ރިސޯޓުތަކުން ބޭންކުތަކަށް ޑޮލަރު ޖަމާކުރާ އަދަދު ދަނީ ދަށަށް

ޓޫރިޒަމް ދާއިރާއިން ރިސޯޓުތަކަށް ލިބޭ އާމްދަނީގެ ތެރެއިން ބޭންކްތަކަށް ޖަމާކުރަނީ އޭގެ 50 ޕަސެންޓު ކަމަށާއި، އެއް އަހަރުން އަނެއް އަހަރަށް ރިސޯޓުތަކުން ބޭންކުތަކަށް ޖަމާކުރާ ޑޮލަރުގެ އަދަދު ދަށްވަމުން ދާ ކަމަށް މަރުކަޒީ ބޭންކް، އެމްއެމްއޭގެ ހިސާބުތަކުން ދައްކައިފި އެވެ.

މަރުކަޒީ ބޭންކް، އެމްއެމްއޭ އިން އާންމުކުރި ތަފާސް ހިސާބުތަކުން އެނގޭ ގޮތުގައި މިދިޔަ އަހަރު ނިމުނު އިރު ރިސޯޓުތަކުން ބޭންކްތަކަށް ޖަމާކުރީ 2.3 ބިލިއަން ޑޮލަރެވެ. އެކަމަކު، ޓޫރިޒަމް ދާއިރާއިން ރާއްޖޭގެ އިގްތިސާދަށް ލިބޭ އާމްދަނީ 4.5 ބިލިއަން ޑޮލަރަށް އަރާކަމަށް އެމްއެމްއޭއިން ބުންޏެވެ.

އެމްއެމްއޭ އިން ބުނި ގޮތުގައި، އާމްދަނީގެ ނިސްބަތުން ރާއްޖޭގެ ބޭންކްތަކަށް ޑޮލަރު ޖަމާކުރާ ވަރު ދަށްވަމުންދާ ކަމަށެވެ. މަރުކަޒީ ބޭންކުން ބުނީ 2019 ވަނަ އަހަރު ޓޫރިޒަމްގެ އާމްދަނީ 3.4 ބިލިއަން ޑޮލަރުގައި ހުރި އިރު ބޭންކުތައް މެދުވެރިކޮށް 2.5 ބިލިއަން ޑޮލަރު ދައުރުކޮށްފައިވާ ކަމަށެވެ. އެއީ ޓޫރިޒަމްގެ އާމްދަނީގެ 74 ޕަސެންޓެވެ.

ބޭންކްތަކަށް ޖަމާކުރި ޑޮލަރުގެ އިތުރުން ބޭންކްތަކަށް ރިސޯޓުތަކުން ވިއްކި އަދަދު ވަނީ މިދިޔަ އަހަރު ދަށަށް ގޮސްފަ އެވެ. މިދިޔަ އަހަރު ރިސޯޓުތަކުން ބޭންކްތަކަށް ވިއްކާފައިވަނީ 68 މިލިއަން ޑޮލަރެވެ. ނަމަވެސް، 2019 ވަނަ އަހަރު ޑޮލަރު ވިއްކި އަދަދު ހުރީ 153 މިލިއަން ޑޮލަރުގަ އެވެ.

ޑޮލަރުގެ ތާށިކަން ބޮޑުވެ، އެމްއެމްއޭ އިން ކޮމާޝަލް ބޭންކްތަކަށް ވިއްކާ ޑޮލަރުގެ އަދަދު ވެސް މި މުއްދަތުގައި އިތުރުވެފައިވެ އެވެ. އެގޮތުން މިދިޔަ އަހަރު ކޮމާޝަލް ބޭންކްތަކަށް 480 މިލިއަން ޑޮލަރު ބޭންކްތަކުން ވިއްކި އެވެ. އެއީ 2019 ވަނަ އަހަރާ އަޅާބަލާއިރު 27 ޕަސެންޓުގެ އިތުރުވުމެކެވެ.

