ދިވެއްސަކު ގެނބެނިކޮށް ސަލާމަތްކުރި ބޭރުގެ ދެމަފިރިންގެ އަގު ވަޒަންކޮށްފި

ބ. އަތޮޅުގައި އޮންނަ ދުސިތު ތާނީ ރިސޯޓުގެ މުވައްޒަފަކު މޫދަށް ވެއްޓި، ގެނބެނިކޮށް އޭނާ ސަލާމަތްކުރި ރާއްޖެއިން ބޭރުގެ ދެމަފިރިއެއްގެ އަގު ވަޒަންކޮށްފި އެވެ.

ބ. އަތޮޅު ފުލުހުންގެ ހިދުމަތުން ބުނީ އެ ރިސޯޓަށް ހަނީމޫނަށް ގޮސް އުޅޭ ޖޯޑަން ޑަނިލް ވަން ޑައިކާއި އޭނާގެ އަންހެނުންގެ އަގު ވަޒަންކުރީ މިދިޔަ މަހުގެ 28 ގައި ހިނގި ހާދިސާއެއްގައި ރިސޯޓުގެ މުވައްޒަފަކު ގެނބެނިކޮށް ސަލާމަތް ކުރުމުން ކަމަށެވެ.

ފުލުހުން ބުނިގޮތުގައި ޑިއުޓީގައި ހުރި މުވައްޒަފަކު ވޯޓާ ވިލާއެއްގެ ޑެކުމަތިން މޫދަށް ވެއްޓި، އޭނާ ގެނބެމުން ދަނިކޮށް ފެނުނީ މި ދެމަފިރިންނަށެވެ. އަދި އެމީހުން ވަނީ އޭނާ ސަލާމަތްކޮށްފަ އެވެ.

ފުލުހުން ބުނީ ހިތާމަވެރި ހާދިސާއެއް ނުހިނގާ ސަލާމަތްވީ އެދެމަފިރިން އެވަގުތު ދެއްކި ގަދަ ހިތްވަރުން ކަމަށެވެ.

އެހެންވެ، ދިވެހިންގެ ފަރާތުން އެ ދެމަފިރިންނަށް ޝުކުރު އަދާކޮށް ފުލުހުން ކުރި ޕޯސްޓުގައި ވަނީ އެމީހުން އެވަގުތު ނެގި އަވަސް ފިޔަވަޅުތަކުގެ ސަބަބުން މީހެއްގެ ފުރާނަ ސަލާމަތްވީތީ ޝުކުރު އަދާކޮށްފަ އެވެ.

ބ. އަތޮޅު ފުލުހުން ވެސް ވަނީ އިއްޔެ އެ ރިސޯޓަށް ގޮސް އެ ދެމަފިރިންނާ ވެސް ބައްދަލުކޮށް، އަގު ވަޒަން ކުރުމުގެ ގޮތުން ހަނދާނީ ފިލައެއް އެމީހުންނަށް ދީފަ އެވެ.