އަހުމަދިއްޔާގެ 35 ވަނަ އަހަރީ ދުވަސްް ފާހަގަކޮށްފި

އަހުމަދިއްޔާ އިންޓަނޭޝަނަލް ސްކޫލުގެ 35 ވަނަ އަހަރީ ދުވަސް މިިއަދު ފާހަގަކޮށްފި އެވެ.

ސްކޫލުގެ އަހަރީ ދުވަސް ފާހަގަކުރުމަށް އެ ސްކޫލުގައި ހެނދުނު ވަނީ ހާއްސަ އެސެމްބްލީއެއް ބާއްވައިފަ އެވެ.

އަހުމަދިއްޔާގައި ޓީޗަރެއްގެ ގޮތުގައި ކުރިން މަސައްކަތް ކުރެއްވި އަދި މިހާރުގެ ހޯމް މިނިސްޓަރު އަޒްލީން އަހުމަދު ޝަރަފުވެރިކޮށްދެއްވި އެ ރަސްމިއްޔާތުގައި ވަނީ، ސްކޫލުގެ އެކި މަގާމުތަކަށް ހޮވުނު ދަރިވަރުންނަށް ސޭޝް ހަވާލުކޮށްދެއްވައިފަ އެވެ. އަދި އަހަރީ ދުވަހަށް ހާއްސަކޮށް އެޅި ކޭކެއް ވެސް، މިނިސްޓަރު ވަނީ ފަޅުއްވައި ދެއްވައިފަ އެވެ.

އެސެމްބްލީ ޝަރަފުވެރިކޮށްދެއްވައި ވާހަކަދައްކަވަމުން އަޒްލީން ވިދާޅުވީ އެ ސްކޫލުގެ ދަރިވަރުން ދައްކާފައިވާ ނަތީޖާއަކީ އެހެން ސްކޫލުތަކަށް ހުރި ނަމޫނާއެއް ކަމަށެވެ. އަދި ތައުލީމީ ދާއިރާއަށް ބަދަލުތަކެއް ގެނައުމުގައި އަހުމަދިއްޔާއިން ވަރަށް ބޮޑު ދައުރެއް އަދާކޮށްފައިވާ ކަމަށް އަޒްލީން ވިދާޅުވި އެވެ.

އަހުމަދިއްޔާ އިންޓަނޭޝަނަލް ސްކޫލުގެ ޕްރިންސިޕަލް މުހައްމަދު ރަޝީދު ވިދާޅުވީ، މިިދިޔަ އަހަރަކީ އަހުމަދިއްޔާގެ ހަޔާތުގައި އެންމެ ކާމިޔާބު އަހަރު ކަމަށާއި، އިމްތިހާނުތަކުން ފާސްވި ދަރިވަރުންގެ އަދަދު ވެސް ވަރަށް ބޮޑަށް އިތުރުވެފައިވާ ކަމަށެވެ. މީގެ އިތުރުން އެކި މުބާރާތްތަކުން ވެސް އަހުމަދިއްޔާގެ ދަރިވަރުން ޗެމްޕިއަންކަން ހޯދާފައިވާކަން އޭނާ ފާހަގަކުރެއްވި އެވެ.

"މިިދިޔަ އަހަރަކީ މި ސްކޫލުގެ ތާރީހުގައި ވެސް އެންމެ ކާމިޔާބު އަހަރު. އިމްތިހާނުގައި ބައިވެރިިވި ދަރިވަރުންގެ ތެރެއިން ގިނަ ދަރިވަރުން ފަސް މާއްދާއިން ފާސްވި. ބައިވެރިވި ކުޅިވަރުގެ ގިނަ މުބާރާތްތަކުން ވެސް ޗެމްޕިއަންކަން ހޯދި. އެއީ ވަރަށް ބޮޑު ކާމިޔާބީއެއް،" ރަޝީދު ވިދާޅުވި އެވެ.

ރަޝީދު ވިދާޅުވީ ސްކޫލަށް ދިމާވެފައިވާ އެންމެ ބޮޑު ގޮންޖެހުމަކީ ޖާގައިގެ ދަތިކަން ކަމަށާއި އެކަން ހައްލުކުރުމަށް މަސައްކަތް ކުރަމުން އަންނަކަމަށެވެ. ފައުންޑޭޝަން ސްޓޭޖުން ފެށިގެން ކިޔަވައިދެމުން އަންނަ އެ ސްކޫލުގައި މިހާރު 2800 ދަރިވަރުން އަންނަނީ ތައުލީމް ހާސިލްކުރަމުންނެވެ.

މައިގަނޑު ގޮތެއްގައި ސައިންސާއި ބިޒްނަސް ސްޓްރީމް ކިޔަވައިދޭ އަހުމަދިއްޔާ، އިންޓަނޭޝަނަލް ސްކޫލަކަށް ބަދަލުކުރީ 2015 ވަނަ އަހަރުގެ ޖެނުއަރީ 14 ވަނަ ދުވަހު އެވެ. އެއާއެކު އިންޓަނޭޝަނަލް ސްކޫލުތަކުގެ ފެންވަރަށް އެ ސްކޫލު ބަދަލުކޮށް، ފެންވަރު ރަނގަޅު ހިދުމަތް ލިބޭނެކަމަށް ރަޝީދު ވިދާޅުވި އެވެ.