މީޑިއާތައް މާލީ ގޮތުން މިނިވަންކުރަން ގައުމީ ފެންވަރެއްގައި މަސައްކަތް ކުރަންޖެހޭ: އެމްއެމްސީގެ ރައީސް

ރާއްޖޭގެ މީޑިއާތައް މާލީ ގޮތުން މިނިވަން ކަމާއެކު ހިނގާ ތަންތަނަށް ހެދުމަށްޓަކައި ގައުމީ ފެންވަރެއްގައި މަސައްކަތްތަކެއް ކުރަން ޖެހޭ ކަމަށް މީޑިއާ ކައުންސިލްގެ ރައީސް އަހުމަދު މުސްތަފާ (މުސްތޮ) ވިދާޅުވެއްޖެ އެވެ.

ދުނިޔޭގެ ނޫސްވެރިކަމުގެ މިނިވަންކަމުގެ ދުވަހާ ގުޅިގެން ދެއްވި ހިތޯބެއްގައި ވިދާޅުވީ ނޫސްވެރިކަމުގެ އެންމެ މައިގަނޑު އަސާސްތައް ކަމުގައިވާ ތެދުވެރިކަމާއި ޒިންމާދާރުކަމާއެކު ހަބަރު ފެތުރުމުގައި ނޫސްވެރިން ދެމިތިބުމަށް އެންމެ ބޮޑު ބާރެއް ލިބިގެންދާނީ އެ ފަރާތްތަކުގެ މާލީ މިނިވަން ހޯދުމަށް އަހަންމިއްޔަތުކަން ދީގެން ކަމަށެވެ.

"ނޫސްވެރިކަމުގެ މިނިވަންކަމުގެ ދުވަސް އަޅުގަނޑުމެން ފާހަގަކުރަމުން ދާއިރު ދިވެހި ނޫސްވެރިންނާއި މީޑިއާތަކަށް މާލީ މިނިވަންކަން ހޯދުމަށް، ގައުމީ، އިދާރީ އަދި ފަރުދީ ފެންވަރުގައިވެސް ގިނަގުނަ މަސައްކަތްތަކެއް ކުރަންޖެހޭ،" މުސްތޮ ވިދާޅުވި އެވެ.

ނޫސްވެރިކަމުގެ މިނިވަންކަން ރާއްޖޭގެ ޤާނޫނުއަސާސީން ކަށަވަރުކޮށްދީފައިވީ ނަމަވެސް ނޫސްވެރިންނާއި މީޑިއާތަކަށް އަބަދުވެސް ގިނަ ގޮންޖެހުންތައް ކުރިމަތިވަމުންދާ ކަމަށް އޭނާ ވިދާޅުވި އެވެ.

ގާނޫނީ ގޮތުންނާއި އެހެނިހެން ގޮތްތަކުން އެކިއެކި ހުރަސްތައް ކުރިމަތިވާ ކަމަށާއި ނޫސްވެރިންނަށް އަނިޔާ ކުރުމާއި ފުރައްސާރަ ކުރުމާއި އިންޒާރު ދިނުން ފަދަ ކަންކަން ހުއްޓާލައިގެން މެނުވީ ޑިމޮކްރަސީގެ އަސާސް ގައުމުގައި ނޯންނާނެ ކަން އެންމެން ގަބޫލު ކުރަން ޖެހޭ ކަމަށް ވެސް މުސްތޮ ވިދާޅުވި އެވެ.

"ހަމަ އެހެންމެ ރާއްޖެއިން މަރާލާފައިވާ ދެ ނޫސްވެރިންނާއި ފަލަސްތީނުގެ ޣައްޒާއިން މަރާލާފައިވާ އެތަކެއް ނޫސްވެރިންނަށް އިންސާފު ނުލިބި ހޭދަވާ ކޮންމެ ދުވަހަކީ ވެސް، މުޅި ދުނިޔޭގެ ނޫސްވެރިކަމަށް ވެސް ލިބޭ އިއާދަނުކުރެވޭ ބޮޑު ގެއްލުމެއްކަމުގައި އަޅުގަނޑު ދެކެން،" އޭނާ ވިދާޅުވި އެވެ.

މުސްތޮ ވިދާޅުވި ގޮތުގައި އާޓިފިޝަލް އިންޓެލިޖެންސް އާއި އެހެނިހެން ގޮތް ގޮތުން ނޫސްވެރިކަމަށް ވެސް އިންގިލާބީ ބަދަލުތަކެއް އައިސްފައިވާ އިރު މީޑިއާގެ ވަސީލަތްތަކުން ފަތުރާ ހަބަރާއި މައުލޫމާތަކީ ނުފޫޒުން އެއްކިބާވެފައިވާ ސައްހަ މައުލޫމާތުތަކަށް ހެދުމަށް ސަމާލު ކަން ދޭން ޖެހެ އެވެ.