އެޗްއާރްސީއެމްއަށް ހަބީބް އައްޔަންކުރަން މަޖިލީހުން ފާސްކޮށްފި

ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) ގެ މެންބަރު ކަމަށް އިލެކްޝަންސް ކޮމިޝަންގެ ކުރީގެ ނައިބު ރައީސް އިސްމާއިލް ހަބީބް އައްޔަން ކުރަން ރައްޔިތުންގެ މަޖިލީހުން މިއަދު ފާސްކޮށްފި އެވެ.

އެޗްއާރްސީއެމުން ހުސްވެފައިވާ މަގާމަށް ހަބީބް އައްޔަން ކުރަން ރައީސް ޑރ. މުހައްމަދު މުއިއްޒު މަޖިލީހަށް ފޮނުއްވީ މި މަހުގެ 15 ގަ އެވެ. އެ މައްސަލަ ދިރާސާ ކުރުމަށް ހަވާލުކުރި މަޖިލީހުގެ ހިއުމަން ރައިޓްސް ކޮމިޓީން ވަނީ ހަބީބް އެ ކޮމިޓީ އަށް ހާޒިރުކޮށް، އޭނާއާ އިންޓަވިއު ކޮށްފަ އެވެ.

އިންޓަވިއު މަރުހަލާގައި ހަބީބަށް ވަނީ 89 ޕަސެންޓް މާކްސް ލިބިވަޑައިގެންފަ އެވެ.

އެހެންކަމުން ހަބީބަކީ އެޗްއާރްސީއެމްގެ މެންބަރު ކަމުގެ މަސްއޫލިއްޔަތު އަދާކުރުމަށް ގާބިލް ބޭފުޅެއް ކަމަށް ކަނޑައަޅައި، އޭނާ އެ މަގާމަށް އައްޔަން ކުރަން ފެންނަ ކަމަށް އެ ކޮމިޓީން ފާސްކުރީ އިއްޔެ އެވެ.

ކޮމިޓީން ނިންމި ގޮތަށް، އެޗްއާރްސީއެމަށް ހަބީބް އައްޔަން ކުރަން މަޖިލީހުގެ މިއަދުގެ ޖަލްސާގައި ފާސްކުރީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި މެމްބަރުންގެ ތެރެއިން 74 މެމްބަރުންގެ އަޣުލަބިއްޔަތުންނެވެ. އޭނާ އައްޔަން ކުރަން ނުފެންނަ ކަމަށް ތިން މެމްބަރަކު ވޯޓު ދެއްވި އެވެ.

އީސީން އޭނާ ވަކިވެވަޑައިގަތީ ކޮމިޝަންގެ މެމްބަރު ކަމުގައި ދެ ދައުރު ހަމަވުމުންނެވެ. ފަސް އަހަރުގެ ދެ ދައުރު އޭނާ ވަނީ ފުރިހަމަ ކުރައްވައިފަ އެވެ. ގާނޫނުގައިވާ ގޮތުން މެންބަރު ކަމުގައި ފުރިހަމަ ކުރެވޭނީ ދެ ދައުރެވެ. މެމްބަރުކަމާއި އެ ކޮމިޝަންގެ މުވައްޒަފެއްގެ ގޮތުގައި ހަބީބް 21 އަހަރު ހިދުމަތް ކުރެއްވި އެވެ.

އިލެކްޝަންސް ކޮމިޝަންގެ މެންބަރު ކަމަށް ހަބީބް އެންމެ ފުރަތަމަ އައްޔަން ކުރެއްވީ މާޗު 13، 2013 ގައި ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ. ފުރަތަމަ ދައުރު ހަމަވެ ދެ ވަނަ ދައުރަށް އައްޔަން ކުރީ 2019 ވަނަ އަހަރު އެވެ.