ބަނގުރަލުގެ ވިޔަފާރިކުރާ ބިދޭސީންތަކެއް ހައްޔަރުކޮށް ޑީޕޯޓްކުރަނީ

މާލޭގައި ފުޅާދާއިރާއެއްގައި ބަނގުރަލުގެ ވިޔަފާރިކުރަމުން އައި ތިން ބިދޭސީއަކު ހައްޔަރުކޮށް، އެ މީހުން ޑީޕޯޓް ކުރަން އިމިގްރޭޝަނާ ހަވާލު ކޮށްފައިވާ ކަމަށް ފުލުހުން މިއަދު ބުނެފި އެވެ.

ކައުންޓާ ނާކޮޓިކްސް އިންޓެލިޖެންސާއި ޑްރަގު އެންފޯސްމަންޓް ގުޅިގެން އިއްޔެ ހިންގި އޮޕަރޭޝަނުގައި ހައްޔަރުކުރީ ބަންގްލަދޭޝްގެ ދެ މީހަކާއި އިންޑިއާގެ މީހެކެވެ. އެއީ ބަންގްލަދޭޝްގެ 52 އަހަރުގެ މުހައްމަދު ބަދަލް އާއި 33 އަހަރުގެ ސައްބިރު ހޮސެއިންގެ އިތުރުން 20 އަހަރުގެ ރާޖް ދަސް އެވެ.

ފުލުހުން ބުނި ގޮތުގައި އެ އޮޕަރޭޝަނުގެ ތެރެއިން، މާލޭގެ ތިން އެޕާޓްމަންޓެއް ބަލައިފާސްކުރިއިރު، ނުވަ ފުޅި ބަނގުރަލާއި ބަނގުރާ ކަމަށް ބެލެވޭ އެއްޗެހި ހުރި ފަސް ލީޓަރުގެ ހަ ފުޅި އާއި 500 އެމްއެލްގެ 78 ފުޅި އާއި 22 ޓައްޕު ފެނިފައިވެ އެވެ. ކުށް ކޮށްގެން ހޯދާފައިވާ ކަމަށް ބެލެވޭ 29،000ރ. އަށް ވުރެ ގިނަ ފައިސާ އާއި 100 ޑޮލަރު ފެނިފައިވާ ކަމަށް ވެސް ފުލުހުން ބުންޏެެވެ.

ފުލުހުން ބުނިގޮތުގައި، އެ މީހުން ހައްޔަރުކުރީ ގަވާއިދާ ހިލާފަށް ބަނގުރާ އުފައްދައި އެ ތަކެތި ގެންގުޅުމާއި ބޭނުންކޮށް އޭގެ ވިޔަފާރިކުރާ ކަމަށް ތުހުމަތުވާ މައްސަލައިގަ އެވެ.