"ސްކުއިޑް ގޭމް"ގެ ދެވަނަ ސީޒަން ޑިސެމްބަރު 26 ގައި

ނެޓްފްލިކްސް އިން ގެނެސްދިން ދެކުނު ކޮރެއާގެ ކާމިޔާބު ތުރިލާ ސީރީޒް "ސްކުއިޑް ގޭމް"ގެ ދެވަނަ ސީޒަން އަންނަ ޑިސެމްބަރު 26 ގައި ސްޓްރީމްކުރަން ފަށަން ނިންމައިފި އެވެ.

ނެޓްފްލިކްސް އިން މިއަދު ވަނީ ދެވަނަ ސީޒަން ގެނެސްދޭ ތާރީހު އިއުލާންކޮށް، ޓްރެއިލާ ވެސް ނެރެފަ އެވެ. އަދި އެ ސީރީޒްގެ އިތުރު ސީޒަނެއް އަންނަ އަހަރު ވެސް ގެނެސްދޭނެ ކަމަށާއި އެއީ އެންމެ ފަހު ސީޒަން ކަމަށް ވެސް ނެޓްފްލިކްސް އިން ބުންޏެވެ.

ދެވަނަ ސީޒަންގައި ލީޑު ރޯލު ކުޅެނީ ފުރަތަމަ ސީޒަންގައި ވެސް ފެނުނު ލީ އުންޖޭ އެވެ. އާ ސީޒަންގައި ދައްކާނީ ސްކުއިޑް ގޭމް އަސްލު އުފެއްދި މީހާ ހޯދުމަށް ލީ އުންޖޭ ކުރާ މަސައްކަތެވެ. މި ސީޒަންގައި ދައްކާނީ ވެސް ފުރަތަމަ ސީޒަންގައި ހިނގި ކަންތައްތަކުގެ ތިން އަހަރު ފަހެވެ.

ފުރާނައަށް ނުރައްކާތެރި ގޭމް ކުޅެގެން މޮޅުވާ މީހަކަށް ފައިސާގެ ބޮޑު އިނާމެއް ލިބޭ "ސްކުއިޑް ގޭމް" 2021 ވަނަ އަހަރު ނެރުމާ އެކު، އެ ވެގެން ދިޔައީ ބޮޑު ހިޓަކަށެވެ.

"ސްކުއިޑް ގޭމް"ގެ ފުރަތަމަ ސީޒަން އަކީ އެތައް އަހަރެއްގެ މަސައްކަތެވެ.