ހުޅުމާލެއިން ގޯތި ދޫކުރުމުން އެޗްޑީސީއަށް ލިބުނު ގެއްލުން ބަލަން ހާއްސަ އޮޑިޓެއް ހަދަން އަންގައިފި

ހުޅުމާލެއިން ހިލޭ ދޫކުރި ބިންތަކާ ގުޅިގެން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ލިބުނު މާލީ ގެއްލުން ބެލުމަށް ހާއްސަ އޮޑިޓެއް ހެދުމަށް އޮޑިޓާ ޖެނެރަލްގެ އޮފީހަށް އަންގަން ރައްޔިތުންގެ މަޖިލީހުގެ މާލިއްޔަތު ކޮމެޓީން މިއަދު ނިންމައިފި އެވެ.

މާލިއްޔަތު ކޮމިޓީން މިއަދު ބޭއްވި ބައްދަލުވުމުގައި އެ އޮޑިޓް ހެދުމަށް ހުށަހެޅީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުﷲ އެވެ.

"ގޯތި ދޫކުރުމުގެ އޮޑިޓް މި ހުށަހަޅަނީ އެއްގޮތަކަށް ވެސް ގޯތިތައް އަނބުރާ ނެގުމަށް ނޫނީ އެކަހަލަ ކަމެއްގަ އެއް ނޫން. އެޗްޑީސީއަށް ލިބިފައިވާ ގެއްލުންތަކަށް ބަލާލަން ވެގެން. ސަރުކާރުތަކުން ސިޔާސީ ބޭނުމަށް މި ފަދަ ކަންކަން ކުރާ އިރު ކުންފުނިތަކަށް މާލީ ގެއްލުމާ އެއްޗެހި ލިބިފައިވަނީ ކިހާވަރަކަށް ކަން ބަލަން ޖެހޭ،" އޭނާ ވިދާޅުވި އެވެ.

އެކަން ކޮމިޓީގައި ބައިވެރިވި މެންބަރުންގެ އިއްތިފާގުން ވަނީ ފާސްކޮށްފަ އެވެ.

ދޫކުރި ބިންތަކާ ގުޅޭ ހާއްސަ އޮޑިޓެއް ހަދަން ނިންމާފައިވާއިރު، ހުޅުމާލެއިން ވިޔަފާރިތަކާއި އާންމުން ދިރިއުޅުމަށް ވެސް ދޭތެރެ ދޭތެރެއިން ބިން ވިއްކަ އެވެ. ހުޅުމާލެއިން އެވްރެޖުކޮށް ބިން ވިއްކަނީ 3،500ރ-4،800ރ. އާ ދެމެދުގަ އެވެ. އެހެން ނަމަވެސް އެންމެ ފަހުން ދެވަނަ ފިޔަވަހިން ހުޅުވާލި ފުރުސަތުތަކުގައި އަކަފޫޓެއް 10،000ރ. އަށް ގަތުމަށް ވެސް ހުށަހަޅާފައިވެ އެވެ.

އެޗްޑީސީގެ ހާއްސަ އޮޑިޓުގެ އިތުރުން އެސްޑީއެފްސީ އުފެދުނީއްސުރެ މިދިޔަ އަހަރުގެ ނޮވެމްބަރު މަހާ ހަމައަށް ލޯނު ދޫކޮށްފައިވާ ގޮތާއި ކުންފުނީގެ ހިންގުމުގެ ކަންކަމާ ގުޅޭ ހާއްސަ އޮޑިޓެއް ހެދުމަށް ވެސް ހުށަހެޅި އެވެ.