މާލޭގައި ހަށިވިއްކަމުން ދިޔަ ވިއެޓްނާމްގެ ދެ އަންހެނަކު ހައްޔަރުކޮށްފި

މާލޭގައި ހަށިވިއްކަމުން ދިޔަ ދެ ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.

އިމިގްރޭޝަނުން ބުނީ މި ދެ މީހުން ހައްޔަރުކުރީ މާލޭގައި ފުޅާދާއިރާއެއްގައި ހަށިވިއްކާ ކަމުގެ މައުލޫމާތު ފުލުހުންގެ އިންޓެލިޖެންސަށް ލިބުމާ އެކު ރޭ، ހާއްސަ ރެއިޑް އޮޕަރޭޝަނެއްގައި ކަމަށެވެ.

އިމިގްރޭޝަނުން ބުނި ގޮތުގައި އެ އޮޕަރޭޝަނުގައި އަތުލައިގަތީ ވިއެޓްނާމް ދެ އަންހެނެކެވެ.

މި އޮޕަރޭޝަނާ ގުޅޭ ގޮތުން އިމިގްރޭޝަނުން ކުރި ސޯޝަލް މީޑިއާގައި ޕޯސްޓްގައި، އެ ދެ އަންހެނުން އަތުން ފެނުނު ގިނަ އަދަދެއްގެ ފައިސާގެ ފޮޓޯ އާންމުކޮށްފައިވެ އެވެ. އެކަމަކު އިތުރު ތަފްސީލެއް ދީފައެއް ނުވެ އެވެ.

އިމިގްރޭޝަނުން ގެންދަނީ ގާނޫނާހިލާފަށް ރާއްޖޭގައި އުޅޭ ބިދޭސީން ހޯދައި އެމީހުން ރާއްޖެ އިން ފޮނުވާލުމަށް ހާއްސަ އޮޕަރޭޝަންތަކެއް ހިންގަމުންނެވެ. މި ހަފުތާ ތެރޭގައި، މާލޭގައި ގަވައިދާ ހިލާފަށް މާރުކޭޓް ހިނގަމުންދިޔަ ބިދޭސީންތަކެއް ވެސް ހިފަހައްޓާފައިވެ އެވެ.