާރާތުގައި ރާއްޖޭން، އިއްޔެ އިންޑިއާ ބަލި ކުރީ 4-2 ންނެވެ.

ޑާކާގެ ބަޝުންދަރާ އެރީނާގައި ކުޅުނު މެޗުގައި ރާއްޖޭގެ ހުމައިދު ވަނީ ހެޓްރިކް ހަދައިފަ އެވެ. ދިވެހި ޓީމުގެ އަނެއް ލަނޑު ޖެހީ އަޝްހަމް އެވެ.

"މި ހިތްވަރުގަދަ ފަހުލަވާނުނަން ސާބަސް، ދަނޑުގައި ދެއްކި މިސާލާއި ކުޅުނު މޮޅު ކުޅުމަށް އައްސެރިބަހާއި ސާބަސް. ރާއްޖެ އަށް ކޮންފަދަ އާދަޔާ ހިލާފު ދުވަހެއް،" ތާރީހީ މޮޅާ އެކު ސްޕެޝަލް އޮލިމިކް މޯލްޑިވްސް ނެރުނު ސްޓޭޓްމެންޓްގައި ވެއެވެ.

ބަންގްލަދޭޝްގެ ސްޕެޝަލް އޮލިމްޕިކްސް އެސޯސިއޭޝަނުން އިންތިޒާމުކުރާ މި މުބާރާތުގައި ދެކުނު އޭޝިއާގެ ހަތަރު ގައުމުގެ އިތުރުން ހޮންކޮން އާއި އިންޑޮނޭޝިއާ ވެސް ބައިވެރި ވެއެވެ.