ވިސާ ނުލިބުމުން ނަބާ އަށް ޓްރޭނިން އަށް ދެވޭ ގޮތެއް ނުވި

އޮލިމްޕިކްސް އިން ޖާގަ ކަށަވަރުވެފައިވާ ބެޑްމިންޓަން ތަރި ފާތިމަތު ނަބާހާ އަބްދުރައްޒާގަށް ދެކުނު ކޮރެއާގެ ވިސާ ހަމަނުޖެހުމުން ޓްރެއިނިން އަށް ނުދެވި މަޑުކުރަން ޖެހިއްޖެ އެވެ.

އޮލިމްޕިކްސް އިން ވިދިވިދިގެން ދެ ވަނަ ފަހަރަށް ޖާގަ ލިބުމުން، ގޭމްސް އަށް ދިއުމުގެ ކުރިން ކޮރެއާގައި ޓްރޭނިން ހެދުމުގެ ފުރުސަތު ނަބާހާ އަށް ފަހިވީ އެވެ.

ވިސާ ނުލިބޭ ގޮތްވީ ފުރަން ޓިކެޓް ވެސް ނެގި ފަހުންނެވެ.

ނަބާހާ އަށް ވިސާ ނުލިބުނު މައްސަލައިގައި ބެޑްމިންޓަން އެސޯސިއޭޝަނުން އެކަށީގެންވާ ޖަވާބެއް ނުލިބުނެވެ.

އެ އެސޯސިއޭޝަންގެ ސީނިއާ އޮފިޝަލަކު ވިދާޅުވީ ލަންކާ އަށް ޓްރޭނިން ކޭމްޕްގައި ނަބާހާ ފޮނުވަން ވާހަކަތަކެއް ދެކެވުނު ކަމަށެވެ. ކޮރެއާގެ ޓްރޭނިންއާ ބެހޭގޮތުން ސާފު ޖަވާބެއް ނުދެ އެވެ.

"ޓެކްނިކަލް ޓީމާ ވާހަކަ ދައްކާލާފަ ތިކަން ދިޔަ ގޮތް ސާފުކޮށްލަން ޖެހޭނީ،" ބީއޭއެމްގެ ސީނިއާ އޮފިޝަލް "މިހާރު" އަށް ވިދާޅުވި އެވެ.

ފްރާންސްގެ ވެރިރަށް ޕެރިހުގައި މި މަހު 26 ގައި ފަށާ އޮލިމްޕިކްސް އިން ނަބާހާ އަށް ޖާގަ ދިނީ އޮލިމްޕިކްސްގެ ޓްރައިޕާޓައިޓް ކޮމިޝަނުން، އޭނާގެ ޕާފޯމަންސަށް ބެލުމަށް ފަހު ނަތީޖާތައް ރަނގަޅު ވުމުންނެވެ.

ޓްރައިޕާޓައިޓް ކޯޓާގެ ޖާގަ ދެނީ އޮލިމްޕިކްސް ކޮލިފައިން މަރުހަލާގައި ވާދަކޮށް ނެރޭ ނަތީޖާތައް ރަނގަޅު ކުރުމުންނެވެ. މިދިޔަ ތިން އަހަރު ތެރޭ ނަބާހާ އާއި ރާއްޖޭގެ އެހެން ކުޅުންތެރިން ވެސް ވަނީ ގިނަ މުބާރާތްތަކެއްގައި ކުޅެފަ އެވެ.

ޓޯކިޔޯގައި 2021 ގައި ބޭއްވި 2020 ގެ (ކޮވިޑްގެ ސަބަބުން 2021 އަށް ފަސް ކުރި) އޮލިމްޕިކް ގޭމްސްގައި ރާއްޖޭގެ ދިދަ އުފުލި އަންހެން އެތުލީޓަކީ ނަބާ އެވެ. އޭނާ އަކީ އޮލިމްޕިކްސްގައި ރާއްޖޭން ވާދަ ކުރި ބެޑްމިންޓަންގެ ފުރަތަމަ އަންހެން އެތުލީޓް ވެސް މެ އެވެ.

މި އަހަރު ވެސް އޮލިމްޕިކް ގޭމްސް އިން ލިބުނު ފުރުސަތާ އެކު މި ފުރުސަތާ އެކު އޭނާ ވެފައި ވަނީ، ވިދިވިދިގެން ދެ ވަނަ އޮލިމްޕިކްސްއިން ޖާގަ ހޯދި ބެޑްމިންޓަންގެ ފުރަތަމަ އެތުލީޓަށެވެ.