ރަނިލް ރައީސްކަމަށް، ރައްޔިތުން މަގުތަކަށް

އިގްތިސާދީ އަނދަވަޅެއްގެ ތެރެއަށް ގައުމު ވެއްޓި، ސިޔާސީ ހަލަބޮލިކަމުގެ ތެރޭގައި ރައީސް ކަމުގެ މަގާމު ހުސްވެފައި ވަނިކޮށް، ރައްޔިތުންގެ މަގުބޫލުކަމެއް ނެތް ބޮޑުވަޒީރު ރަނިލް ވިކްރަމަސިންހަ، ސްރީ ލަންކާގެ ރައީސްކަމުގެ މަގާމަށް އިންތިހާބުކުރުމާ ގުޅިގެން، އެކަމާ ދެކޮޅަށް އާންމު ރައްޔިތުން މަގުތަކަށް ނުކުންނަން ފަށައިފި އެވެ.

ލަންކާގެ ގާނޫނު ހަދާ މަޖިލީހުގައި މިއަދު ބޭއްވި އިންތިޚާބުގައި، ރައީސްކަމުގެ މަގާމަށް ރަނިލް ހޮވިވަޑައިގަތީ، މަގާމުން އިސްތިއުފާ ދެއްވި ބޮޑުވަޒީރު މަހިންދަ ރާޖަޕަކްސަ އާއި އިސްތިއުފާ ދެއްވި ރައީސް ގޯޓާބޭ ރާޖަޕަކްސަގެ ޕާޓީގެ ބޮޑު ތާއީދަކާ އެކުގަ އެވެ. ގާނޫނު ހަދާ މަޖިލީހުގެ ޖުމްލަ 225 މެމްބަރުންގެ ތެރެއިން ރަނިލް އަށް ޖުމްލަ 134 މެންބަރުންގެ ވޯޓު ލިބިވަޑައިގަތެވެ.

އިނތިޚާބުގެ ނަތީޖާ އިއުލާން ކުރުމުން، ގާނޫނު ހަދާ މަޖިލީހުގައި މިއަދު ދެއްކެވި ކުރު ވާހަކަކޮޅުގައި ރަނިލް ވިދާޅުވީ "ގައުމު މިހާރު އޮތީ ވަރަށް އުނދަގޫ ހާލަތެއްގައި" ކަމަށެވެ. އަދި "ކުރިއަށް ހުރީ ވަރަށް ބޮޑެތި ގޮންޖެހުންތަކެއް" ކަމަށާއި، ނަމަވެސް ގައުމަށް ހަމަޖެހުން ގެނެސްދެވޭނެ ކަމުގެ އުންމީދު އެބަ އޮތް ކަމަށް ރަނިލް ވިދާޅުވި އެވެ.

އޭގެ އިތުރުން، ލަންކާ އަށް މިހާރު ކުރިމަތިވެފައިވާ އިގްތިސާދީ އަދި ސިޔާސީ މައްސަލަތައް ހައްލުކުރުމުގައި ސަރުކާރާ ގުޅިގެން މަސައްކަތް ކޮށްދިނުމަށް، އިދިކޮޅު ޕާޓީތަކުގެ ވެރިންނަށް، ރަނިލް މިއަދު ގޮވައިލެއްވި އެވެ. ލަންކާގެ ސިޔާސީ މަސްރަހު ދިރާސާ ކުރާ ފަރާތްތަކުން ބުނާ ގޮތުގައި، ލަންކާގެ ރައީސްކަމުގެ މަގާމަށް ރަނިލް އިންތިޚާބުކުރުމުން، ސިޔާސީ ގޮތުން ކޮންމެވެސް ވަރެއްގެ ހަމަޖެހުމެއް ލިބޭނެ އެވެ.

އޭގެ ސަބަބުން، ލަންކާ އަށް ބޭނުންވާ މާލީ އެހީތެރިކަން ހޯދުމާ ބެހޭ ގޮތުން، އިންޓަނޭޝަނަލް މަނިޓަރީ ފަންޑް (އައިއެމްއެފް)އާއެކު ރަސްމީ ގޮތުން ވާހަކަތައް ފެށުމުގެ މަގު ލަންކާ ސަރުކާރަށް ފަހިވެގެންދާނެ އެވެ. ބޮޑުވަޒީރުގެ މަގާމުގައި ހުންނަވައިގެން، މިދިޔަ މަހުގެ ތެރޭގައިވެސް ރަނިލް ވަނީ އައިއެމްއެފްއާ އެކުގައި މަޝްވަރާތަކެއް ބާއްވައިފަ އެވެ.

