ރަޖިސްޓްރީ ނުކޮށް ހުޅުމާލޭގެ މަގުތަކުގައި ހުންނަ ވެހިކަލްތައް ނަގަން ފަށައިފި

ރަޖިސްޓްރީ ނުކޮށް ހުޅުމާލޭގެ މަގުތަކުގައި ގިނަ ދުވަސްތަކެއް ވަންދެން ބަހައްޓާފައި ހުންނަ ވެހިކަލްތައް ނެގުމުގެ މަސައްކަތް ފުލުހުން ފަށައިފި އެވެ.

ފުލުހުންގެ ވެބްސައިޓުގައި ބުނީ ހުޅުމާލޭ ޓްރެފިކް ޕޮލިސް ޑިޕާޓްމަންޓުން އިއްޔެ ފެށި މަސައްކަތުން އެކި ސަރަހައްދުތަކުން 10 ވެހިކަލެއް ނަގާފައިވާ ކަމަށެވެ.

ރަޖިސްޓްރީ ނުކޮށް ހުޅުމާލޭގެ މަގުތަކުގައި ހުންނަ ވެހިކަލްތައް ކުރިއަށް އޮތް ތަނުގައި ވެސް ނަގާނެ ކަމަށާއި އަދި މަގުތަކުގައި ހުންނަ ވެހިކަލްތައް ރަޖިސްޓްރީކޮށްފައި ހުރީ ގަވާއިދާ އެއްގޮތަށްތޯ ބަލާނެ ކަމަށް ފުލުހުން ބުންޏެވެ.

ފުލުހުން ބުނީ މަގުމަތީގެ ރައްކާތެރި ކަމަށް ކުރާ މަސައްކަތުގެ ތެރެއިން، ސައްހަ ނޫން ރަޖިސްޓްރީ ހަދައިގެން ދުއްވާ އުޅަނދުތައް ހޯދައި ފިޔަވަޅު އެޅުމުގެ ކަންކަން ވެސް ކުރަމުން ގެންދާނެ ކަމަށެވެ.

ހުޅުމާލޭގައި ގަވާއިދާ ހިލާފަށް ޕާކް ކުރުމުގެ މައްސަލަ ވަނީ ވަރަށް ބޮޑުވެފަ އެވެ.