ފުވައްމުލަކުގެ ތިން ގޮނޑި ވެސް ޕީއެންސީން ކާމިޔާބުކޮށްފި

މިއަދު ބޭއްވި ރައްޔިތުންގެ މަޖިލީހުގެ އިންތިހާބުގައި ފުވައްމުލަކުގެ ތިން ގޮނޑި ވެސް ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ކާމިޔާބުކޮށްފި އެވެ.

އެންމެ ފަހުން ބޭއްވި މަޖިލިސް އިންތިހާބުގައި ފުވައްމުލަކުގެ ތިން ގޮނޑި ވެސް އެމްޑީޕީން ކާމިޔާބު ކުރި ނަމަވެސް މިއަދު ބޭއްވި މަޖިލީހުގެ އިންތިހާބުގައި ތިން ގޮނޑި ވެސް ކާމިޔާބުކުރީ ޕީއެންސީގެ ކެންޑިޑޭޓުންނެވެ.

ފުވައްމުލަކު އުތުރު ދާއިރާއަށް ހަމަދު އަބްދުﷲ ހޮވިފައިވާއިރު، މެދު ދާއިރާއަށް ހޮވިފައިވަނީ އެ ދާއިރާގެ މެމްބަރު ކަން ކުރިން ވެސް ކުރެއްވި އަލީ ފަޒާދެވެ. އޭނާއާ އެންމެ ގާތުން ވާދަ ކުރެއްވީ އެމްޑީޕީގެ ފަރާތުން ވާދަ ކުރެއްވި އަދި އެ ދާއިރާގެ މިހާރުގެ ވެސް މެމްބަރު ހުސައިން މުހައްމަދު ދީދީ އެވެ.

ދެކުނު ދާއިރާގެ ގޮނޑި ކާމިޔާބު ކުރެއްވީ އެމްޑީޕީގެ ކެންޑިޑޭޓް ނަޒްރާ ނަސީމާ ވާދަ ކުރެއްވި އިބްރާހިމް ހުސައިނެވެ. ފުވައްމުލަކު އުތުރު ދާއިރާއަށް އެމްޑީޕީގެ ކެންޑިޑޭޓަކު ވާދަ ނުކުރި ނަމަވެސް އެ ޕާޓީން ތާއީދުކުރީ ޕީޕަލްސް ނޭޝަނަލް ފްރޮންޓް (ޕީއެންއެފް) ގެ ކެންޑިޑޭޓް މުހައްމަދު ޝަރަފުއްދީނަށެވެ.

މަޖިލިސް އިންތިހާބުގައި ފުވައްމުލައް ސިޓީގެ އިތުރުން މާލެ އާއި އައްޑޫ ސިޓީގެ ގިނަ ގޮނޑިތައް ވެސް ކާމިޔާބުކުރީ ޕީއެންސީންނެވެ. އަދި މިހާތަނަށް އާންމުކުރި ނަތީޖާ ދައްކާ ގޮތުން ޕީއެންސީއަށް މަޖިލީހުގެ ބޮޑު އަޣުލަބިއްޔަތު ވަނީ ލިބިފަ އެވެ.