ލަންކާގެ ވެރިކަން ކުރާ، ސްރީ ލަންކާ ޕޮޑުޖަނާ ޕެރަމުނާ (އެސްއެލްޕީޕީ) ޕާޓީން ބުނީ، ރަނިލް ވިކްރަމަސިންހަގެ އިގްތިސާދީ ތަޖުރިބާއަށް ބުރަވެ، އެ ޕާޓީގެ ވަރަށް ގިނަ މެމްބަރުން، މިއަދު އޮތް އިންތިޚާބުގައި ރަނިލް އަށް ވޯޓު ދިން ކަމަށެވެ.

"އަހަރެމެންނަށް ގަބޫލުކުރެވެނީ ގައުމަށް ދިމާވެފައިވާ އިގްތިސާދީ މައްސަލަތަކަށް ހައްލު ހޯދުމުގެ ގާބިލުކަން ލިބިގެންވާ، އަދި އެކަން ކުރާނެ ގޮތުގެ އާޖުފާޖު އެނގިވަޑައިގެން ހުންނެވި ހަމައެކަނި ތަޖުރިބާކާރަކީ ރަނިލް ވިކްރަމަސިންހަ ކަމަށް،" ރާޖަޕަކްސް އާއިލާގެ ނުފޫޒު ބޮޑު އެސްއެލްޕީޕީގެ ޖެނެރަލް ސެކްރެޓަރީ ސަގަރަ ކަރިޔަވަސަމް ވިދާޅުވި އެވެ.

އުމުރުން 73 އަހަރުގެ ރަނިލް ސިޔާސީ މައިދާނުގައި މަސައްކަތް ކުރައްވާތާ 43 އަހަރު ވެފައިވާ އިރު، މިހާތަނަށް ހަ ފަހަރެއްގެ މަތިން ލަންކާގެ ބޮޑުވަޒީރުގެ މަގާމު ފުރުއްވައިފި އެވެ. ނަމަވެސް އެންމެ ފަހަރަކު ވެސް ދައުރު ފުރިހަމަ ކުރެއްވޭ ގޮތެއް ނުވެ އެވެ.

މިދިޔަ އާދީއްތަ ދުވަހުން ފެށިގެން ކޮޅުނބުގައި ކުއްލި ނުރައްކަލުގެ ހާލަތު އިއުލާންކޮށް، ގާނޫނު ހަދާ މަޖިލިސް ހުންނަ ސަރަހައްދުގައި އިއްޔެ އިން ފެށިގެން ސަލާމަތީ ފިޔަވަޅުތައް ވަރުގަދަކޮށް، ސިފައިންނާއި ފުލުހުން ގެންދަނީ ހަތިޔާރާއެކު ފޯރި މަރަމުންނެވެ. ރައީސްކަމުގެ މަގާމަށް ރަނިލް އިންތިޚާބުކުރުމާ ގުޅިގެން އިދިކޮޅު ރައްޔިތުން ވަނީ ގޯލް ފޭސް ގްރީން ސަރަހައްދަށް އެއްވެ، ރަނިލްގެ އިސްތިއުފާ އަށް ގޮވަން ފަށައިފަ އެވެ.

އިދިކޮޅު މުޒާހަރާތަކުގައި އިސްކޮށް އުޅޭ މީހުން ބުނާ ގޮތުގައި ރަނިލްއަކީ ގައުމުގެ މައްސަލަތައް ހައްލުކުރެވޭ ވަރުގެ ބޭފުޅެއް ނޫނެވެ. އަދި މިއީ އާންމު ރައްޔިތުން ބޭނުންވި ބަދަލެއް ނޫން ކަމަށާއި، ރަނިލްއަކީ ވެސް، ރާޖަޕަކްސަ އާއިލާގެ ވެރިކަން ދަމަހައްޓަން ވާގިވެރިވާ ބޭފުޅެއް ކަމަށް އެމީހުން ބުނެ އެވެ.

