ނުހެދި 17 އަހަރުވީ ނާގޯށީގެ އަމަލީ މަސައްކަތް ފަށަނީ

ޓޫރިޒަމަށް ދޫކޮށް ނުހެދި 17 އަހަރުވީ ރަށް، ހދ. ނާގޯށި ރިސޯޓެއްގެ ގޮތުގައި ތަރައްގީކުރުމުގެ އަމަލީ މަސައްކަތް މި އަހަރުގެ ފަހުކޮޅު ފަށަން ތައްޔާރުވަމުން އަންނަ ކަމަށް މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)ގެ މެނޭޖިން ޑިރެކްޓަރު އަހުމަދު ނިޔާޒު ވިދާޅުވެއްޖެ އެވެ.

މެންހެޓަން ބިޒްނަލް ހޮޓަލުގައި ރޭ އޮތް އެމްޓީޑީސީގެ އަހަރީ އާއްމު ޖަލްސާގައި ނިޔާޒު ވިދާޅުވީ ނާގޯށީގެ މަސައްކަތަކީ ބޮޑު ގޮންޖެހުންތަކެއް ކުރިމަތިވެ، ކުރިއަށް ނުގެންދެވި އޮތް ޕްރޮޖެކްޓަކަށް ވިޔަސް މި ޕްރޮޖެކްޓުގެ އަމަލީ މަސައްކަތް ފަށަން ގިނަ ކަންކަން މިހާރު ނިންމަމުން އަންނަ ކަމަށެވެ.

"އަޅުގަނޑުމެންގެ އަމާޒަކީ މި އަހަރުގެ 4ވަނަ ކުއާޓަރުގައި ނާގޯށީގެ އަމަލީ މަސައްކަތް ފެށުން،" އޭނާ ވިދާޅުވި އެވެ.

ނިޔާޒު ވިދާޅުވީ ގޮންޖެހުންތައް ކުރިމަތިވި މި ޕްރޮޖެކްޓު ކާމިޔާބުކަމާ އެކު ނިންމާލުމަކީ އަމާޒެއް ކަމަށެވެ.

ނާގޯށި ރިސޯޓެއްގެ ގޮތުގައި ތަރައްގީ ކުރަން ރަޝިޔާގެ ކުންފުންޏެއް ކަމަށްވާ ތްރީކޭއާ އެންމެ ފުރަތަމަ ހަވާލުކުރީ 2007ގަ އެވެ. އެ ރަށުގައި 600 އެނދުގެ ރިސޯޓެއް ތަރައްގީކުރަން އެމްޓީޑީސީން މަސައްކަތް ކުރި ނަމަވެސް ދައްކަން ޖެހޭ ކުލި ގަވައިދުން ނުދެއްކުމުގެ ސަބަބުން، ނުވަ އަހަރު ފަހުން، 2016ގައި އެ ކުންފުނީގެ އެއްބަސްވުން ބާތިލްކުރީ އެވެ.

އޭރު އެ ރިސޯޓްގެ 37 ޕަސެންޓް މަސައްކަތް އޮތީ ނިންމައިފަ އެވެ. އަދި ރަށުގައި ހަދާ ގިނަ ވިލާތަކާއި ރެސްޓޯރެންޓްތަކާއި އެހެނިހެން އިމާރާތްތަކުގެ ކޮންސްޓްރަކްޝަންގެ ގިނަ މަސައްކަތްތައް ހުރީ ގާތްގަނޑަކަށް ނިމިފަ އެވެ.

ސަރުކާރުން 2017 ވަނަ އަހަރު އެމްޓީޑީސީގެ އަތުން އެރަށް އަތުލީ އެވެ. އެކަމަކު 2021ގައި އާ ލީޒެއްގެ ދަށުން އެ ރަށް އަނެއްކާވެސް އެމްޓީޑީސީއާ ހަވާލުކުރީ އެވެ.

މި ރަށް ތަރައްގީކުރަން އެ ކުންފުނިން އެ އަހަރު ހަވާލުކުރީ ދުބާއީގެ ގަލަދާރީ ހޯލްޑިންގްސްއާ އެވެ. ތިން އަހަރު ވީއިރު ވެސް އެއްވެސް މަސައްކަތެއް ނުކުރުމުން، އެ އެގްރިމަންޓް މިދިޔަ އަހަރު ވަނީ އުވާލައިފަ އެވެ.

މި ސަބްލީސް އުވާލުމާ ގުޅިގެން ކުންފުނީގެ އާމްދަނީ ވެސް ދަށަށް ދިޔަ އެވެ.