އޯލެވެލް ގަދަ 10ގެ ހަފުލާ އަންނަ މަހު ބާއްވަނީ

މި އަހަރުގެ އޯލެވެލް ގަދަ 10 ގައި ހިމެނުނު ކުދިންގެ ކާމިޔާބީ އަންނަ އޮކްޓޫބަރު މަސް ނިމުމުގެ ކުރިން ފާހަގަކުރަން ހާއްސަ ހަފުލާއެއް ބާއްވާނެ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ރޭ ވިދާޅުވެއްޖެ އެވެ.

މި އަހަރުގެ އޭލެވެލްގެ ގަދަ 10 ގައި ހިމެނުނު ކުދިންނަށް އިނާމު ދިނުމަށް ބާއްވާ ޖަލްސާ އަށް ދައުވަތު ދީފައި ވަނީ އޯލެވެލްގެ އެއް ވަނައިގައި ހިމެނުނު ކުދިންނަށް އެކަނި ކަމަށް ބުނެ ސޯޝަލް މީޑިއާގައި ބައެއް ބެލެނިވެރިން ދަނީ ސުވާލު އުފައްދަމުންނެވެ.

ދަރުބާރުގޭގައި ބޭއްވި "މަތީ އަރުތަވެރިންގެ އިނާމް" ދިނުމުގެ ޖަލްސާގައި، ބެލެނިވެރިންގެ އެ ކަންބޮޑުވުންތަކަށް އިޝާރާތް ކުރައްވަމުން އެޑިއުކޭޝަން މިނިސްޓަރު ވިދާޅުވީ، އެ ހަފުލާ ބޭއްވުމުގެ ތައްޔާރީތައް ވަމުން ދިޔައިރު އޯލެވެލްގެ ގަދަ 10ގެ ކާމިޔާބީ ފާހަގަ ނުކުރާނެ ކަމުގެ އަޑުތައް ފެތުރުނު ކަމަށެވެ.

އެކަން ދޮގު ކުރައްވައި މިނިސްޓަރު ވިދާޅުވީ، ކުދިންނާއި ޓީޗަރުން އަދި ބެލެނިވެރިންނަށް އެކަން ސާފު ކޮށްދެއްވަން ބޭނުންވާ ކަމަށެވެ.

"ބައެއް ފަރާތްތަކަށް އަދިވެސް އޮޅުން އަރާފައި އެބައޮތް، އަދި އެންމެ ރަނގަޅު ނޫން ވާހަކަތައް ވެސް ފެތުރެމުންދާތީ ހިތައް އެރީ ރައްޔިތުންނަށް، ދަރިވަރުންނަށް، މުދަރިސުންނަށް އެނގިފައި އޮތުމަކީ ކުރަން ޖެހޭ ކަމެކޭ،" އިސްމާއިލް ވިދާޅުވި އެވެ.

އެގޮތުުން އަންނަ އޮކްޓޫބަރު މަސް ނިމުމުގެ ކުރިން އެ ހަފުލާ ބާއްވާނެ ކަމުގެ ޔަގީންކަން މިނިސްޓަރު ދެއްވި އެވެ.

"އެޑިއުކޭޝަން މިނިސްޓްރީގައި އޯލެވެލް ޓޮޕް 10 ފާހަގަކުރުމާ ބެހޭ ގޮތުން ވަރަށް ސާފު، ރަނގަޅު ޕޮލިސީއެއް ވަނީ އެކުލަވާލެވިފައި. އެ ޕޮލިސީގައި އޮތް ގޮތަށް ތުނޑުތުނޑަށް އަޅުގަނޑުމެން ދަރިވަރުންގެ ކާމިޔާބީތައް ފާހަގަކުރާނެ ވާހަކަ ދަންނަވަން،" މިނިސްޓަރު ވިދާޅުވި އެވެ.

އިސްމާއިލް ވިދާޅުވި ގޮތުގައި، އޯލެވެލްގެ ގަދަ 10 ގެ ކާމިޔާބީ ފާހަގަކުރުމުގެ ހަފުލާ ބާއްވާނެ ދުވަސް ކަނޑައަޅާނީ ސްކޫލްތަކުގައި މިހާރު ހިނގަމުން އަންނަ އިމްތިހާނު ނިމި، ކުދިންނަށް ދޭ ހަފުތާއެއްގެ ބަންދަށް ފަހު ސްކޫލްތައް ހުޅުވުމުން ޕްރިންސިޕަލުންނާއި ޓީޗަރުންގެ މަޝްވަރާއާ އެކު އެވެ.

"އަޅުގަނޑު އުންމީދު މި ކުރަނީ އިރާދަކުރެއްވިއްޔާމު އޮކްޓޫބަރު މަސް ނިމުމުގެ ކުރިން އެކަން ހާސިލްވާނެ ކަމަށް،" ދަރުބާރުގޭގައި ބޭއްވި ހަފުލާގައި މިނިސްޓަރު ވިދާޅުވި އެވެ.

އޭނާ މީގެ ކުރިން ވިދާޅުވެފައި ވަނީ "މަތީ އަރުތަވެރިންގެ އިނާމް" ދިނުމުގެ ޖަލްސާގައި، އޯލެވެލްއިން ދުނިޔޭގެ ފެންވަރުގައި ކާމިޔާބީތައް ހޯދި ދަރިވަރުންނަށް އިނާމު ދިން ނަމަވެސް، އޯލެވެލް ގަދަ 10 ގައި ހިމެނުނު ދަރިވަރުންގެ ކާމިޔާބީ މިނިސްޓްރީގެ އުސޫލުތަކާ އެއްގޮތަށް އަދި ފާހަގަކުރާނެ ކަމަށެވެ.