ޓެލެތޯން އިން ލިބޭ ފައިސާ އޮޑިޓް ކުރާނެ، ފަލަސްތީނަށް ފޯރުކޮށްދޭނީ ދެފުށް ފެންނަ ގޮތަށް: ޒީނާ

ފަލަސްތީނުގެ ރައްޔިތުންނަށް އެހީވުމަށްޓަކައި މިއަދު ކުރިއަށް ގެންދާ ޓެލެތޯން އޮޑިޓް ކުރާނެ ކަމަށާއި އެ ހަރަކާތުން ލިބޭ ފައިސާ އޭގެ ހައްގުވެރިންނާ ހަމައަށް ފޯރާނެ ކަން ޔަގީން ކުރާނެ ކަމަށް ޕީއެސްއެމްގެ މެނޭޖިން ޑިރެކްޓަރު ޒީނާ ޒާހިރު ވިދާޅުވެއްޖެ އެވެ.

"ފަލަސްތީނާ އެކު ދިވެހީން" ނަމުގައި ރައީސް ޑރ. މުހައްމަދު މުއިއްޒުގެ އިސްނެންގެވުމަކަށް ދައުލަތުގެ މީޑިއާ ޕީއެސްއެމުން އިންތިޒާމު ކޮށްގެން މިރޭ ދަންވަރު 12 ޖަހަންދެން ކުރިއަށް ގެންދާ ޓެލެތޯން ފެށުމުގެ ރަސްމިއްޔާތުގައި ޒީނާ ވިދާޅުވީ، އެ ހަރަކާތުގެ ކަންކަން ބެލުމާއި އަދި ލިބޭ ފައިސާ ފަލަސްތީނަށް ރައްދު ކުރުމާ ގުޅޭ ކަންކަން ހިނގާ ގޮތް ބެލުމަށް މިނިވަން އޮޑިޓަރެއްގެ ގޮތުގައި "ކްރޯ މޯލްޑިވްސް" ހަމަޖައްސާފައިވާ ކަމަށެވެ.

"ކްރޯ މޯލްޑިވްސް އިން ވެދޭ އެހީތެރިކަން ފާހަގަކުރަން. ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ) މެދުވެރިކޮށް މި ފައިސާ ފަލަސްތީނަށް ފޯރުކޮށްދެވޭނީ. އެންމެ ފުރަތަމަ އަޅުގަނޑުމެން މި ފައިސާ ހަވާލުކުރާނީ ފޮރިން މިނިސްޓްރީ އަށް، ފޮރިން މިނިސްޓްރީން އަންރުއާއާ ހަވާލު ކުރާނީ،" ޒީނާ ވިދާޅުވި އެވެ.

އެ ރަސްމިއްޔާތުގައި ވާހަކަ ދައްކަވަމުން ފޮރިން މިނިސްޓަރު މޫސާ ޒަަމީރު ވަނީ ފަލަސްތީނަށް އެހީވާ އދ. ގެ ފަންޑަށް ރާއްޖެ އިން ދޭ އެހީ5،000 ޑޮލަރުން 50،000 ޑޮލަރަށް އިތުރު ކުރަން ރައީސް މުއިއްޒު ނިންމާފައިވާކަން އިއުލާން ކުރައްވައިފަ އެވެ.

ޒަމީރު ވިދާޅުވީ ޓެލެތޯން އިން ލިބޭ ފައިސާ "އަންރުއާ"އާ ހަވާލުކުރާނީ ފޮރިން މިނިސްޓްރީ އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް އެ މިނިސްޓްރީގެ ބެލުމުގެ ދަށުން ކަަމަށެވެ.

"ކްރޯވް މޯލްޑިވްސް އެލްއެލްޕީ ވަނީ މި މަސައްކަތާއި ހަވާލުވެފައި. އެ ބޭފުޅުން އޮޑިޓް ކުރެެއްވީމާ އެ ފައިސާ އަޅުގަނޑުމެންގެ ބެލުމުގެ ދަށުން ފިނޭންސް މިނިސްޓްރީ މެދުވެރިކޮށް އަންރުއާ ހަވާލުކޮށް، އެ ފައިސާ ލިބުނުކަން ޔަގީން ކުރުމަށް ފަހު ރައްޔިތުންނަށް އަޅުގަނޑުމެން އަންގައި ދޭނަން،" މިނިސްޓަރު ވިދާޅުވި އެވެ.

ފަލަސްތީނަށް އެހީވުމަށް ބާއްވާ ޓެލެތޯނުގައި މާލެ ސަރަހައްދުގައި 13 ފަންޑު ފޮށި ބަހައްޓާފައިވެ އެވެ. ފޮށިތައް ކައިރިއަށް ނުދެވޭ ފަރާތްތަކަށް ދިވެހި ފައިސާއިން ނަމަ 7730000655865 އެކައުންޓަށް އަދި ޑޮލަރުން ނަމަ 7730000655866 އެކައުންޓަށް ޖަމާކުރެވޭނެ ކަމަށް ޕީއެސްއެމުން ބުންޏެވެ.

މިއަދުގެ ހެނދުނު 8 އިން މިރޭ ދަންވަރު 12 އާ ހަމައަށް ޓެލެތޯނެއް ކުރިއަށް ގެންދާއިރު ފަލަސްތީނުގެ ރައްޔިތުންގެ ހައްގުގައި ކުރާ މަސައްކަތް މި ސަރުކާރުން އިތުރު ކުރުމުގެ ގޮތުން އިޒްރޭލުގެ ޕާސްޕޯޓު ރާއްޖޭގައި މަނާކުރަން މިހާރު ވަނީ ގާނޫނު އިސްލާހު ކުރުމުގެ އަމަލީ މަސައްކަތް ރައްޔިތުންގެ މަޖިލިިހުގައި ފަށައިފަ އެވެ.