"އަހަރެމެން ވަރަށް ރަނގަޅަށް ދަންނަން ރަނިލްއަކީ ގޯޓާބޭ ފަދަ މީހެއް ނޫންކަން. އެއަށް ވުރެ މާ ހީލަތްތެރި މީހެއް އެއީ. މުޒާހަރާތައް ރޫޅައިލުމަށް އޭނާ ވަނީ ކުއްލި ނުރައްކަލުގެ ހާލަތު އިއުލާންކޮށްފަ. އަދި މުޒަހަރާ ކުރާ މީހުން ފައްސައިލުމަށް، އޭނާވަނީ އަސްކަރީ ހެލިކޮޕްޓަރުތައް ވެސް ފޮނުވާފައި. އެކަމަކު އެފަދަ އަމަލުތަކުން ރައްޔިތުން މިހާރު ފަހަތަށް ޖެހޭނެ ކަމަކަށް ނުބެލެވޭ. ލަންކާ ރައްޔިތުން ބޭނުންވަނީ ރައްޔިތުންނާ މެދު އަޅައިލާ ވެރިއެއް. ހަމައެކަނި އެމީހެއްގެ ސިޔާސީ ކުރިމަގާމެދު ވިސްނާ ލީޑަރެއް ނޫން،" ސިޔާސީ މުޒާހަރާތަކުގައި އިސްވެ އުޅޭ މެލާނީ ގުނަތިލަކަ ބުންޏެވެ.

އިގްތިސާދު އަޑިއަޅާލައި ގައުމު ބަނގުރޫޓުވުމާ ގުޅިގެން، އާންމު ރައްޔިތުން ނުކުމެ ސަރުކާރާ ދެކޮޅަށް މުޒާހަރާ ކުރަމުން ދާތާ މިހާރު ހަތަރު މަސްވަނީ އެވެ. ރައްޔިތުންގެ މުޒާހަރާތަކާ ގުޅިގެން، ލަންކާގެ ބޮޑުވަޒީރު މަހިންދަ ރާޖަޕަކްސަ މަގާމުން އިސްތިއުފާ ދެއްވީ މެއި 9، 2022ގަ އެވެ. އޭނާ މަގާމުން ވަކިވެވަޑައިގަތުމާ އެކު، އެ މަގާމަށް ރަނިލް އައްޔަންކުރެއްވީ މެއި 12، 2022ގަ އެވެ.

ރަނިލް، ބޮޑުވަޒީރުކަމުގެ މަގާމާ ހަވާލުވެވަޑައިގަތުމަށް ފަހު ވެސް، ރައްޔިތުންނަށް ބޭނުންޖެހިފައިވާ އަސާސީ ކާބޯތަކެއްޗާއި ކައްކާ ގޭހާއި ޕެޓްރޯލާއި ޑީސަލް ނުލިބޭ މައްސަލަ އަށް ހައްލެއް ނުހޯއްދެވުމުން، ރައްޔިތުންގެ އުތުރިއެރުން މައިތިރިނުވެ މުޒާހަރާތައް އިތުރަށް ދިޔައީ ވަރުގަދަ ވަމުންނެވެ. ނަތީޖާއެއްގެ ގޮތުން، އާންމު ރައްޔިތުން ރައީސް ގޯޓާބޭގެ ރަސްމީ ގެކޮޅަށް ވަދެގަނެ އެ ގެ ހިސޯރުކޮށް، ސަރުކާރުގެ ބައެއް އިމާރާތްތައް ހިފައި އެ ތަންތަނަށް ގެއްލުން ދޭން ފެށުމާ ގުޅިގެން، ގޯޓާބޭ ގައުމު ދޫކުރައްވައި ފިއްލަވައިގެން، މި މަހުގެ 13 ވަނަ ދުވަހު ދިވެހިރާއްޖެ އަށް ވަޑައިގެންނެވި އެވެ.

ރާއްޖޭގައި ދެ ދުވަހު ހުންނެވުމަށް ފަހު، ސިންގަޕޫރަށް ވަޑައިގެން އެ ގައުމުގައި ހުންނަވައި، ޖުލައި 16 ވަނަ ދުވަހު ލަންކާގެ ގާނޫނު ހަދާ މަޖިލީހަށް ފޮނުއްވެވި އީމެއިލްއަކުން، ރައީސް ކަމުގެ މަގާމުން އިސްތިއުފާ ދެއްވީ އެވެ.