ލަންކާގެ ރިޔާސީ އިންތިހާބު ސެޕްޓެމްބަރު 21 ގައި

ސްރީ ލަންކާއަށް ކުރިމަތިވި އިގްތިސާދީ އެންމެ ބޮޑު ހީނަރުކަމާ އެކު އުފެދުނު ބޮޑެތި ހަމަނުޖެހުންތަކަށް ފަހު ބާއްވާ ފުރަތަމަ ރިޔާސީ އިންތިހާބު ސެޕްޓެމްބަރު މަހުގެ 21 އަށް ތާވަލްކޮށް މިއަދު އިއުލާނުކޮށްފި އެވެ.

ލަންކާގެ ބޭރުގެ ދަރަނި އަދާނުކުރެވި 2022 ވަނަ އަހަރު ބަނގުރޫޓުވުމާ އެކު އުފެދުނު ހަމަނުޖެހުންތަކުގައި އޭރުގެ ރައީސް ގޮޓާބެ ރާޖަޕަކްސަ އިސްތިއުފާ ދެއްވަން މަޖުބޫރުވީ އެވެ. އަދި އޭގެ ފަހުން، ގާނޫނު ހަދާ މަޖިލީހުން ވަނީ ރައީސްކަމުގެ ދައުރު ފުރިހަމަކުރައްވަން ރައީސްކަމުގެ މަގާމަށް ރަނިލް ވިކްރެމަސިންހާ ކަނޑައަޅައިފަ އެވެ.

ރަނިލް މިހާރު ވަނީ މިނިވަން ކެންޑިޑޭޓެއްގެ ގޮތުގައި އިންތިހާބުގައި ވާދަކުރައްވާނެކަން އިއުލާނުކުރައްވައިފަ އެވެ.

މިހާތަނަށް ބެލެވިފައިވާ ގޮތުގައި އޭނާއާ ދެކޮޅަށް މަދުވެގެން ދެ ކެންޑިޑޭޓަކު ނުކުންނަވާނެ އެވެ. އެއީ ގައުމުގެ އިގްތިސާދީ ހާލަތު ރަނގަޅު ކުރުމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ ބެއިލްއައުޓް ހޯދުމަށް އެޅި ފިޔަވަޅުތަކާ ދެކޮޅަށް ވާހަކަ ދައްކަވާ ކެންޑިޑޭޓުންނެވެ.

އިލެކްޝަންސް ކޮމިޝަންގެ ޗެއާ އާރް.އެމް.އޭ. އެލް ރަތުނަޔަކަ ނޫސްވެރިންގެ ބައްދަލުވުމުގައި ވިދާޅުވީ ސެޕްޓެމްބަރު 21 އަށް ތާވަލްކުރީ ހޮނިހިރު ދުވަހަކާ ދިމާވާތީ ކަމަށާއި އެއީ ގިނަ މީހުންނަށް ވޯޓު ލާން ދެވޭނެ ދުވަހަކަށް ވާނެތީ ކަމަށެވެ.

ރަނިލްގެ ބޮޑު ވާދަވެރިޔަކަށް ވާނީ ކުރިން ޕާޓީގެ ބައިވެރިއެއްގެ ގޮތުގައި ހުންނެވުމަށް ފަހު މިހާރު އިދިކޮޅު ލީޑަރެއްގެ ގޮތުގައި މަސައްކަތްކުރައްވާ ސަޖިތު ޕްރެމަދާސަ، 57، އެވެ. އޭނާ ވަނީ އިގްތިސާދު ހަމަޔަކަށް އެޅުވުމުގެ މަސައްކަތް ކުރިއަށް ގެންދަވާނެ ކަމަށާއި އެކަމަކު ޓެކްސްތައް ކުޑަކުރައްވާނެ ކަމަށް ވިދާޅުވެފަ އެވެ.

ދެން ވާދަކުރައްވާނެ ކަމަށް އިއުލާނުކުރައްވާފައި ވަނީ އައިއެމްއެފްގެ ޝަރުތުތަކާ އެއްގޮތަށް ދައުލަތުގެ ކުންފުނިތައް ޕްރައިވެޓައިޒް ކުރުމާ ދެކޮޅަށް ވާހަކަ ދައްކަވާ އަނޫރާ ކުމާރާ ޑިސަނަޔަކަ، 55، އެވެ.

ބެލެވޭ ގޮތުގައި މި ރިޔާސީ އިންތިހާބުގައި ބޮޑު ބަހުސަކަށް ވާނީ 2022 ވަނަ އަހަރު ޖީޑީޕީ ރެކޯޑް މިންވަރެއް ކަމަށްވާ 7.8 ޕަސެންޓަށް ދަށަށް ގޮސް ކުރިމަތިވި އިގްތިސާދީ ބޮޑު ހީނަރުކަމުގެ ވާހަކައަށެވެ. އޭރު އިންފްލޭޝަން 70 ޕަސެންޓަށް އެރުމަށް ފަހު މިހާރު ވަނީ އާދައިގެ މިންވަރަކަށް ދަށަށް ގޮސްފަ އެވެ. -- އޭއެފްޕީ