އެމްއެމްއޭ އިން 2019 ވަނަ އަހަރު އިގްތިސާދަށް އިންޖެކްޓް ކުރީ 628 މިލިއަން ޑޮލަރެވެ. އެކަމަކު މިދިޔަ އަހަރު އެ އަދަދު ހުރީ 994 މިލިއަން ޑޮލަރުގަ އެވެ. އެއީ ގާތްގަނޑަކަށް 40 ޕަސެންޓުގެ އިތުރުވުމެކެވެ. އެމްއެމްއޭއިން އެންމެ ބޮޑު އަދަދެއް ދޫކޮށްފައިވަނީ ސަރުކާރު ހިއްސާވާ ކުންފުނިތަކަށެވެ. ސަރުކާރު ހިއްސާވާ ކުންފުނިތަކަށް މިދިޔަ އަހަރު 688 މިލިއަން ޑޮލަރު ޖަމާކޮށްފައިވެ އެވެ. އެއީ 2019 ވަނަ އަހަރާ އަޅާބަލާ އިރު 42 ޕަސެންޓުގެ އިތުރުވުމެކެވެ.

އިގްތިސާދަށް ޑޮލަރު އިންޖެކްޓްކުރަން ޖެހޭ ވަރު އިތުރުވުމުން ޑޮލަރު ރިޒާވަށް އޭގެ އަސަރު ކުރެ އެވެ. އެމްއެމްއޭގެ އެންމެ ފަހުގެ ތަފާސް ހިސާބުތަކުން އެނގޭ ގޮތުގައި ޖުމްލަ ރިޒާވުގައި ހުރީ 444 މިލިއަން ޑޮލަރެވެ. އަދި ޔޫޒަބަލް ރިޒާވްގައި ހުރީ 61 މިލިއަން ޑޮލަރެވެ.

ރާއްޖޭގައި މިވަގުތު 8 ބޭންކެއް ހިންގާއިރު، އޭގެ ތެރޭގައި ވެސް ގިނައީ ބޭރުގެ ބައެއް ބޭންކްތަކުގެ ކުދި ބްރާންޗުތަކެވެ. މިދިޔަ ދުވަސްތަކުގައި މާލީ ދާއިރާ ކުރިނޭރި އެއް ސަބަބަކީ އިންވެސްޓަރުން ބޭނުންވާ ފަދަ ލުއިތައް ރާއްޖޭގެ ބޭންކްތަކުން ނުލިބުމެވެ.

ގަވަރުނަރުގެ މަގާމާ ހަވާލުވެ ވަޑައިގަތުމަށް ފަހު ފުރަތަމަ އިންޓަވިއުގައި އަހުމަދު މުނައްވަރު ވިދާޅުވީ، ޓޫރިޒަމް ސެކްޓާ އިން ލިބޭ އާމްދަނީ ރާއްޖޭގައި ހިފެހެއްޓޭނެ ރަނގަޅު ނިޒާމެއް މިވަގުތު ރާއްޖޭގައި ނެތް ކަމަށެވެ. އެހެންވެ، އިންވެސްޓަރުން ބޭނުންވާ ފަދަ ހިދުމަތްތަކެއް ރާއްޖޭގެ ބޭންކިން ދާއިރާއިން ލިބޭނެ ގޮތްތަކެއް ފަހިކުރުމަށް އެމްއެމްއޭ އިން ވަރަށް ބޮޑު އިސްކަމެއް ދެއްވާނެ ކަމަށް ގަވަރުނަރު ވިދާޅުވި އެވެ.

ޑޮލަރު މާރުކުރުން ހަމައެކަނި ބޭންކްތައް މެދުވެރިކޮށް ކުރުމަށްޓަކައި އެކަމަށް ހަދަން ޖެހޭ ގަވައިދުތައް ހެދުމަށްޓަކައި މަސައްކަތް ކުރައްވާނެ ކަމަށް ރައީސް ޑރ މުހައްމަދު މުއިއްޒު ވެސް ވިދާޅުވެފައިވެ އެވެ. އެމްއެމްއޭއިން ބުނީ، އެކަމަށްޓަކައި މަނިޓަރީ ގަވައިދު އިސްލާހު ކުރުމުގެ މަސައްކަތް ފަށާފައިވާ ކަމަށެވެ. އަދި އަމާޒަކީ އަންނަ މަހުގެ ކުރިން އެކަން ކުރެވޭނެ ގޮތްތަކެއް ފަހި ކުރުން ކަމަށް ވެސް އެމްއެމްއޭ އިން ބުންޏެވެ.