އީސީއަށް ހަސީބު އައްޔަންކުރަން މަޖިލީހުން ރުހުން ދީފި

އިލެކްޝަންސް ކޮމިޝަން (އީސީ) ގެ މެމްބަރު ކަމަށް އިސްލާމިކް މިނިސްޓްރީގެ ކުރީގެ ޕާމަނަންޓް ސެކްރެޓަރީ އަބްދުލްހަސީބް އިސްމާއިލް އައްޔަންކުރަން ރައްޔިތުންގެ މަޖިލީހުން މިއަދު ފާސްކޮށްފި އެވެ.

އީސީ އަށް އައްޔަންކުރަން ހަސީބުގެ ނަން މަޖިލީހަށް ފޮނުވާފައިވަނީ އެ ކޮމިޝަންގެ މިހާރުގެ ރައީސް ފުއާދު ތައުފީގުގެ ދައުރު މި މަހު 24 ވަނަ ދުވަހަށް ހަމަވާތީ އެވެ.

އެ މަގަމަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލެއްވި ފަރާތްތަކުގެ ތެރެއިން ރައީސް ޑރ. މުހައްމަދު މުއިއްޒު މަޖިލީހަށް ފޮނުވާފައި ވަނީ ހަސީބުގެ ނަން އެކަންޏެވެ.

އެ ނަން ދިރާސާކުރުމަށް ފަހު މިއަދު މަޖިލީހުގެ ތަޅުމުގައި ނެގި ވޯޓުގައި އޭނާ އަށް ރުހުން ދޭން ފާސްކުރީ ވޯޓުގައި ބައިވެރިވެވަޑައިގަތް 67 މެންބަރުންގެ އިއްތިފާގުންނެވެ.

ހަސީބު އިސްލާމިކް މިނިސްޓްރީގެ ޕީއެސްއަކަށް އައްޔަން ކޮށްފައިވަނީ 2019 ގައި ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގަ އެވެ.