ކިއޮސްކަށް ކުރިމަތިލި މީހުންގެ ކަންބޮޑުވުންތަކާ ހެދި، ގުރުއަތުލުން ފަސްކޮށްފި

ހުޅުމާލެ 2 ގައި ހަޓުތައް ހިންގާ ސަރަހައްދުގައި ހެދި ކިއޮސްކުތައް ލިބޭ މީހުން ކަނޑައެޅުމުގެ ގުރުއަތުން ފަސްކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ނިންމައިފި އެވެ.

އެޗްޑީސީން ދޫކުރަން ނިންމި 20 ކިއޮސްކު ކުއްޔަށް ހިފުމަށް އެދި 183 މީހަކު ކުރިމަތިލި އެވެ. އެ މީހުންގެ މެދުގައި ގުރުއަތުލުން ބާއްވަން ނިންމާފައި އޮތީ މިއަދު ހެނދުނު 10:00 ގަ އެވެ.

އެޗްޑީސީގެ މީޑިއާ އޮފިޝަލް އާނިފާ ހުސައިން "މިހާރު" އަށް ވިދާޅުވީ އެކަމަށް އެދި ހުށަހަޅާފައިވާ މީހުންގެ ކަންބޮޑުވުންތަކެއް ހުރުމުން ގުރުއަތުން ފަސްކޮށްފައިވާ ކަމަށެވެ. ނަމަވެސް ގުރުއަތުލުން ދެން ބާއްވާނެ ދުވަހެއް އަދި ކަނޑަނާޅާ ކަމަށް އޭނާ ވިދާޅުވި އެވެ.

"ކިއޮސްކް އެޕްލިކޭޝަންތައް ރިޖެކްޓް ވެފައި ހުރުމުން ބައެއް މީހުން އިންފޮމޭޝަން ކައުންޓަރަށް އައިސް ތިބި،" އޭނާ ވިދާޅުވި އެވެ.

އެ ތަންތަނަށް ކުރިމަތިލާ މީހުން ފުރިހަމަވާންޖެހޭ ޝަރުތުތައް:

1. އުމުރުން 18 އަހަރު ވެފައިވާ ދިވެއްސަކަށްވުން

2. ހިޔާ ފްލެޓްގެ ވެރިފަރާތް ނުވަތަ ހިޔާ ފްލެޓުގައި ދިރިއުޅޭ މީހަކަށްވުން

3. އެޗްޑީސީ އަށް ދައްކަންޖެހޭ އެއްވެސް ފައިސާއެއް ނުދައްކާ ހުރި މީހަކަށް ނުވުން

4. ކިއޮސްކް ހިންގުމުގެ ހުރިހާ މަސައްކަތެއްގައި އުޅެން ޖެހެނީ ދިވެހިން (ބިދޭސީން އެ މަސައްކަތުގައި ގެންގުޅުމަކީ މަނާކަމެއް)

އެއްވެސް ފުލެޓެއް ނުވަތަ ވިޔަފާރީގެ ބޭނުމަށް ކުއްޔަށް ނަގާފައިވާ އެއްވެސް ތަނަކަށް ދައްކަން ޖެހޭ ފައިސާ ނުދައްކާ ނަމަ ޝަރުތު ހަމަ ނުވާނެ ކަމަށް ކިއޮސްކުތަކަށް އެދި ހުށަހެޅި ފޯމުގައި ވެސް ބުނެފައިވާނެ ކަން ފާހަގަކޮށް އާނިފާ ވިދާޅުވީ، ބައެއް މީހުންގެ އެޕްލިކޭޝަންތައް ރިޖެކްޓުވީ އެޗްޑީސީ އަށް ފައިސާ ނުދައްކާ ހުރުމުން ކަމަށެވެ.

ހިޔާ ފްލެޓްގައި އުޅޭ ބައެއް މީހުން މީގެ ކުރިން ވަނީ އެ ޓަވަރުތަކުގެ މެދުގައި ހަޓުތައް ހަދައިގެން އެއްވެސް ހުއްދައެއް ނެތި ވިޔަފާރި ކޮށްފަ އެވެ.

އެންމެ ފަހުން އެޗްޑީސީން އެ ހަޓުތައް ނެގުމުން، އެ ޓަވަރުތަކާ ދިމާލުން ބީޗު ސަރަހައްދުގެ މަގުތަކުގައި ހަޓުތައް ހަދައިގެން ކާބޯތަކެތީގެ ވިޔަފާރި ކުރަން ފެށި އެވެ. އެކަމަކު އެއްވެސް ހުއްދައެއް ނެތި ކުރަމުންދިޔަ އެ ވިޔަފާރި ކުރަމުންދިޔަ އެ ހަޓުތައް ނަގައި، ކިއޮސްކް ހަދާފައިވަނީ އެތަނުގަ އެވެ.