މިޔަރުގެ ހަމަލާގައި ނިޔާވި ޒައިދާން، ރަސްމީ އިއްޒަތުގައި ވަޅުލައިފި

ސިފައިންގެ ހައި ރިސްކް ޓްރެއިނިން އެއް ހަދަމުން ދަނިކޮށް މިޔަރެއް ދިން ހަމަލާގައި ރޭ ނިޔާވި ކޯޕްރަލް މުހައްމަދު ޒައިދާން، ރަސްމީ އިއްޒަތުގައި އޭނާގެ އުފަން ރަށް، ރ. އުނގޫފާރުގައި މިއަދު ވަޅުލައިފި އެވެ.

އެމްއެންޑީއެފުން ބުނީ ޒައިދާން، 23، ގެ ޖަނާޒާ ބޭއްވީ ރަސްމީ އިއްޒަތުގެ ދެ ވަނަ ދަރަޖައިގައި ކަމަށެވެ. އެ ޖަނާޒާގައި ހަތް ބަޑީގެ ސަލާމެއް އެރުވި އެވެ.

އޭނާ ނިޔާވީ ލ. މާވަށް ކައިރީގައި އޮތް ކަނޑުމަތީގެ ޓްރެއިނިންގައި ލިބުނު އަނިޔާތަކަށް، އެ އަތޮޅު ގަމު ރީޖަނަލް ހޮސްޕިޓަލުން ފަރުވާ ދެމުން ދަނިކޮށް ރޭ 8:40 ހާއިރެވެ. އޭގެ ފަހުން ޖަނާޒާ ބޭއްވުމަށް ޒައިދާންގެ ހަށިގަނޑު ވަނީ އުނގޫފާރަށް ގެންގޮސްފަ އެވެ.

އެ އިދާރާއިން ބުނީ އަސްރު ނަމާދަށް ފަހު ބޭއްވި ޖަނާޒާގައި ނޮދަން އޭރިއާގެ ކޮމާންޑުގެ ކޮމާންޑަރު، ބްރިގޭޑިއާ ޖެނެރަލް އިސްމާއިލް ޝަރީފް އަދި އެ ތަނުގެ އިސްވެރިން ބައިވެރިވެވަޑައިގެންނެވި ކަމަށެވެ. އެ އާއިލާއާ ބައްދަލުކުރައްވައި އެމްއެންޑީއެފުން ވަނީ ތައުޒިޔާ ކިޔައި، ޒައިދާންގެ ސަންދޯކުގައި އަޅާފައި އޮތް ގައުމީ ދިދަ، އެ އާއިލާއާ ހަވާލުކޮށްފަ އެވެ.

ޒައިދާން ނިޔާވުމުގެ ހިތާމައިގައި، މިއަދުން ފެށިގެން ދެ ދުވަސް ވަންދެން ސިފައިންގެ މަރުކަޒުތަކުގައި ސިފައިންގެ ދިދަ ވަނީ ބައި ދަނޑިއަށް ތިރިކޮށްފަ އެވެ.