މަރުގެ ހުކުމެއްގެ މައްސަލަ 12 އަހަރު ފަހުން އަލުން ބަލަން އަންގައިފި

މީގެ 12 އަހަރު ކުރިން ކ. ކާށިދޫގައި ފުލުހަކަށް ވަޅިއަކުން ހަމަލާދީ މަރާލި މައްސަލާގައި މުހައްމަދު ސަމާހު މެރުމަށް ކޮށްފައިވާ ހުކުމުގެ މައްސަލަ ދަށު ކޯޓުން އަލުން ބަލަން ސުޕްރީމް ކޯޓުން މިއަދު އަމުރުކޮށްފި އެވެ.

ކ. ކާށިދޫގައި ޖުލައި، 2012 ފުލުހުންގެ ޑިއުޓީއަށް ދަނިކޮށް އާދަމް ހަލީމަށް ވަޅިއަކުން ހަމަލާދީ މަރާލި މައްސަލާގައި އެރަށު ސުވާސާގޭ ސަމާހު މެރުމަށް ކްރިމިނަލް ކޯޓުން ކުރި ހުކުމަށް ހައި ކޯޓުން އޮތީ ތާއީދުކޮށްފަ އެވެ. އެ މައްސަލަ އޭނާގެ ފަރާތުން ވަނީ ސުޕްރީމް ކޯޓުން އިސްތިއުނާފްކޮށްފަ އެވެ.

ސުޕްރީމް ކޯޓުގައި މިއަދު ބޭއްވި އަޑުއެހުމުގައި ހުކުމް އިއްވަވަމުން ފަނޑިޔާރު ހުސްނުއްސުއޫދު ވިދާޅުވީ މީހަކު ކުށަކަށް އެއްބަސް ވިޔަސް، އެ މީހެއްގެ މައްޗަށް ކުށް ސާބިތުވާ ކަމަށް ނިންމޭނީ އެ މީހަކު ދައްކާ ވާހަކަތައް އެއްވެސް ޝައްކެއް ނެތް މިންވަރަށް ކަށަވަރު ކުރުމަށްފަހު ކަމަށާއި އަދި ހައްދުގެ މައްސަލަތަކުގައި ކީރިތި ރަސޫލާ ވެސް އެގޮތަށް އަމަލު ކުރެއްވި ކަމަށް ފަނޑިޔާރު ސުއޫދު ވިދާޅުވި އެވެ. ނަމަވެސް ސަމާހުގެ ކުށަށް އެއްބަސްވިއިރު، ހަމަލާދިން ކަމަށް އެއްބަސްވި ނަމަވެސް ހަމަލާދިނީ ގަސްދުގައި މީހަކު މެރުމުގެ ނިޔަތުގައި ނޫން ކަމަށް އޭނާ ބުނެފައިވާ ކަމަށް ހުކުމުގައިވެ އެވެ.

"ސަމާހު ޝަރީއަތުގެ މަޖިލީހުގައި ދީފައިވާ ބަޔާނުގައި ގަސްދުގައި މީހަކު މެރި ކަމަށް އިންކާރު ކުރޭ. އޭނާގެ މައްޗަށް ޕްރޮސެކިއުޝަނުން ދައުވާ ކޮށްފައިވާ ކުށް ކަމަށް ގަސްދު މަރުގެ ކުށަށް އެ ބަޔާނުގައި އިންކާރު ކޮށްފައިވޭ." ހުކުމް އިއްވަވަމުން ފަނޑިޔާރު ސުއޫދު ވިދާޅުވި އެވެ.

ފަނޑިޔާރު ސުއޫދު ވިދާޅުވި ގޮތުގައި ސަމާހު ދަށު ކޯޓުގައި ކުށަށް އިއުތިރާފްވުމުން އޭނާއާ ދެކޮޅަށް އިތުރު އެއްވެސް ހެއްކެއް ހޯދަން ފުލުހުން މަސައްކަތް ކޮށްފައެއް ނުވެ އެވެ. އަދި އެ އިއުތިރާފް ސަމާހު ފަހުން އަނބުރާ ގެންގޮސްފައި ވާއިރު، އެއަށް ބާރު ދޭނެ އިތުރު އެއްވެސް ހެއްކެއް ނެތް ކަމަށާއި އެހެންވެ، މި ހާލަތުގައި އޭނާގެ އިއުތިރާފްގެ ބަޔާން ބައިބައިކޮށްގެން ކުށް ސާބިތުވާނެ ކަމަށް ނުނިންމޭނެ ކަމަށް ފަނޑިޔާރު ވިދާޅުވި އެވެ.

އެހެންކަމުން ސަމާހު އެއްބަސްވީ ބިރު ދައްކައިގެން ކަމަށް އޭނާ ބުނުމާއި އަދި ސަމާހު ވެފައިވާ އިއުތިރާފްގެ ބޭރުން އިތުރު ހެއްކެއް ހުރިތޯ ބެލުމަށް ފަހު އެ މައްސަލަ އަލުން ބަލަން ކްރިމިނަލް ކޯޓަށް ފޮނުވަން ޖެހޭ ކަމަށް ފަސް ފަނޑިޔާރުންގެ އިއްތިފާގުން ކުރެއްވި އެ ހުކުމުގައިވެ އެވެ.

އެ މައްސަލަ ސުޕްރީމް ކޯޓުން ބެއްލެވީ ފަނޑިޔާރު ހުސްނުއްސުއޫދާއި ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު އައިޝާ ޝުޖޫން މުހައްމަދުގެ އިތުރުން ފަނޑިޔާރު މަހާޒް އަލީ ޒާހިރު އަދި ފަނޑިޔާރު ޑރ. މުހައްމަދު އިބްރާހިމެވެ. ބެންޗުގެ ރިޔާސަތުގެ ބެލެހެއްޓެވީ ފަނޑިޔާރު ސުއޫދެވެ.

މީގެކުރިން ސުޕްރީމް ކޯޓުން ވަނީ ތިން މީހެއްގެ މަރުގެ ހުކުމް ދަމަހައްޓައިފަ އެވެ. ނަމަވެސް ރާއްޖޭގައި 1953 ވަނަ އަހަރުގެ ފަހުން އެއްވެސް މީހެއްގެ މަރުގެ ހުކުމް ތަންފީޒު ކޮށްފައެއް ނުވެ އެވެ.