ތިލަފުށީގެ ބޮޑު އަލިފާނުގެ ހާދިސާގައި 30 މިލިއަނަށް ވުރެ ގިނަ ރުފިޔާގެ ގެއްލުން!

ކ. ތިލަފުށީގެ ގުދަންތަކެއްގައި މިއަދު ހިނގި ބޮޑު އަލިފާނުގެ ހާދިސާގައި 30 މިލިއަނަށް ވުރެ ގިނަ ރުފިޔާގެ ގެއްލުން ވެއްޖެ އެވެ.

މި އަލިފާނުގެ ހާދިސާ ހިނގީ ދަގަނޑާއި ބޯޓު ބަނުމުގެ މަސައްކަތްކުރާ ކުންފުންޏެއް ކަމަށްވާ މަރިންޑޯގެ ވޯކްޝޮޕެއްގަ އެވެ. އެތަނުގައި ރޯވި އަލިފާންގަނޑު ފެތުރި، ކައިރީގައި ހުރި އިތުރު ދެ ގުދަނެއްގައި ރޯވެ ބޮޑެތި ގެއްލުންތައް ލިބުނެވެ.

މަރިންޑޯ އަކީ ގިނަ އަދަދެއްގެ ހެވީ ވެހިކަލް ވެސް ގެންގުޅޭ ކުންފުންޏެކެވެ. އެ ކުންފުނީގެ ހުރިހާ ވެހިކަލެއްގެ މެއިންޓަނެންސާއި ރިޕެއަރިންގެ މަސައްކަތް ކުރަނީ މި ވޯކްޝޮޕްގަ އެވެ. ވެހިކަލްތަކުގެ ސަޕޯޓް ފެސިލިޓީއެއްގެ ގޮތުގައި ބޭނުންކުރަމުން އައި އެ ތަނުގައި އެ ކުންފުނީގެ ބައެއް މުދާ ވެސް ގުދަން ކޮށްފައި ހުއްޓެވެ.

މަރިންޑޯގެ ވެރިޔާ އަލީ މުޖާހް "މިހާރު" އަށް ވިދާޅުވީ، މި އަލިފާނުގެ ހާދިސާގައި ގުދަން އެއްކޮށް ހަލާކުވެ، ހުރިހާ މުދަލެއް ވެސް އަނދާފައިވާ ކަމަށެވެ. އެއީ ކޮމްޕްލެކްސްއެއްގެ ގޮތަށް، އެތަނުގެ އެއްބައި ޑެގު އަޅައިގެން ތިން ބުރިއަށް އަދި އަނެއްބައި ސިންގަލް ސްޓޯރީގެ ގޮތުގައި ހަދާފައި ހުރި ގުދަނެއް ކަމަށް ވެސް އޭނާ ވިދާޅުވި އެވެ.

މުޖާހް ވިދާޅުވި ގޮތުގައި، އެއީ 10،000 އަކަފޫޓުގެ ސައިޓެކެވެ. އެ ތަން ހުންނަނީ އިންޝުއަރެންސް ކޮށްފަ އެވެ.

"މުޅި ތަން އެއްކޮށް އަނދައި ހުލިވެ، ތަން ވެސް ވެއްޓިފައި އޮތީ،" އޭނާ ބުންޏެވެ.

"ގާތްގަނޑަކަށް 20-24 މިލިއަން ރުފިޔާގެ ގެއްލުން މި ލިބުނީ. އިމާރާތާ އެއްކޮށް އަޅުގަނޑު އަގު މި ކިޔަނީ."

މި ހާދިސާ ހިނގަން މެދުވެރިވި ސަބަބެއް އަދި ޔަގީން ނުވާ ކަމަށް މުޖާހް ބުންޏެވެ.

އެ ސަރަހައްދުގައި ތިބި ބައެއް މީހުން ބުނި ގޮތުގައި، އެންމެ ފުރަތަމަ ރޯވީ މެރިންޑޯގެ ވޯކްޝޮޕްގަ އެވެ.

އެ ވޯކްޝޮޕާ ޖެހިގެން އިރާއީ ބުކްޝޮޕާއި އެހެން ކުންފުންޏެއްގެ ގުދަނެއް ވެސް ހުއްޓެވެ. އެ ގުދަންތަކުގައި ހުރި މުދާ ވެސް ވަނީ ވަރަށް ބޮޑަށް އަނދައިފަ އެވެ. އެ ގުދަންތަކުގައި ހުރި މުދަލާ އެކު، ގާތްގަނޑަކަށް 30 މިލިއަނަށް ވުރެ ގިނަ ރުފިޔާގެ ގެއްލުން، މި އަލިފާނުގެ ހާދިސާއާ ގުޅިގެން ލިބިފައިވާކަން ވަނީ އެނގިފަ އެވެ.

އެމްއެންޑީއެފުން ވެސް ބުނި ގޮތުގައި، މި ހާދިސާގައި މެރީންޑޯ ވޯކްޝޮޕާ އިންވެގެން ހުރި ގުދަންތަކަށް އަލިފާނުގައި ބޮޑެތި ގެއްލުންތަކެއް ލިބިފައިވެ އެވެ.

މި ހާދިސާގައި ދިވެއްސަކަށް ދުމުގެ އަސަރުކޮށް، ކޮންމެވެސް ވަރަކަށް ފިހިފައި ވާތީ ހޮސްޕިޓަލަށް ގެންގޮސް އޭނާއަށް ފަރުވާދިނެވެ.

އެ އަލިފާންގަނޑު ކޮންޓްރޯލްކުރެވުނީ ރޯވިތާ ގަޑިއެއްހާއިރުގެ ތެރޭގަ އެވެ.

އަލިފާން ނިއްވުމުގެ އޮޕަރޭޝަންގައި އެމްއެންޑީއެފްއާ އެކު ފުލުހުންނާއި އެންޑީއެމްއޭ އާއި ރެޑް ކްރެސެންޓާއި އެޗްޑީސީ އަދި އެމްޓީސީސީގެ މުވައްޒަފުން ވެސް ބައިވެރިވި އެވެ.