މަޑިފުއްޓަށް ޑްރަގު އެތެރެކުރި މީހަކަށް 27 އަހަރުގެ ޖަލު ހުކުމެއް

ތ. މަޑިފުއްޓަށް މަސްތުވާތަކެތި އެތެރެކުރި މީހެއްގެ މައްޗަށް ކުށް ސާބިތުވެ 27 އަހަރުގެ ޖަލު ހުކުމެއް އެ ރަށު މެޖިސްޓްރޭޓް ކޯޓުން މިއަދު އިއްވައިފި އެވެ.

އެ މައްސަލާގައި ކުށް ސާބިތުވީ އެ ރަށު ދޮންވެލީގޭ، ހުސައިން ޝަރޫންގެ މައްޗަށެވެ.

ފުލުހުންގެ ފަރާތުން މީޑިއާ އަށް ހާއްސަ ކޮށްފައިވާ ވަޓްސްއެޕް ގްރޫޕަށް މިރޭ ފޮނުވި މެސެޖެއްގައި ފުލުހުން ބުނީ މިދިޔަ ފެބްރުއަރީ މަހުގެ ފަސްވަނަ ދުވަހުގެ ވަގުތެއްގައި މަޑިފުއްޓަށް މަސްތުވާތަކެތި އެތެރެކުރާ ކަމަށް ބުނެ ލިބުނު މައުލޫމާތަކާ ގުޅިގެން އެ ރަށުގެ ބަނދަރުމަތިން ޝަރޫން ހުއްޓުވައި ބަލައި ފާސްކުރި ކަމަށެވެ.

އެ ދުވަހު ޝަރޫން ބަލައި ފާސްކުރުމުގެ ތެރޭގައި އޭނާގެ އަތުން މަސްތުވާތަކެތި ފެނުނު ކަމަށް ފުލުހުން ބުންޏެވެ.

އެ މައްސަލާގައި އޭނާގެ މައްޗަށް ކުށް ސާބިތުވާ ކަމަށް މަޑިފުށީ ކޯޓުން ނިންމައި، އޭނާ 27 އަހަރާއި 11 މަހާއި 20 ދުވަހަށް ޖަލަށް ލުމަށް ހުކުމްކޮށްފައިވާ ކަމަށް ފުލުހުން ބުންޏެވެ.