އޭވިއޭޝަން ދާއިރާގެ 150 ކުންފުންޏާއެކު، އެއާ ސާވިސް ވޯލްޑް ކޮންގްރެސް ރާއްޖޭގައި ފަށައިފި

ދުނިޔޭގެ އެކި ގައުމުތަކުގެ އެއާލައިންތަކާއި އެއާޕޯޓުތައް އަދި އޭވިއޭޝަން ދާއިރާގެ އެކި ކުންފުނިތަކާއި އެ ދާއިރާގެ ކަމާބެހޭ މާހިރުން ބައިވެރިވާ އެއާ ސާވިސް ވޯލްޑް ކޮންގްރެސް ފަށައިފި އެވެ.

މިއީ މި ކޮންގްރެސް ސައުތު އީސްޓް އޭޝިއާ ސަރަހައްދުގައި އަދި ރާއްޖޭގައި ބާއްވާ ފުރަތަމަ ފަހަރެވެ. ބުރާސްފަތި ދުވަހުގެ ނިޔަލަށް ކުރުނބާ މޯލްޑިވްސް ރިސޯޓުގައި ބާއްވާ މި ކޮންގްރެސްގެ ފެށުމުގެ ރަސްމިއްޔާތު ބާއްވާފައި ވަނީ ޝެރަޓަން މޯލްޑިވްސްގަ އެވެ.

މި ރަސްމިއްޔާތުގައި އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދު ވިދާޅުވީ މި ކޮންގްރެސް އަކީ އޭވިއޭޝަން ދާއިރާގެ އިތުރުން ޓޫރިޒަމް ދާއިރާގެ ބޭފުޅުންނަށް އެއާ ސާވިސްތަކުގެ ހިދުމަތްތަކުގެ ފެންވަރު ރަނގަޅު ކުރުމަށް މުހިންމު މަޝްވަރާތަކެއް ކުރުމަށް ލިބޭ ފުރުސަތެއް ކަމަށެވެ.

އޭނާ ވިދާޅުވި ގޮތުގައި، އެމްއޭސީއެލްއިން އެއާލައިންތައް އިތުރުކޮށް، ރާއްޖެއަށް އަންނަ ފްލައިޓުތައް އިތުރުކުރުމަށް މިހާރު ކުރަމުންދާ މަސައްކަތްތަކުގެ މުހިންމު ދައުރެއް މި ކޮންފަރެންސްގައި އަދާ ކުރާނެ އެވެ.

ޝަރީފް ވަނީ ރާއްޖޭގައި ޓޫރިޒަމް ދާއިރާ ތަރައްގީކުރުމުގައި އޭވިއޭޝަން ދާއިރާގެ މުހިންމުކަމާއި ވެލާނާ އިންޓަނޭޝަނަލް އެއާޕޯޓުގެ މުހިންމުކަން ފާހަގަކުރައްވާފަ އެވެ. އޭނާ ވިދާޅުވީ މިހާރު ކުރިއަށް ދާ އެއާޕޯޓުގެ ތަރައްގީގެ މަސައްކަތްތަކުގެ އަމާޒަކީ ރާއްޖޭގެ ލަގްޒަރީ ޓޫރިޒަމް ރަމްޒުކޮށްދޭ ފަދަ ތަނަކަށް އެއާޕޯޓު ހެދުން ކަމަށެވެ.

"އަޅުގަނޑުމެން މި މަސައްކަތް ކުރަނީ އިންޑިއަން އޯޝަންގެ އިކޮނޮމިކް ހަބަކަށް ވާ ވަރުގެ ފެންވަރަށް އެއާޕޯޓު ތަރައްގީ ކުރަން. މި ތަން ތަރައްގީ މި ކުރަނީ އާ ޓެކްނޮލޮޖީގެ އެހީގައި ޕެސެންޖަރުންނާއި އެއާލައިންތަކަށް ބޭނުންވާ ފަދަ ޒަމާނީ ހިދުމަތްތައް ދޭ ތަނެއްގެ ގޮތުގައި،" އޭނާ ވިދާޅުވި އެވެ.

މި ރަސްމިއްޔާތުގައި ޝަރީފް ވަނީ އެއާޕޯޓު ތަރައްގީކުރުމުގައި ތިމާވެށި ރައްކާތެރި ކުރެވޭނެ ގޮތްތައް ބަލައި، އިކޯ ފްރެންޑްލީ ސޮލިއުޝަންތަކުގެ އެހީގައި ކާބަން ފުޓް ޕްރިންޓު ކުޑަކުރެވޭނެ ގޮތަށް ކަމަށް ވެސް ވިދާޅުވެފަ އެވެ.

މިއަދު ފެށި މި ކޮންގްރެސްގައި ދެމެހެއްޓެނިވި ގޮތެއްގައި އެއާ ސާވިސް ތަރައްގީކުރުމާ ގުޅޭ ޕެނަލް ޑިސްކަޝަނެއްގެ އިތުރުން އެއާލައިންތަކުން އެކި މައުލޫތަކަށް ވާހަކަ ދައްކާނެ އެވެ.

މި ކޮންގްރެސްގައި 27 އެއާލައިނާއި 17 އެއާޕޯޓު ހިމެނޭ ގޮތަށް ވައިގެ ސިނާއަތުގެ އެކި ފަންތީގެ ޖުމްލަ 150 ކުންފުނިން ބައިވެރިވެ އެވެ. މި ކޮންގްރެސް އަކީ ގްލޯބަލް ޓްރެވަލް އިންވެސްޓްމަންޓުން ބާއްވާ ކޮންގްރެސްއެކެވެ.