އޭ ލެވެލްގެ ގަދަ 10ގެ ޖަލްސާ ބުރާސްފަތި ދުވަހު

އޭ ލެވެލް އިމްތިހާނުގައި ރާއްޖޭގެ ގަދަ 10 ގައި ހިމެނުނު ދަރިވަރުންނަށް އިނާމު ދިނުމުގެ ހަފުލާ އަންނަ ބުރާސްފަތު ދުވަހު ބާއްވަން ނިންމައިފި އެވެ.

ދަރުބާރުގޭގައި ބާއްވާ "މަތީ އަރުތަވެރިންގެ އިނާމު" ހަފުލާގައި އިނާމު ދޭނީ 2022-2023ގެ މެއި/ޖޫން އިމްތިހާނު ހެދި ދަރިވަރުންގެ ތެރެއިން، އެންމެ ރަނގަޅު ނަތީޖާ ހޯދި ދަރިވަރުންނަށެވެ.

އެޑިޔުކޭޝަން މިނިސްޓްރީން ބުނި ގޮތުގައި ގަދަ 10 ގައި 400 އަށް ވުރެ ގިނަ ދަރިވަރުން ހިމެނެ އެވެ.

މިފަހަރު ގަދަ 10 އިން އެއް ވަނައިގައި 17 ދަރިވަރަކު ހިމެނޭ ކަމަށް ވަނީ އެނގިފަ އެވެ.

އެއްވަނައިގައި ހިމެނުނީ ސެންޓާ ފޯ ހަޔާ ސެކަންޑަރީ އެޑިޔުކޭޝަން (ސީއެޗްއެސްއީ)ގެ ހަ ދަރިވަރަކާއި ވިލާ އިންޓަނޭޝަނަލް ހައިގެ ހަ ދަރިވަރަކާއި އަހުމަދިއްޔާ އިންޓަނޭޝަނަލް ސްކޫލުގެ ހަތަރު ދަރިވަރަކާއި އަރަބިއްޔާ ސްކޫލުގެ ދަރިވަރެކެވެ.

އޯލެވެލްއިން ދުނިޔޭގެ ފެންވަރުގައި ކާމިޔާބީތައް ހޯދި ދަރިވަރުންނަށް "މަތީ އަރުތަވެރިންގެ އިނާމް" ދިނުމުގެ ހަފްލާގައި އޯލެވެލްގައި އެންމެ ރަނގަޅު 10 ނަތީޖާ ހޯދި ދަރިވަރުންގެ ކާމިޔާބީ ވެސް އެޑިޔުކޭޝަން މިނިސްޓްރީން ކަނޑައަޅާފައިވާ އުސޫލުތަކާ އެއްގޮތަށް ފާހަގަކުރަން ވަނީ ނިންމައިފަ އެވެ.

އެ ހަފްލާގައި އޭލެވެލް އާއި އޯލެވެލްއިން ދުނިޔޭގެ ފެންވަރުގައި ވަނަތައް ހޯދި ދަރިވަރުންނަށް ވެސް އިނާމް ދޭނެ އެވެ.