ހައި އެޗީވާސް ސްކޮލަޝިޕް 117 ދަރިވަރަކަށް

މިދިޔަ އަހަރު ބޭއްވި އޭ ލެވެލް އިމްތިހާނުން ފަސް މާއްދާ އިން އޭ އަދި އެ އަށް ވުރެ މަތިން ހޯދި 117 ދަރިވަރަކަށް ހައި އެޗީވާސް ސްކޮލަޝިޕް މިރޭ ދީފި އެވެ.

މަތީ ސާނަވީ އިމްތިހާނުގައި ރާއްޖޭގެ 45 ސްކޫލަކުން 1،407 ދަރިވަރަކު ބައިވެރިވެފައިވާއިރު 136 ދަރިވަރަކު ވަނީ ފަސް މާއްދާ އިން މަތީ ގްރޭޑްތައް ހޯދައިފަ އެވެ.

އެ ދަރިވަރުންގެ ތެރެއިން 19 ދަރިވަރަކު ވަނީ ފަސް މާއްދާ އިން "އޭ ސްޓާ" ހޯދައި، ރައީސްގެ ސްކޮލާޝިޕް ހާސިލްކޮށްފަ އެވެ. އަދި 117 ދަރިވަރަކު ފަސް މާއްދާ އިން "އޭ" ހޯދައި ހައި އެޗީވާސް ސްކޮލާޝިޕް ހާސިލްކުރި އެވެ.

ހައި އެޗީވާސް ސްކޮލަޝިޕް ހާސިލްކުރި ދަރިވަރުންގެ ތެރޭގައި ރައީސް ޑރ. މުހައްމަދު މުއިއްޒުގެ ދަރިކަނބަލުން ޔަސްމީން މުހައްމަދު މުއިއްޒު ވެސް ހިމެނެ އެވެ. ސީއެޗްއެސްއީ އިން އޭ ލެވެލް ނިންމި ޔަސްމީން ވަނީ ފަސް މާއްދާ އިން އޭ ފާސް ހޯއްދަވައިފަ އެވެ.

ހައި އެޗީވާސް ސްކޮލަޝިޕް ލިބުނު ދަރިވަރުންނަށް ލިޔުން ހަވާލުކޮށްދެއްވީ އެކަމަށްޓަކައި ހުރަވީ ސްކޫލުގައި މިރޭ ބޭއްވި ރަސްމިއްޔާތުގައި ހަޔާ އެޑިޔުކޭޝަން މިނިސްޓަރު ޑރ. މަރްޔަމް މާރިޔާ އެވެ.

އެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ވިދާޅުވީ، އެއީ ދިވެހި ޒުވާނުންގެ އިލްމާއި ހުނަރުވެރިކަން ތަރައްގީކޮށް، ގައުމުގެ ކުރިމަގު ބިނާކުރާނެ ހުނަރުވެރި ޖީލެއް ބިނާކުރުމަށް ދޭ ސްކޮލާޝިޕްތަކެއް ކަމަށެވެ.

މިނިސްޓަރު ވަނީ ސްކޫލު މަރުުހަލާގައި ދަރިވަރުން ހޯދި ފަދަ ރަންވަނަތައް މަތީ ތައުލީމީ ހަޔާތުގައި ވެސް ހޯދައި، ގައުމަށް ހިދުމަތް ކޮށްދިނުމަށް އެދިވަޑައިގެންފަ އެވެ. އަދި ކިޔަވަން ލިބުނު ފުރުސަތުގެ ބޭނުން ރަނގަޅަށް ހިފުމަށް ވެސް ނަސޭހަތްތެރިވެވަޑައިގެންނެވި އެވެ.

"އަޅުގަނޑު ތިޔަ ކުދިންނަށް ދޭން ބޭނުންވާ އެއް މެސެޖަކީ، ބޭރު ގައުމެއްގައި އުޅޭއިރު ތިޔައިން ކޮންމެ ކުއްޖަކީ ވެސް މި ގައުމުގެ އެމްބަސެޑަރެއްކަން ދަނެގެން އުޅުން. ގައުމު ތަމްސީލު ކުރުމުގައި ރަނގަޅު ނަމޫނާއަކަށް ވުމަކީ ވަރަށް މުހިއްމު ކަމެއް،" މިނިސްޓަރު ވިދާޅުވި އެވެ.

"މާތްވެގެންވާ އިސްލާމްދީނުގެ ރިވެތި އަހުލާގުގެ މަތީގައި ދެމިތިބުމަކީ އަޅުގަނޑުމެންގެ އެންމެ އިސް ވާޖިބުކަމުގައި ހަދަން ވާނެ."

މަތީ ތައުލީމުގެ ފުރުސަތުތައް ފަހިކޮށްދެއްވުމަށް ސަރުކާރުން ދޭ އަހައްމިއްޔަތުކަން ފާހަގަކުރައްވައި މިނިސްޓަރު ވިދާޅުވީ، ދިވެހި ޒުވާނުން އިލްމީ ގާބިލު މީހުންނަށް ހެދުމަށް ރައީސް ޑރ. މުހައްމަދު މުއިއްޒު ކެނޑިނޭޅި ދެއްވާ ލަފާފުޅުތަކާ އެކު، ފަހިކޮށްދެއްވާ މަގުތައް ވެސް ގިނަ ކަމަށެވެ. އެ ކަންކަމުގެ ހެޔޮ ނަތީޖާ ކުރިމަގުގަިއ ފެންނާނެ ކަމަށް މިނިސްޓަރު މާރިޔާ ވިދާޅުވި އެވެ.